日本聖誕燈飾 | 仲有唔夠2個月就到節日氣氛濃厚嘅聖誕節，如果聖誕節打算喺日本過嘅話，絕對要留意聖誕有啲咩特別活動，無論係睇璀璨嘅燈飾定係到主題樂園玩，都應有盡有！即刻睇睇日本聖誕節有咩活動推薦啦～
圖片來源： 官方圖片 | 撰文：Hedy
日本聖誕活動 | 1. 東京哈利波特影城—— 冬季限定霍格華茲in the snow
各位麻瓜們一生人必定要去一次東京哈利波特影城！而今年嘅聖誕節時間絕對係必去，喺入面過一個白色聖誕，相當浪漫～喺今年嘅11月9日至2025年1月5日，打卡都可以體驗到冬季限定特別企劃「霍格華茲 in the snow」！霍格華茲將會佈置成雪中嘅魔法學校，重現電影入面嘅場景！除咗有8棵高達5米嘅聖誕樹之外，餐檯上更擺滿烤火雞、聖誕蛋糕等食物。大家仲可以見到霍格華茲城堡模型鋪滿咗雪，就好似置身於雪景入面一樣。同場亦有唔少聖誕限定嘅周邊，有興趣嘅朋友就記得要快啲買機票啦！
【INFO】 《東京哈利波特影城》聖誕活動 日期：2024年11月9日至2025年1月5日 地址：〒179-0085 東京都練馬區早宮3-58
日本聖誕活動 | 2. 環球影城—— No Limit！聖誕節
相信唔少人都會去大阪環球影城玩～今年更推出「NO LIMIT ! 聖誕節2024 」活動，近30米高璀璨嘅聖誕樹將會呈現喺大家眼前，相信現場睇一定好震撼！聖誕節絕對唔少得熱鬧嘅Party，當點亮聖誕燈火後，Snoopy、Hello Kitty、Minions以及DJ 冰霜雪人，將會換上假日裝扮，同大家一齊登上舞台跳舞，超有氣氛！除此之外，Minions亦都會換上新裝，喺入口開心跳舞迎接大家，同大家一齊交流～仲有聖誕限定嘅歌唱表現Power of Pop ～聖誕假期心跳，由專業嘅表演者喺現場唱歌跳舞，昇華聖誕節氣氛～
【INFO】
《環球影城No Limit！聖誕節》
日期：2024年11月20日至2025年1月5日
地址：大阪市此花區櫻島2丁目1－33
日本聖誕活動 | 3. 東京迪士尼—— 迪士尼聖誕節
平時去太多香港迪士尼樂園嘅話，不妨趁聖誕假期買飛入東京迪士尼體驗下聖誕節氣氛！聖誕大遊行「迪士尼聖誕故事」將會喺今年迎來最終章，45分鐘嘅表演將會以「 Fond Farewell」為主題，配搭唔同嘅樂曲編排，將帶畀大家驚喜。而入夜之後更有「電子大遊行～夢之光」，為大家獻上聖誕節限定嘅特別版。喺聖誕期間更有限定登場嘅「鄉村頑熊劇場」以及幽靈公館「假期夢魘」，分別會有18隻為你熱情獻唱西部鄉村音樂，以及進入住咗999隻幽靈嘅大宅邸！走之前記得要買埋唔同聖誕節嘅商品呀！
【INFO】 《東京迪士尼聖誕節》 日期：2024年11月15日至2024年12月25日 地址：〒279-0031 千葉縣浦安市舞濱1-1
日本聖誕活動 | 4. 丸之內 —— SUPER MARIO聖誕燈飾
東京丸之內絕對係其中一個睇燈飾嘅景點之一，而今年燈飾更以Super Mario為主題，大家都有機會見到Mario、路易吉、奇諾比奧、碧琪公主、耀西等角色嘅聖誕裝飾～就算聖誕節睇唔到都唔緊要，「MARUNOUCHI BRIGHT HOLIDAY 2024」活動更會延長至新年，記得要把握時間嚟打卡～
【INFO】
《丸之內SUPER MARIO聖誕燈飾》
日期：2024年11月14日至2025年1月13日
地址：丸大樓、新丸大樓、丸之內OAZO、丸之內紅磚廣場
日本聖誕活動 | 5. 東京MIDTOWN日比谷——魔海奇緣2燈飾
東京MIDTOWN日比谷將會舉辦冬季點燈活動「HIBIYA Magic Time Illumination 2024」，大家就可以睇到超浪漫嘅聖誕點燈，舊年更有成420萬人到訪！今年更同迪士尼《魔海奇緣2》一齊聯名舉辦，喺階梯上面展示出以電影世界為靈感嘅彩燈，利用藍色嘅燈光令人聯想起曠闊嘅海洋，燈飾更選用藍色、綠色、金色以及粉色來展示，超唯美～
【INFO】 《東京MIDTOWN日比谷》 日期：2024年11月14日至2025年2月28日 亮燈時間：16:00至23:00 地址：日比谷中通/東京中城日比谷（日比谷階梯廣場/6樓花園）
日本聖誕活動 | 6. 六本木——「MIDTOWN CHRISTMAS 2024」
每年一踏入11月，大家都會見到東京市區入面有唔少五顏六色嘅燈飾，而今年六本木東京中城將會舉辦「2024年MIDTOWN CHRISTMAS」，使用約56萬顆繽紛燈泡來點亮，超級璀璨奪目！喺黃金聖誕大道上更有24萬顆宛若雪結晶般嘅裝飾作點綴，超靚呀～活動更會喺12月13日有泡泡以及降雪演出，配合埋燈光投影同音樂，簡直係滿滿嘅聖誕氣氛！
【INFO】 《六本木「MIDTOWN CHRISTMAS 2024」》 日期：2024年11月14日至2024年12月25日 時間：17:00至23:00 地址：日本東京都港區赤坂9-7-1
日本聖誕活動 | 7. 橫濱「夜之橫濱燈光秀」
聖誕節去日本絕對一定要去睇燈飾，橫濱將會喺今年首度舉辦大型燈光活動，「夜之橫濱燈光秀」活動地點位於橫濱都心臨海附近，同時亦涵蓋多個熱門旅遊景點例如中華街、元町及橫濱至櫻木町等。燈光秀將會結合動態嘅燈光同音樂，為大家獻上一場視覺同聽覺嘅享受！無論係居民定係旅客都可以免費觀賞今次嘅表演，演出期更去到2025年3月，呢段時間去開日本嘅朋友不妨計畫下～
【INFO】
《橫濱「夜之橫濱燈光秀」》
日期：2024年11月1日至2025年3月2日
地址：橫濱都心臨海
日本聖誕活動 | 8. 讀賣樂園
讀賣樂園開園60週年，今年將會舉行「Jewel Lumination 2024 LIGHT is LOVE～鑽石60慶典」。「讀賣樂園」全新摩天輪設施「Sky-Go-LAND」將會喺10月24日開始營業，屆時將展示全新裝飾嘅14種寶石色彩燈！行喺180米嘅大道上面，再配合埋七彩燈光，相當浪漫！現場更會有25cm高嘅光塔以及重新設計嘅光之隧道，每一個位置都圍繞住寶石水晶圖案，超靚！
【INFO】 《讀賣樂園》 日期：2024年10月24日至2025年4月6日 亮燈時間：16:00至20:30 地址：東京都稲城市矢野口4015-1
日本聖誕活動 | 9. TOKYO MEGA Illumination
東京大井競馬場嘅冬季點燈秀MEGA Illumination，為東京最大規模嘅燈飾活動，絕對係必睇！當中嘅噴泉表演再加上導馬，相當精彩～仲可以睇埋北極光、100 米燈光隧道，再同迷你馬見面，超啱大家打卡！
【INFO】
《TOKYO MEGA Illumination》
日期：2024年11月2日至2025年1月12日
亮燈時間：16:30-21:00
門票價錢：小童400日圓起；成人800日圓起
地址：東京都品川區勝島 2-1-2
日本聖誕活動 | 10. 大阪光之饗宴
大阪光之饗宴為大阪傳統冬季燈飾活動，絕對係遊客冬季必去嘅景點之一！當中分為「御堂筋彩燈」及「大阪光之文藝復興」兩大活動，前者今年將以「Grow Light」為設計理念，喺唔同嘅路口都裝飾上七彩顏色嘅彩燈，打造出「光之道路！，就好似成座城市都變得充滿色彩一樣～而後者就會喺中之島公園利用投射藝術，創造出浪漫嘅聖誕氛圍。
【INFO】
《大阪光之饗宴》
日期：2024年11月3日至2025年1月31日
地址：御堂筋及中之島公園
日本聖誕活動 | 11. 相模湖燈光秀 2024
關東最大嘅燈光展覽之一「相模湖燈光秀」，今年將會聯同日本《San-X》一齊舉辦，旗下嘅角色例如角落生物、鬆弛熊、趴趴熊以及爆炸狗等，推出無人機燈光表演～展覽入面仲有好多打卡位，一齊感受當中嘅夢幻氣氛！
【INFO】
《相模湖燈光秀》
日期：2024年11月16日至2025年5月11日
時間：16:00至21:00
門票價錢：小童1,300日圓起；成人2,000日圓起
地址：神奈川縣相模原市綠區若柳 1634
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
