踏入冬季，香港各處都開始佈置聖誕裝飾，洋溢住濃厚嘅聖誕節日氣氛，唔知大家計劃好同親朋好友去邊度過聖誕呢？如果未有想法，咁就要參考小編為大家推介8大聖誕好去處，當中除咗有熱鬧嘅聖誕市集、超靚打卡位等，歡樂嘅AIA嘉年華亦會回歸。今個聖誕，快啲約埋家人好友出去狂歡啦！
圖片來源：中環大館、赤柱市集、友邦嘉年華、海港城、旅發局、海洋公園、香港迪士尼、新都會廣場、東薈城名店倉 | 撰文：Icy、Angela
聖誕好去處2023 | 1 – 中環大館聖誕燈光表演
由2023年12月1日至2024年1月1日，中環大館將與香港賽馬會合辦「小心意•大衆樂」聖誕季活動，於檢閱廣場設置12米高嘅大型戶外聖誕樹，並會係古蹟建築外牆掛上璀璨燈飾。而每晚6點至9點半，每半小時都會上演一次聖誕燈光表演，充滿夢幻節日氣氛！
【INFO】 中環大館聖誕燈光表演 地點：中環大館檢閱廣場 日期：2023年12月1日至2024年1月1日 時間：每晚18:00-21:30（每半小時一次）
聖誕大型活動 | 2 – 赤柱聖誕市集「Chillmas by the Sea」
赤柱糅合中西文化，又充滿悠閒氣息，放假去赤柱彷如去咗一轉外國旅行咁。而赤柱聖誕市集更係每年聖誕嘅重頭戲之一，今年由2023年12月9至10日、16至17日，以及23至26日，一連三個星期六、日及公眾假期，赤柱廣場都會舉辦「Chillmas by the Sea」聖誕市集。活動以澳洲聖誕傳統為主題，匯聚達150個人氣特色品牌，售賣多款聖誕精品、手作、澳洲特產以及美食。現場仲會設有攤位遊戲同埋澳洲特色打卡位，等大家感受南半球嘅異國聖誕氣氛！
【INFO】 赤柱聖誕市集「Chillmas by the Sea」 地點：赤柱廣場天幕廣場、公共空間及美利樓 日期：2023年12月9至10日、16至17日、23至26日（逢星期六、日及公眾假期） 時間：12:00-20:00
聖誕好去處2023 | 3 – 中環AIA嘉年華
闊別4年嘅中環AIA嘉年華終於係2023年12月21日正式回歸喇！同以往一樣，嘉年華除咗會設有大量攤位遊戲，包括射擊、籃球、踢波等，預備咗超過一百萬隻毛絨公仔獎品，當然就唔少得驚險又刺激嘅機動遊戲，例如飛天鞦韆、空中360、洗衣機，等大家約埋成班朋友去挑戰！現場仲會設有精彩嘅音樂表演、馬戲團雜技表演、以及達40個互動打卡裝置，營造歡樂嘅聖誕氣氛！
同時，享譽國際嘅世界雜技團相隔四年將會載譽回歸，為大家帶嚟一系列驚驗又刺激嘅技藝表演。表演由世界知名雜技團Gandeys Circus製作，並由世界各地挑選雜技人才以組成今年強勁嘅班底。表演包括「飛刀投擲」、「鋼索上的摩托車」、「驚險之輪」等，全部難度都極高，保證值回票價！
【INFO】 中環AIA嘉年華 地點：中環龍和道9號中環海濱活動空間 日期：2023年12月21日至2024年2月25日 時間：非高峰日子 12:00-22:00、普通及高峰日子 11:00-23:00 票價：非高峰時段 $95起、普通時段 $100起、高峰時段 $110起 購票網址：中環AIA嘉年華
瑞銀集團呈獻世界雜技團 日期：2023年12月21日至2024年2月25日 場次：週一至週日每天最多四場 演出時間：65分鐘 座位價錢：$150 - $500 購票網址：世界雜技團
聖誕好去處2023｜4 – 海港城「熊仔火箭發射站」
每年聖誕，海港城露天廣場都會設置大型聖誕燈飾，而今年一班來自「熊仔星」嘅太空熊仔，將於2023年11月17日至2024年1月1日登陸海旁！海港城會化身為充滿科幻數碼感嘅「熊仔火箭發射站」，佈滿霓虹夜光，設有10大打卡位，包括「無重力船艙」、「宇宙行星」、「光速升降機」、「星際運輸帶」等。當中最矚目就係達10米高嘅大型聖誕樹火箭，同埋5米高嘅「Merry Spacemas」霓虹拱門，色彩繽紛好啱打卡！
【INFO】 海港城「熊仔火箭發射站」 地點：尖沙咀海港城露天廣場 日期：2023年11月17日至2024年1月1日
聖誕好去處2023｜5 – 西九文化區海濱聖誕小鎮
西九文化區將於2023年11月24日至2024年1月1日，搖身一變成為歐陸風海濱聖誕小鎮。當中最大賣點就係逾20米高嘅「巨型聖誕樹」，樹頂以大大粒閃亮星星作點綴，搭配幻彩燈光裝飾，影相效果一流！小鎮四周仲有不同造型嘅小型聖誕樹、可愛小鹿擺設、禮物盒造型聖誕小屋等特色打卡位，令人感受濃濃節日祝福～
【INFO】 西九文化區海濱聖誕小鎮 地點：九龍西九文化區藝術公園海濱草坪西面 日期：2023年11月24日至2024年1月1日 時間：詳細開放時間可參考官方網頁
聖誕好去處2023｜6 – 海洋公園「聖誕全城HOHOHO 2023 」
海洋公園除咗每年都會舉辦驚心動魄嘅哈囉喂活動，踏入聖誕月份，亦會帶來「聖誕全城HOHOHO 2023 」一連串嘅聖誕活動。園內四處佈滿閃亮璀璨嘅燈飾，仲會擺放金光閃閃嘅聖誕樹。海濱樂園廣場將舉行「聖誕SING樂匯」，由多個本地團體輪流帶來精彩嘅表演節目，例如聖誕樂曲合唱、樂團現場演奏、舞蹈表演等。另外適逢法國經典著作《小王子》80周年，海洋公園設有夢幻嘅小王子藝術裝置，小王子嘅足跡會遍佈全園，帶你以不同角度探索小王子嘅奇幻世界～
【INFO】 海洋公園「聖誕全城HOHOHO 2023 」 地點：香港島黃竹坑道180號 日期：2023年12月9日至2024年1月1日 時間：10:00 - 19:00 票價：全日暢玩優惠門票 - 成人$388、小童 $233 購票網址：海洋公園
聖誕好去處2023｜7 – 迪士尼樂園「A Disney Christmas」
由2023年11月17日至2024年1月1日，香港迪士尼樂園將舉辦「A Disney Christmas」聖誕主題活動，大家除咗可以係城堡位置觀賞「米奇與好友聖誕舞會」，仲有飄雪噴泉表演，係漫天飄雪下向巨型聖誕樹許願，特別浪漫！
另外香港迪士尼全球首個《魔雪奇緣》主題園區已於11月中開幕，呈現阿德爾王國嘅面貌，以及多個具代表性嘅電影場景，仲設有刺激好玩嘅滑雪橇過山車及冰雪皇宮探索小船，今個冬天大家就可以感受外國冰雪小鎮嘅熱鬧節日氣氛！
【INFO】 香港迪士尼樂園「A Disney Christmas」 日期：2023年11月17日至2024年1月1日 時間：星期一至四 10:30-20:30、星期五至日 10:00-21:00 購票網址：香港迪士尼樂園
聖誕好去處2023｜8 – 葵芳新都會廣場「夢幻冬日雪之國」
由2023年11月11日至2024年1月1日，葵芳新都會廣場舉行「夢幻冬日雪之國」聖誕主題活動，現場除咗擺放7米高巨型聖誕樹，以及3米高的「幻彩水晶球」打卡裝置，仲設有新界西首個户外溜冰場，等大家就算係香港都可以享有飄雪下溜冰嘅體驗！溜冰場採用環保技術研發，並配合燈光及音響設備，打造多重感官娛樂享受。另外新都會廣場仲會舉辦聖誕老人見面會以及12月聖誕市集，節目相當豐富～
【INFO】 葵芳新都會廣場「夢幻冬日雪之國」 地點：葵芳新都會廣場L4露天廣場 日期：2023年11月11日至2024年1月1日 時間：每日 10:00-22:00
聖誕好去處2023｜9.東薈城名店倉「Smurfs Up Christmas」
為咗慶祝《藍精靈》誕生65週年，東薈城名店倉同藍精靈首度聯乘，舉辦「Smurfs Up Christmas」聖誕主題活動！由12月8日起，一連三個星期五、六、日及公眾假期，東薈城名店倉四樓平台廣場將會化身「精靈戶外市集」，超過20個特色攤位售賣多款藍精靈故鄉——比利時嘅節日限定精品、創意手作及特色美食。唔止咁少，東薈城名店倉更會舉辦「聖誕音樂派對」，邀請多個人氣歌手，包括張繼聰、力臻、吳林峰及JC陳詠桐等，同時亦會有香港管弦樂團及其他團體的表演，節目咁豐富，大家唔好錯過啦。
【INFO】 東薈城名店倉「Smurfs Up Christmas」 「精靈戶外市集」 地點：東薈城名店倉四樓平台廣場 日期：2023年12月8 - 10 / 15 - 17 / 22 - 26日 時間：每日 13:00 - 20:00（12月24日開放至22:00） 「聖誕音樂派對」 地點：東薈城名店倉四樓平台廣場 日期：2023年12月9 - 10 / 16 -17 / 23 - 26日 （逢星期六、日及公眾假期) 時間：每日15:00 - 16:00及17:00 - 18:00（12月24日：15:30 - 16:00及16:30 - 18:00）
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
