花火大會係日本重要傳統活動之一，唔單止會放送璀璨嘅煙火匯演，仲會融合音樂、燈光特效、主題故事等精彩元素。如果錯過咗夏季花火大會都唔緊要，因為嚟緊日本各地都會陸續舉行冬季花火大會，據説由於冬天空氣較純淨，係冬季綻放嘅煙花會比夏天更燦爛！如果想同親朋好友着住和服感受日本傳統氣氛，就要mark低以下嘅日本冬季花火大會舉辦日期及詳情喇！
圖片來源：FUJIYAMA NAVI官網、東京台場官網、The Yokohama Convention & Visitors Bureau、日本國家旅遊局官網、Klook、下呂市觀光會、冬華美官網、沖繩琉球海炎祭WINTER官網、PRTIMES | 撰文：Icy
日本 冬季花火大會 | 1 – 河口湖花火大會
去到河口湖除咗能夠觀賞富士山美景，冬天仲可以欣賞花火大會。由2024年1月20日至2月18日嘅每逢星期六日，以及2月23日「富士山日」，每晚8點都會舉行花火大會，共有三個發射站，分別為主會場大池公園、疊岩 、以及八木崎公園。雪白嘅富士山配合燦爛嘅煙花，係清澈嘅河口湖面上形成非常唯美嘅畫面！
【INFO】
河口湖花火大會
地址：大池公園（主會場）、疊岩 、八木崎公園
日期：2024年1月20日至2月18日（逢星期六日）、2月23日
時間：20:00-20:20
費用：全免
交通方法：由東京市區乘搭巴士到「河口湖站」，再轉乘河口湖周遊巴士至「河口湖香草館」
日本 冬季花火大會 | 2 – 台場彩虹煙火大會
東京台場將會於今年12月舉行共四場花火大會，以東京地標彩虹大橋為背景，放射共1,800發鮮艷嘅煙火。雖然每場時間只有大約5分鐘，但加上彩燈裝飾後增添夢幻光彩，震撼嘅視覺效果令觀眾目不暇給！嚟緊仲有12月23號嘅表演，如果去日本過聖誕嘅人記得預留時間去啦！
【INFO】
台場彩虹煙火大會
地址：台場海濱公園（自由女神像旁）
日期：2023年12月2日、9日、16日、23日
時間：19:00
費用：全免
交通方法：乘搭新交通百合海鷗號至「台場海濱公園站」下車
日本 冬季花火大會 | 3 – 橫濱Sparkling Twilight
每年由7月至冬季，鄰近東京嘅橫濱都會舉辦多場花火大會，於橫濱大淺橋碼頭同新港碼頭放射約3,000發煙火，照亮整個海港。當中12月更會有聖誕主題花火活動，以及2024年除夕倒數煙火匯演，附近亦會舉行橫濱紅磚倉庫聖誕市集，如果想去橫濱海港感受聖誕氣氛就唔好錯過喇！
【INFO】 橫濱Sparkling Twilight 地址：橫濱大淺、及新港碼頭 日期：2023年12月9日、23日、24日、2024年1月1日、2月10日、24日 時間：20:00（除夕倒數日會於00:00開始） 費用：全免 交通方法：由羽田機場乘搭京急線至「橫濱站」，車程約25分鐘 / 由東京站乘搭JR東日本東海道線至「橫濱站」，車程約25分鐘
日本 冬季花火大會｜4 – 静岡縣熱海海上花火大會
靜岡縣熱海係著名嘅溫泉城市，今年12月3日以及23日，海灘附近亦會舉辦冬季海上花火大會，放射約3,000發嘅煙火。廣闊嘅海面映照住色彩斑斕嘅煙花，形成迷人嘅夜景，加上熱海三面環山嘅地形，營造出震撼嘅音響效果！
【INFO】 静岡縣熱海海上花火大會 地址：靜岡縣熱海海灣 日期：2023年12月3日、23日 時間：20:20 - 20:40 費用：全免 交通方法：由東京市區乘搭東海道本線或東海道新幹線至「熱海站」，步行約15分鐘至熱海海灘
日本 冬季花火大會｜5 – 沖繩琉球海炎祭WINTER
唔好以為冬天去沖繩會好悶，其實都有盛大嘅祭典可以玩！「琉球海炎祭WINTER」花火匯演將於12月24日平安夜喺度假勝地卡努佳度假村舉行。於被稱為「藍珊瑚海」嘅大浦灣海面，打上精心設計嘅煙花，煙花更用上電腦技術計算，能控制發射時間準確度至30分之1秒，完美配合背景音樂，為觀眾帶來震撼嘅表演。
【INFO】
沖繩琉球海炎祭WINTER
地址：卡努佳度假村（沖縄県名護市安部156-2）
日期：2023年12月24日
時間：18:00
費用：自由席 成人 港幣$325、兒童 港幣$163
交通方法：於名護漁港或新都心乘搭穿梭巴士
購票網址：https://bit.ly/3veddgO
穿梭巴士購票網址：https://bit.ly/3NA3Eza
日本冬季花火大會 | 6 – 九州長崎光之街煙花表演
相信最具代表性嘅跨年活動一定唔少得約埋一大班親朋好友睇煙花，而日本九州主題樂園連度假村「豪斯登堡」，將會舉辦全日本最大嘅除夕跨年煙火大會，發放達8,000發絢爛鮮艷嘅煙花，配合樂園內嘅歐陸風格建築以及現場音樂表演，營造熱烈嘅倒數氣氛。有意去日本跨年嘅朋友，就不妨去感受下啦！
【INFO】
九州長崎光之街煙花表演
地址：日本九州主題樂園連度假村「豪斯登堡」
日期：2023年12月31日
時間：23:00
費用：每人港幣$265起
交通方法：由福岡機場乘搭地鐵至「博多站」，再轉乘特急「豪斯登堡號」，車程約1小時45分鐘
購票網址：九州長崎光之街煙花表演
日本冬季花火大會 | 7 – 下呂温泉花火物語
日本三大名湯之一嘅下呂，除咗擁有歷史悠久嘅溫泉旅館，適逢冬季亦會舉辦花火匯演。由2024年1月6日至3月30日每逢星期六晚上8:30，下呂大橋下流飛騨川河畔都會放送精心設計嘅煙花表演，為白茫茫嘅冬天增添色彩。大家屆時亦可以係溫泉旅館一邊浸溫泉，一邊欣賞煙花！
【INFO】 地址：下呂大橋下流飛騨川河畔 日期：2024年1月6日至3月30日（逢星期六） 時間：20:30 費用：全免 交通方法：由名古屋乘搭JR特急飛驒號至「下呂站」，車程約1小時40分鐘
日本冬季花火大會 | 8 – 北海道阿寒湖冰上嘉年華
冬天去北海道旅行，除咗滑雪同睇雪景，仲可以欣賞冬日下綻放嘅迷人煙花！每年冬季，阿寒湖都會凍結成冰，化身為冰上樂園，並提供各項雪上活動體驗，例如雪地越野車、冰上釣魚、步行滑雪、雪地香蕉船等等！而每晚8點都會放射約300發煙花，係呢個遠離城市煩囂嘅環境下特別閃耀。
【INFO】 北海道阿寒湖冰上嘉年華 地址：北海道釧路市阿寒湖 日期：2024年2月1日至3月17日 時間：20:00 費用：全免（遊樂設施另計） 交通方法：由「釧路站」乘搭阿寒湖巴士，於「阿寒湖温泉站」下車，車程約2小時
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
