WhatsApp自製貼圖 | 相信大家每日都會用WhatsApp同朋友或者家人傾計，當中必定會用到唔同可愛嘅貼圖，表達自己嘅心情同諗法！WhatsApp最近終於都可以自製貼圖喇，咁就唔使再下載唔同嘅APP，你可以隨時為屋企嘅小朋友甚或寵物整專屬Stickers，仲可以分享埋畀朋友下載。簡單3個步驟就可以完成，超方便呀！
圖片來源：SAUCE編輯部 | 撰文：Hedy
想直接喺WhatsApp自製貼圖，用戶依家可以利用iOS版WhatsApp嚟製作，唔需要再用其他應用程式，方便之餘又可以慳時間！嚟緊唔同嘅節日更可以為自己鍾意嘅明星甚或係屋企人，自製唔同嘅祝福，周圍send畀朋友。小編即刻教大家5個步驟，輕鬆自製可愛又獨一無二嘅貼圖喇！
1. 開啟WhatsApp對話
如果你係iOS 17嘅用家，就可以開啟網頁版本嘅WhatsApp去自製貼圖。用較舊iOS 版本嘅用家只可以編輯本來擁有嘅貼圖。不過如果你係 Android用家，就可能要再等下啦，因為就連官方都未公布幾時可以支援Android！如果你符合以上嘅條件，第一步就當然要開啟網頁版本WhatsApp，之後打開WhatsApp對話欄，大家可以見到左下方會有個「+」嘅符號，選擇「新貼圖」。同時你都要揀定你想製作為貼圖嘅相，更可以預先製成相簿，咁就唔怕會Miss任何一張相喇！
2. 選擇圖片並進行編輯
將你想製作貼圖嘅相上載，上載之後你就可以調整大細。同時亦可加入本來已經用緊嘅Stickers，輸入文字以及喺相上面畫畫都冇問題。文字字體暫時有5款選擇，以英文字體為主，顏色則有多種選擇，可以任意配搭！如果覺得本身張相嘅背景太凌亂，就可以使用模糊嘅功能，咁佢就可以幫你喺圖上面所選嘅位置打格仔，模糊嘅程度都可以再調整！
如果大家想將張相去背，只係想突出人物嘅時候，你就可以選擇剪刀功能，慢慢咁將人物勾畫出，咁就可以成功唔要個背景！即時畫衰咗都唔緊要，因為你可以重新去上一個步驟，或者撳重設就可以重新再畫過！
3. 直接傳送
當你製作好之後，就可以撳落去右下角，將貼圖傳送出去。傳送出去之後，只要打開自己嘅貼圖集，就會見到頭先所完成嘅貼圖，一早就已經幫你儲存咗！怕貼圖會唔見都可以加入最愛，咁就唔怕之後搵唔翻啦！
編輯原有貼圖
WhatsApp除咗可以自製新貼圖之外，依家更加可以用手機編輯原有嘅貼圖。只需要打開貼圖集，長按自己想編輯嘅貼圖，再按下「編輯貼圖」。你就可以加入時間、文字、位置以及其他貼圖等，同時你亦可以繪畫自己想畫嘅圖案，直接打造成獨一無二嘅貼圖！製作完成之後，就會自動Send出貼圖，咁就變成咗由你親自打造嘅貼圖，大家不妨去試下呢個新功能啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
