天空之鏡 | 畢生必去！世界6大天空之鏡、彷如置身浩瀚星海超夢幻！

天空之鏡 | 唔知大家嘅Bucket list入面，又會唔會想喺人生嘅旅程上去睇世界上唔同嘅天空之鏡呢～同屋企人、朋友或者係另一半一齊打卡，相信絕對會留下難忘嘅回憶～即刻睇睇世界上有邊6大天空之鏡值得去！

圖片來源：Freepik、永安旅遊、網上圖片、Facebook@香川県三豊市観光案内所、大玩台中-臺中觀光旅遊局、theweddingscoop、Tony Gambino Photography、Instagram@fukutsu_scenes | 撰文：Hedy

天空之鏡 | 1. 玻利維亞 烏尤尼鹽湖

相信一講到天空之鏡，大家都會第一時間諗起玻利維亞嘅烏尤尼鹽湖，絕對係畢生必去嘅地方！玻利維亞嘅烏尤尼鹽湖，係地球上最大嘅鹽沼地，位於海拔3700米嘅玻利維亞高原上面。每年嘅12月到翌年2月嘅時候都係雨季，亦都係最佳觀賞時間，因為每逢降雨之餘都會化作一塊巨大嘅鏡，直接將藍天、白雲、夕陽、星空等美麗嘅景色直接倒映喺湖面上面。踩喺湖面上就好似遊走喺顛倒嘅世界入面，將真實與虛幻交織糾纏而成，景色相當迷人又壯觀！

【INFO】
《玻利維亞 烏尤尼鹽湖》
地址：Salar de Uyuni, Bolivia

天空之鏡 | 2. 日本四國 父母之濱

想唔使飛咁遠去欣賞天空之鏡，就一定要去日本四國嘅父母之濱打卡！父母之濱係一個長約1km嘅海水浴場，當沙灘上面嘅潮汐退去後，積水就會好似鏡咁反射出天空嘅倒影，造成天空之鏡！只要等待退潮以及日落時分重疊，就可以一次過影天空之鏡以及絕美夕陽～

【INFO】
《日本四國 父母之濱》
地址：香川県三豊市仁尾町仁尾乙203-3　父母ヶ浜海水浴場

天空之鏡 | 3. 台中 高美濕地

台中高美濕地相信大家都有聽過，廣達1,500公頃，再加上高美濕地擁有豐富嘅天然資源以及生態保護區，大家可以見到唔同鳥類、魚類及蟹類等生物。每日日落時分伴隨著壯觀嘅風車，絕對係超靚嘅天空之鏡！

【INFO】
《台中 高美濕地》
地址：台中縣清水鎮大甲溪出海口

天空之鏡 | 4. 美國 博納維爾鹽灘

美國博納維爾鹽灘佔地約52,000平方公里，每當下雨過後，鹽灘就猶如玻利維亞嘅「天空之鏡」一樣！由於周圍被大片沙丘、鹽鹼地同沼澤所包圍，所以就好似一個與世隔絕嘅狀態！每年嘅冬天大概係11月至5月嘅時候，較容易產生積水，係天空之鏡影相嘅最佳時機。

【INFO】
《美國博納維爾鹽灘》
地址：Bonneville Speedway Road, Wendover, UT 84083

天空之鏡 | 5. 福岡県福津市西福間4-15-1

日本福津市有超靚嘅 「鏡之海」，由福間海岸、津屋崎海岸、宮地濱等約3公里長嘅淺灘海岸線組成。每當退潮嘅時候，海灘會呈現鏡面般嘅反射，呈現出一幅奇妙又壯麗嘅景色，澄淨如鏡面嘅海灘映照出天空嘅靚～

【INFO】
《日本福津市海岸》
地址：福岡県福津市西福間4-15-1

天空之鏡 | 6. 中國 茶卡鹽湖

中國熱門旅遊景點茶卡鹽湖係固液並存嘅滷水湖，湖面波紋小而平靜，所以較為容易產生鏡面反射。喺藍天白雲以及雪山草地映襯下，形成絕美嘅天空之鏡！無論係日頭定係夜晚嘅景色都咁靚！

【INFO】
《中國茶卡鹽湖》
地址：海西州烏蘭縣茶卡鎮鹽湖路9號

——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk