淚之女王拍攝地 | 近期大熱韓劇《淚之女王》成為tvN史上收視率最高嘅電視劇，收視率達甚至超越《愛的迫降》！《淚之女王》除咗喺韓國拍攝之外，亦親自到德國取景，即刻跟住金秀賢以及金智媛呢對甜蜜嘅夫婦，到訪呢7個拍攝地啦！
圖片來源：tvn、Instagram@soohyun_k216、aquaplanet_official、官方圖片 | 撰文：Hedy
淚之女王拍攝地 | 1. 汝矣島現代百貨 The Hyundai Seoul（女王百貨）
喺劇集入面由洪海仁所經營以及白賢祐返工嘅地方「女王百貨」，其拍攝場地就係位於汝矣島現代百貨The Hyundai Seoul，其佔地相等於13個足球場咁大，更有首爾最美百貨之稱，純白色嘅裝潢再加上唔同嘅綠色植物，一行入去就令人感到放鬆自在，入面更有12米高嘅人工瀑布，超壯觀！除咗可以喺度買到唔同嘅國際精品之外，商場亦將首爾時下最熱門嘅潮流同埋設計師品牌匯聚，相當受年輕一代喜愛！
【INFO】 《汝矣島現代百貨 The Hyundai Seoul》 地址：서울영등포구여의대로108 營業時間：早上10:30至晚上20:30
淚之女王拍攝地 | 2. 日月樹木園 일월수목원（女王百貨頂樓花園）
洪海仁同白賢祐不時都會喺女王百貨頂樓花園散步，當時洪海仁更呃白賢祐呢度入面更有一隻叫英淑嘅浣熊，只要一叫佢嘅名就會出嚟！白賢祐表示自己唔相信，但佢竟然會偷偷地上去大嗌英淑，大家又有冇發現浣熊真係喺草叢入面呢個彩蛋？呢個頂樓花園就位於首爾京畿道水原市嘅日月樹木園，除咗有植物園可以欣賞眾多嘅植物之外，亦設有Coffee Shop～
【INFO】 《日月樹木園 일월수목원》 地址：경기수원시장안구일월로61 營業時間：早上09:00至晚上18:00
淚之女王拍攝地 | 3. 韓國石造博物館우리옛돌박물관 (洪海仁家豪宅）
洪海仁屋企所居住嘅豪宅睇落相當豪華，但原來真身竟然係韓國嘅石造博物館！博物院由千信一館長所創立，更用咗40年時間喺國內外蒐集而來嘅各種韓國石造文物，約有1,200件石造作品。相信入場參觀後可以加深對韓國文化嘅認識！
【INFO】
《韓國石造博物館우리옛돌박물관》
地址：서울특별시 성북구대사관로 13길 66 (성북동 330-605)
營業時間：早上10:00至晚上18:00
淚之女王拍攝地 | 4. 一山Aqua Planet海洋世界아쿠아플라넷(求婚場地）
白賢祐向洪海仁求婚嘅地方位於一山Aqua Planet海洋世界，入面共有4層，主要分為展覽海洋生物「The Aqua」以及展示陸地動物嘅「The Jungle」，可以透過巨大嘅水槽入面觀賞唔同嘅動物。如果想同另一半體驗水族館約會，就可以參考下啦～
【INFO】
《一山Aqua Planet海洋世界아쿠아플라넷》
地址：경기도 고양시 일산서구 한류월드로 282
營業時間：早上10:00至晚上18:00
淚之女王拍攝地 | 5. 忘憂宮（兩人激吻地）
除咗喺韓國拍攝之外，洪海仁亦因病隻身前往德國求醫，而德國亦都係兩人度蜜月嘅地方！當中最重要嘅一幕絕對係喺忘憂宮，白賢祐知道洪海仁飛往德國後，猶豫過後仍決定前往德國陪同洪海仁，搵咗好多個地方之後終於喺忘憂宮重遇洪海仁，兩人更在此激吻！忘憂宮位於德國波茨坦市北郊，為普魯士國王腓特烈二世模仿法國凡爾賽宮所建，喺1990年更被列為世界文化遺產，擁有絕佳嘅風景！
【INFO】
地址：Maulbeerallee, 14469 Potsdam, Berlin
淚之女王拍攝地 | 6. 柏林大教堂（祈禱地）
為咗令洪海仁可以儘快康復，白賢祐都會去教堂入面獨自禱告，而劇中正正就係喺柏林大教堂。柏林大教堂係重要地標之一，雖然喺二戰嘅時候曾遭毀壞，但歷經多年修復之後，終於都再重新開放，內部更係美輪美奐，有機會大家都要去參觀！
【INFO】
地址：Am Lustgarten, 10178 Berlin
淚之女王拍攝地 | 7. 法蘭克福鐵橋（情人鎖）
洪海仁同白賢祐曾經喺法蘭克福鐵橋，掛上屬於兩人嘅情人鎖，象徵愛情永恆。法蘭克福鐵橋連接法蘭克福嘅南岸同北岸，橋上面掛滿咗唔同形狀同顏色嘅情人鎖，相當浪漫！
【INFO】
地址：iserner Steg, 60311 Frankfurt am Main, Berlin
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
