寵物小精靈樂園 | 鍾意Pokémon嘅粉絲有福啦，Pokémon官方宣布將會同東京讀賣樂園YomiuriLand合作，打造出「寵物小精靈樂園」！各位訓練師們要做好準備，去東京又有多一個新景點！
圖片來源：官方網站 | 撰文：Hedy
日本寵物小精靈公司將與讀賣樂園有限公司及讀賣新聞東京本社合資成立公司，並將會喺日本讀賣樂園中建設「寵物小精靈樂園」Pokepark Kanto！名稱源自於1996年第一款嘅電玩遊戲《寵物小精靈 紅／綠》以關都地區作為故事嘅舞台，所以樂園都會以關都命名。
曾合作推出POKEMON戶外冒險活動
今次日本寵物小精靈公司並非首次與讀賣樂園合作，早喺2021年曾合作舉辦戶外冒險活動「POKEMON WONDER」，喺4500平方米嘅森林入面，組成最多6人嘅隊伍，並從中尋找超過50隻嘅寵物小精靈。根據過往合作經驗，有唔少網民都猜測新樂園有機會以此為基礎，再擴張主題。官方現時仍未透露新樂園嘅詳情以及開幕日期，心急嘅大家唯有再等等。
讀賣樂園景點
歷史悠久嘅讀賣樂園，擁有43種遊樂設施，除咗有驚險嘅過山車同跳樓機之外，更有適合小朋友遊玩嘅設施。相信樂園開幕寵物小精靈園區之後，大家都可以喺度體驗關都自然風光嘅環境，同時更有嚟自世界各地嘅訓練師一同聚集同交流，希望可以打破國家、地區同語言嘅限制，一齊體驗同感受遊玩寵物小精靈嘅樂趣，回歸初心。讀賣樂園距離新宿只需要約35分鐘嘅車程，交通相當方便。除咗將來會有Pokepark Kanto之外，就等小編帶大家睇睇入面有咩必玩嘅景點，咁到時去東京嘅時候就可以一次過體驗！
-
春天賞櫻熱點
每逢講起日本嘅春天，大家都會諗起盛開嘅櫻花，而讀賣樂園入面就有上千櫻花樹畀大家觀賞，全長180cm嘅櫻花最啱大家一邊散步一邊欣賞，令你全心全意咁沉浸喺櫻花嘅美景入面。就連夜晚都可以欣賞到讀賣樂園「寶石燈飾」同櫻花共同演出嘅美景！無論喺搭摩天輪定過山車都可以有驚險刺激嘅櫻花之旅！
-
「寶石燈飾」
世界級燈光設計師石井幹子打造出「寶石燈飾秀」，以寶石色澤為主題命名。毎年超級人氣嘅噴泉秀有188道水柱以及高15公尺嘅巨大環狀水螢幕影像，加上雷射和火焰未大家帶嚟震撼嘅表演，欣賞如寶石般閃爍嘅浪漫燈飾與美景。
【INFO】 《Pokepark Kanto》 開幕時間：尚未公布 地點：東京讀賣樂園YomiuriLand
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
