iPhone16顏色 | 8月已經準備完結，相信大家最期待嘅就係9月Apple將會推出最新iPhone 16系列，當中網上更流傳iPhone 16 pro有呢款新顏色？網民意見更係兩極？呢款顏色又啱唔啱你心水呢？即刻入內文睇下啦～
圖片來源：X@MajinBuOfficial、theapplehub、SonnyDickson | 撰文：Hedy
隨住新一代iPhone16將要登場，網絡上都有唔少傳聞流出。當中更有疑似Apple Event發佈會嘅邀請函，將會喺今年9月10日舉行，上面更配有「沙漠鈦」金屬配色嘅蘋果標誌以及「Ready. Set. Capture.」宣傳語句。網民推測邀請函入面暗示咗將推出iPhone 16 Pro新顏色「沙漠鈦」以及新加入嘅拍攝按鈕。如果以上嘅消息屬實嘅話，大家就可以喺香港時間9月11日凌晨1點收睇發佈會！
iPhone16顏色 | iPhone 16 Pro新色登場？
相信大家除咗注重新手機規格有咩提升之外，就連手機嘅顏色都係一大考量特點。網上就流傳iPhone 16 Pro將會推出4款顏色，當中包括黑色鈦金屬、白色鈦金屬、原色鈦金屬以及新增嘅「沙漠鈦金屬」。呢款新顏色望落就好似古銅色一樣，低調得嚟又帶點金色咁，好特別，不過有網民就對新色唔太滿意，意見兩極！大家又會唔會買新色呢？
iPhone16顏色 | iPhone 16 5大顏色！
有唔少女生都渴望有粉紅色手機出現，根據網上所流傳嘅消息，今年嘅iPhone 16以及iPhone 16 Plus或會有粉紅色，仲有黑色、白色、綠色以及藍色畀大家選擇！睇返網路上嘅圖片，似乎iPhone 16以及iPhone 16 Plus都會用返垂直排列嘅鏡頭，睇落就同iPhone X嘅設計差唔多。推測採用垂直鏡頭係為咗可以拍出支援Vision Pro收睇嘅空間影片。
iPhone16顏色 | 全新拍攝按鈕
除咗唔同機型嘅顏色又變化之外，網上亦都流出iPhone16將會加入全新拍攝按鈕「Caputure Button」，而呢個按鈕亦都會喺機身右下方，採用觸覺回饋，可依照唔同嘅觸摸同壓力嚟實現唔同操作！除咗可以快速啟動拍攝同錄影之外，仲可以輕觸對焦，以左右滑動手勢嚟縮放同調整畫面比例，感覺超方便！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
