WhatsApp可以話係香港最多人用嘅即時通訊工具,雖然日日都用WhatsApp,但原來WhatsApp其實有好多唔講唔知嘅隱藏技能,無論係同朋友傾計定係工作做嘢,呢啲技能都必不可少!想知道用啲咩實用嘅隱藏技能,就要睇埋落去啦!

圖片來源:官方圖片、網路圖片、SAUCE編輯部|撰文:Claudia

WhatsApp隱藏技能
(圖片來源:官方圖片)

隱藏技能1 – 語音訊息轉文字

原來依家可以將WhatsApp語音訊息轉換成文字,真係方便咗唔少㗎!有時候喺啲好安靜嘅地方唔方便聽錄音,例如開會個時,有人send好多段錄音嚟,呢個時候將佢轉換成文字,咁你就可以知道對方講緊咩啦!

注意《Messenger Duo for WhatsApp》非 WhatsApp 官方軟件,乃屬第三方軟件,使用前要先考慮私隱風險!(圖片來源:App Store)

不過想要有呢個功能首先要喺App Store下載安裝《Messenger Duo for WhatsApp》工具,不過暫時只支援 iOS平台,Android嘅用戶就用唔到啦!可直接將 WhatsApp 語音訊息轉換成文字,使用方法好簡單,選擇你要辨識嘅錄音「轉發」佢,然後喺分享選擇「Duo Transcribe」,大家就可以睇到轉換嘅文字,過程好快,如果錄音越長需要時間都會較長!可惜目前只支援英文,大家可以期待下遲啲會唔會推出中文語音轉換喇!

iPhone下載連結:https://apple.co/3DOSlyW


隱藏技能2 – 加速聽錄音

WhatsApp隱藏技能
呢個功能可以令你聽朋友錄音嘅時候唔會躁底!(圖片來源:網路圖片)

小編相信大家身邊一定有朋友每次嘅錄音錄成2-3分鐘,但係完全冇重點,又唔可以唔聽,呢個功能絕對可以解救你!WhatsApp 提供加速播放錄音嘅功能,除咗原先嘅1倍速,依家仲有1.5倍同2倍速可以揀,喺每段錄音側邊都有加速嘅選項!


隱藏技能3 – 閱後即刪相片或影片

WhatsApp隱藏技能
選擇發送嘅相片,然後喺右下方點選符號,相片即變成閱後即刪(圖片來源:官方圖片)
WhatsApp隱藏技能
(圖片來源:官方圖片)

如果唔想對方可以保存到你send過去嘅相片或影片,用家可以喺傳送相片或影片嘅時候出現一個「閱後即刪」圖示,按下就即可啟用「閱後即刪」模式。對方收到後會顯示「照片」,檢視「照片」後就會自動刪除,無法開啟第二次!


隱藏技能4 -訊息刪除功能

WhatsApp隱藏技能
要注意嘅係呢個功能係限時嘅!(圖片來源:網路圖片)

有時候send錯字或者send錯訊息畀人都會想刪除訊息,WhatsApp 「刪除訊息」功能可以畀你喺對話中刪除訊息,對方嘅對話中都會同時刪除,只要直接按著想刪除嘅訊息再按 「刪除」,會出現兩個選項包括「在所有人的手機上刪除」同「在我的手機上刪除」,選擇「在所有人的手機上刪除」,即使對方已閱都可以照樣刪除,不過要注意嘅喺呢個功能只適用於 60 分鐘內送出嘅訊息!


隱藏技能5 – WhatsApp原圖傳送

WhatsApp隱藏技能
選擇文件而非選擇相片!(圖片來源:SAUCE編輯部)

有時候同朋友出去玩完一日,好多人都會用WhatsApp send返相同影片,難得影完靚相梗係唔會想張嘅畫質冇咁好啦!但係如果用WhatsApp傳送相同影片,為咗節省頻寬同儲存空間,WhatsApp會自動壓縮先傳送,不過只要用WhatsApp嘅文件傳送功能,喺對話介面嘅輸入列按「+」號再按「文件」,選擇要傳送嘅相片、影片即可!不過如果用呢個方法,傳送嘅相片同影片就冇得有預覽顯示同埋需要先將相片、影片同步上雲端!


隱藏技能6 – 預設自動刪除訊息

WhatsApp隱藏技能
WhatsApp「自動刪除訊息」(Disappearing Messages)功能!(圖片來源:官方圖片)

WhatsApp一直有個功能叫「自動刪除訊息」功能。只要啟用呢個功能後,新嘅訊息會喺24小時、7 日、90 日後消失。即時喺兩人對話中,只要其中一方開啟「自動刪除訊息」,新訊息會喺選擇咗嘅時間消失唔見!如果係喺群組對話中,就只得群組管理員可以控制呢個功能嘅開啟同關閉。


隱藏技能7 – 不加入聯絡人傳送訊息

呢個隱藏功能就係小編認為最好嘅隱藏功能!之前經常要將電話加入聯絡人先可以傳送信息,不過有時候喺網上買嘢問價,都要將對方加入聯絡人就好麻煩!原來Android 同 iOS 用戶可以利用指定嘅 WhatsApp 傳送信息連結,唔使將新號碼加入通訊錄都可以傳送訊息畀對方!

WhatsApp隱藏技能
啱晒唔想手機通訊錄有咁多陌生聯絡人嘅你!(圖片來源:官方圖片)

只需要喺手機嘅網頁瀏覽器,輸入https://api.whatsapp.com/send?phone=國家區號+電話號碼,例如電話號碼係+852 8765 4321,只要輸入https://api.whatsapp.com/send?phone=85287654321,頁面隨即會詢出是否在 WhatsApp 開啟,點 「Open」 即可。


隱藏技能8 – 加上粗體、斜體、刪除線

 

WhatsApp隱藏技能
咁就可以重點標示重點內容啦!(圖片來源:SAUCE編輯部)

有冇平時打一大段字去WhatsApp群組,朋友好容易睇漏嘢?如果利用不同格式嘅文字,重點標顯示佢咁就可以避免好多大頭蝦啦!方法非常簡單,如果想將文字變粗體,只需要喺文字前後加星號「*」!如果想將文字變斜體,就喺文字前後加下劃線「_」,如果想要刪除線就喺文字前後加波浪線「~」,操作好簡單!


隱藏技能9 – 群組私回功能

WhatsApp隱藏技能
啱晒所有怕羞妹怕羞仔!(圖片來源:SAUCE編輯部)

如果唔想喺群組回覆或者想私下問問題,咁你一定要知道呢個隱藏技能!WhatsApp有一個「私回」 功能,可以畀大家私下回覆群組內指定成員,只要選取你想回覆嘅訊息,點按 「Privately reply」(私下回覆),訊息內容就會喺成員嘅私人信息頁面開啟,直接輸入你嘅回覆內容就可以啦!


隱藏技能10 –  分享實時位置

WhatsApp隱藏技能
唔使自己再慢慢搵地圖,夠晒方便!(圖片來源:官方圖片)

如果自己蕩失路或者朋友蕩失路點先可以最快搵到大家?呢個時候就可以用「實時位置」分享功能,喺指定時間內分享自己嘅實時位置,分享嘅對象可以係個人或者群組,仲可以控制分享嘅時間長短,有 15 分鐘、1 小時同 8 小時或者隨時停止分享位置,呢個功能亦都經端對端加密保護,即係除咗您分享嘅對象之外,唔會有其他人睇到你嘅實時位置!

隱藏技能11 – 自訂群組私隱功能

WhatsApp隱藏技能
只要設定做後兩個選項,當有人想拉你入群都需要有加入群組要求,72小時內你同意先會被加入!(圖片來源:官方圖片)

唔知道大家有冇過無啦啦畀陌生人拉咗群,點知原來係啲宣傳群組!不過依家喺WhatsApp 新私隱設定下,大家可以選擇群組私隱 (Groups Privay) ,內設三個選項包括:「所有人」、「我的聯絡人」同「我的聯絡人,除了…」。如果選擇「所有人」代表任何人都可以將你加入群組,如果係「我的聯絡人」,咁對方要係你通訊錄嘅聯絡人先可以加入群,最後就係「我的聯絡人,除了…」,如果你指定某人唔可以加你入群,即使對方係你嘅通訊錄聯絡人都加唔到!


隱藏技能12-限制群組嘅發言功能

WhatsApp隱藏技能
完美避免洗板!(圖片來源:網路圖片)

WhatsApp群組可以方便多人對話,但係每個WhatsApp群入面總會有幾個好踴躍發言嘅組員,幾分鐘可以send成百個訊息,多到load唔到!原來WhatsApp 設有群組管理功能,如果你係群組管理員就可以隨時限制群組內嘅發言功能,管理員可以發言,而其他成員只能讀取,唔怕你想發佈嘅訊息畀人洗走啦!


隱藏技能13 -重要訊息標星號

WhatsApp隱藏技能
選擇你想標註嘅訊息,按「標上星號」!(圖片來源:SAUCE編輯部)
WhatsApp隱藏技能
喺「設定」入面嘅星號訊息就可以搵到!(圖片來源:SAUCE編輯部)

如果同好朋友 WhatsApp 閒閒地每日都有機會send過百條訊息,如果想搵返啲重要訊息都有排搵㗎!WhatsApp 就可以畀你標記重要訊息,只要你長按想標記訊息,就會彈出標上星號嘅選項,圖片都係同樣操作!如果之後想查看已標記訊息,只要喺「設定」入面選擇「標註訊息」就搵到啦!


隱藏技能14 -改電話號碼

WhatsApp隱藏技能
(圖片來源:網路圖片)

相信大家都知道 WhatsApp 帳號係連著電話號碼嘅,即使換手機都唔會冇咗個帳號,相反如果你係換電話號碼就反而有機會冇咗個帳號!其實只要進入「設定」、「帳號」、「更改電話號碼」,輸入舊號碼同新號碼,然後 WhatsApp 就會傳送認證碼去新號碼,完整認證後就成功啦!同時WhatsApp會通知埋你所有聯絡人,你改了電話號碼!


隱藏技能15 -管理儲存空間

WhatsApp隱藏技能
(圖片來源:官方圖片)

終於嚟到最後一個嘅隱藏技能!有冇同小編一樣儲存空間成日爆嘅朋友仔呢?WhatsApp有提供儲存空間管理工具,用處係可以將聯絡人為單位刪除內容功能,可以檢視被轉發多次同埋大於 5MB 的多媒體檔案!仲可以即時畀大家知道WhatsApp 多媒體內容佔用了多少儲存空間,只要大家去「設定」選擇「數據和儲存用量」,點擊「儲存空間容量」就搵到啦!

唔講唔知原來WhatsApp收埋咗咁多功能,快啲share畀朋友同埋屋企人睇,教佢哋點用啦! 

——————————————————
Follow 我地睇更多最新情報!
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/