iPhone監控｜依家香港人基本手上至少擁有一部手機，無論任何時候都機不離手，加上依家手機越嚟越方便，銀行轉賬或網上消費都可以輕易做到，如果一唔小心手機被監控或者出現安全問題就會受到好大影響，iPhone用家如果遇到呢個情況更要小心！即睇內文等小編話你知，另附充電小貼士！
圖片來源：網絡圖片、Apple、SAUCE｜撰文：Sharon
iPhone被監控？
iOS14或之後版本，當有app使用咪高風或相機時，就會顯示橙色點、橙色正方形或綠色點。如果冇使用咪高風或相機都出現橙色或綠色點，手機好大機會被安裝木馬程式，偷偷開啟鏡頭監控或錄音功能，iPhone用家可以去手機嘅「設定」位置尋找「私隱與保安」查看「相機」同「咪高風」獲得授權嘅應用程式，如果冇經授權嘅應用程式又見到綠/橙點出現，記得要刪除唔常用嘅應用程式。
除咗上述問題，相信大家最擔心都係手機電池量極速消耗或者係運行速度減慢，如果你都遇到呢3大問題就要小心喇！
iPhone問題1：運行變慢+自動熄機重開
iPhone如果經常出現運行速度變慢，例如打字要等手機畀反應、應用程式過場時明顯有lag，或者手機會自動熄機再重開。手機會熄機再重開最大原因係手機過熱或過冷，只要等電池溫度回升就唔會發生呢個情況，但過熱重啟會會嚴重損壞內部零件，對電池最傷！但相反，重啟時手機冇過熱或過冷，有機會係因為消耗硬體資源過多嘅應用程式，可以嘗試刪除安裝或更新後令手機明顯變慢嘅應用程式。
iPhone問題2：手機電池量極速消耗
每部iPhone使用內置鋰離子電池都有特定充電周期，而唔係計次數，由0％至100％就為之一個周期，50％至100％是為半個周期。一般鋰離子充電約500個周期，電池壽命就會減去20％。如果手機朝早充滿電，未到中午已經用咗50％電，建議查看「設定」尋找「電池」及「電池健康與充電」，若低於80％可考慮回廠換新電池！
iPhone問題3：液體接觸指示器
型號較新嘅iPhone具生活防水機身，但水份仍然有機會滲入機身內。如果手機入水，記得馬上關機同唔好嘗試重開！建議使用密實袋將手機與白米一起存放，盡快拎去維修。Apple會打開手機嘅SIM卡槽，查看液體接觸指示器 （Liquid Contact Indicator）有冇變紅，如果有，好有可能係人為失當令手機入水，需要另外收費維修。
充電貼士一：充電唔好充夠100%！
好多人買新手機後都會習慣性充電充至100%，或者手機完全冇電先再充電，以增加電池效能，但呢個做法會加速電池老化，最佳狀態係維持電池於20％至80％之間，能有助延長鋰電池嘅壽命。
充電貼士二：快速充電加速鋰電池老化
市面唔少快速充電功能嘅插頭同電線，可以加快手機充電嘅時間，但反而會令鋰電池溫度變高，加速鋰電池老化，所以用返較低電壓及電流充電會更理想！
充電貼士三：溫度過高/過低 縮短電池壽命
玩手機時間長咗會令手機溫度提高，鋰電池最佳使用溫度為0度至35度，一邊充電一邊玩手機會影響電池性能，如果使用影響散熱嘅手機殼充電都有機會影響電池！
