iOS18更新 | Apple喺過去嘅WWDC2024大會上面，推出iOS18，當中更配合埋Apple Intelligence，打造出眾多全新功能，簡直就好似換咗部新電話一樣～預計9月就會正式推出，即刻睇睇有咩更新重點啦！
圖片來源：官方圖片 | 撰文：Hedy
iOS18新功能 | 1. 一鍵P走路人
相信大家好多時影咗啲靚相，但因為背景太多人而影響咗成張相嘅觀感。依家終於唔需要靠第三方APP，就可以直接一鍵P走路人！iOS18入面導入咗智慧修圖功能「Clean Up」，可以透過自動辨識或者手動塗鴉功能，去除唔想要嘅人或者物品，執圖嘅時候就更為方便！
iOS18新功能 | 2. 自由排列主畫面
只要更新到iOS18後，就可以喺主畫面任何空白位置移放App同埋小工具，唔會再受到任何限制。除咗可以自由擺放位置之外，大家都可以為APP自訂顏色，為桌布設計出淺色或深色模式嘅效果，隨時轉換風格。
iOS18新功能 | 3. 自由調整控制中心
控制中心同樣都有全新設計，大家可以自行設定多種最常用嘅工具，新增至控制中心，咁用起上嚟就更為方便啦。新增到控制中心後，更可以將圖標放大縮小，設計成你自己鍾意嘅版面～
iOS18新功能 | 4. 自訂鎖定畫面功能
鎖定畫面底部本身就預設咗電筒同埋相機功能，而iPhone用戶終於都可以透過今次更新，喺Controls Gallery設定其他功能項目，或者直接移除都冇問題！
iOS18新功能 | 5. 主畫面隱藏APP
想進一步保護自己嘅私隱，手機主畫面上面嘅APP亦都可以利用隱藏功能收埋佢，將會移至上鎖及隱藏嘅APP資料夾入面。不過當隱藏咗APP後，大家唔會再收到任何通知及信息，亦都唔會喺搜尋以及系統上任何地方出現～
iOS18新功能 | 6. 全新密碼管理APP
Apple曾推出過「鑰匙圈」，而全新嘅Passwords APP可以幫助大家更輕鬆管理帳戶密碼、通行密匙、Wi-Fi 密碼，以及雙重驗證功能嘅驗證碼等等。呢個APP仲具備密碼外洩安全警告通知，等大家可以放心使用，唔需要再用紙筆Mark低密碼啦！
iOS18新功能 | 7. 相片App全新設計
相片App入面嘅相將會以精簡嘅單一畫面嚟 顯示，更可以依照主題打造出精選集，一次過瀏覽相，有助大家減少手動整理相簿！而全新嘅Carousel View方式亦會每日更新，將最愛嘅人物、寵物、地點等焦點內容顯示。
iOS18新功能 | 8. 語音轉換文字
對於經常要紀錄低會議紀錄嘅人嚟講，iOS引入嘅語音轉文字功能就相當適合大家，只需要打開備忘錄，對住電話講嘢，就可以幫你將語音入面嘅內容轉換成為文字，準確度高之餘又夠方便！
iOS18新功能 | 9. 計算機更新
無論喺iPad上面定手機，大家都可以透過手寫或輸入數學公式去計算，如果用手寫，更會模仿你嘅字跡去寫返答案。計算機更新後亦可以進行匯率換算功能，只要打開換算功能之後，就可以幫你轉換成唔同國家同地方嘅匯率，超方便！
iOS18新功能 | 10. 全新Writing Tools
Apple Intelligence大大提升使用iPhone時嘅體驗，全新嘅Writing Tools功能，可以用喺郵件、「備忘錄」、Pages 及第三方app，幫助重新、校對和撮寫文字，咁就唔怕交重要文件或資料嘅時候會出錯啦。
iOS18新功能 | 11. 訊息全新文字效果
唔知大家平時又會唔會用iMessage呢？今次iMessage推出全新文字效果，令大家嘅溝通唔再係冷冰冰。更新完之後可以放大句子或充滿動感嘅表情符號，加埋粗體底線、斜體及刪除等格式。如果想喺指定時間同朋友Send信息，依家更可以預先排定時間。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
