【 Switch遊戲推介 】任天堂最近公佈今年下半年嘅新遊戲，當中唔少遊戲都好玩又刺激！小編為大家整合5大必玩新遊戲，當中最令小編期待一定係《超級瑪利歐兄弟》系列全新遊戲《超級瑪利歐兄弟 驚奇》，相隔11年再推出新作，今次瑪利歐仲會變得大象添！想知道仲有邊啲遊戲就繼續睇內文啦！
圖片來源：nintendo｜撰文：Sharon
1. 超級瑪利歐兄弟 驚奇
自2012年嘅《New 超級瑪利歐兄弟U》以來，相隔11年後推出全新作品《超級瑪利歐兄弟 驚奇》！瑪利歐將與同伴一齊攻破敵人同機關，並以終點旗桿為目標。新遊戲將加入全新元素，當中新登場道具「驚奇花」，只要觸碰到關卡嘅玩法都會產生巨大變化，當中包括識得郁動嘅水管、敵人成群出現同會移動嘅地面。最特別係接觸「驚奇花」後，瑪利歐或遊戲角色都會變成其他唔同嘅面貌，變成大象嘅瑪利歐夠晒新奇啊！
《超級瑪利歐兄弟 驚奇》可支援多人遊玩模式，只要分享Joy-Con便可供最多4位玩家一齊玩～除咗瑪利歐、路易吉、奇諾比奧，更新設碧姬、黛西及耀西角色。大家一齊同瑪利歐展開冒險之旅啦！
【INFO】 《超級瑪利歐兄弟 驚奇》 推出日期：10月20日
2. 超級瑪利歐RPG
超經典角色扮演遊戲《超級瑪利歐RPG》時隔27年後，推出全新圖像及畫質Switch版本，以3D形式再同各位玩家喺《超級瑪利歐RPG》世界中冒險！瑪利歐、碧姬公主、庫巴同原創角色瑪羅及吉諾，會喺旅途中收集星星碎片以修復「星星之路」。遊戲預計會喺11月17日發售，大家記得留意啦！
【INFO】 《超級瑪利歐RPG》 推出日期：11月17日
3. 路易吉洋樓 2
2024年任天堂推出《路易吉洋樓 2》畫質強化版，以《超級瑪利歐》系列嘅路易吉為主角，用剋制幽靈嘅吸塵器裝置，同大家一齊勇闖鬼屋！全新嘅《路易吉洋樓 2》Switch版將會以3DS版高畫質呈現！自問膽大同追求刺激感嘅你一定要玩！
【INFO】 《路易吉洋樓 2》 推出日期：2024年（待定）
4. 碧姬公主新作（未正式命名）
除咗《路易吉洋樓 2》仲有以碧姬公主為主角嘅新遊戲都會喺2024年登場！以「舞台劇」為主題，今次碧姬公主再唔係被捉嘅人質，作為新作嘅主角將成為舞台上嘅主角，喺同伴嘅協助下施展各種華麗嘅舞台動作對抗敵人！想知道更多詳情有待官方公佈！
【INFO】 《碧姬公主新作（未正式命名）》 推出日期：2024年（待定）
5. 名偵探皮卡丘 閃電回歸
《名偵探皮卡丘》系列全新續作《名偵探皮卡丘 閃電回歸》將會10月6日正式登場！相隔5年再推出新作，鍾意飲咖啡嘅主角皮卡丘同好搭檔Tim，兩人會喺萊姆市同其他寵物小精靈一齊合作解開各種事件嘅謎團！根據官方說法，《名偵探皮卡丘 閃電回歸》將會喺《名偵探皮卡丘》嘅正式完結篇，有玩過嘅朋友一定唔可以錯過啊！
【INFO】 《名偵探皮卡丘 閃電回歸》 推出日期：10月6日
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
