Switch聚會遊戲 | 新年大家除咗聚埋一齊拜年傾計之外，如果屋企有部Switch，咁就最啱一齊打機開心下！唔知會係增進大家嘅感情定係友誼受到破壞呢？今次小編介紹大家新年必玩嘅7款聚會遊戲，簡單操作之餘一家大細都可以玩！
圖片來源：nintendo | 撰文：Hedy
Switch遊戲推薦 1. 超級瑪利歐兄弟驚奇（1至4人遊玩）
「超級瑪利歐兄弟」系列相隔約11年嘅全新作品喺Nintendo Switch登場！為咗拯救遭到庫巴攻佔嘅「花花王國」，瑪利歐將會同一眾同伴突破重重敵人同機關，以終點旗杆為目標直進。今次更有新登場嘅道具「驚奇花」，只要觸碰咗呢款道具之後，關卡玩法就會出現巨大變化，有機會水管會郁又或者敵人將會成群結隊咁出現！有12款角色可以選擇，新手啱啱開始玩，更可以選擇耀西同偷天兔，呢兩款角色操作嘅時候都唔會受到傷害，最啱新手玩！
Switch遊戲推薦2. 卡比的美食節（1至4人遊玩）
可愛嘅卡比將會於點心世界入面進行美食戰鬥，係一款鬥吃得最多士多啤梨，最後體積越大嘅人就會獲勝！只要簡單操控搖桿就可以輕鬆令卡比滾動，一齊爭奪跌落嚟嘅士多啤梨，仲可以擊飛對手，過程有趣之餘，仲可以睇住卡比變大超可愛！
Switch遊戲推薦3. Mario Kart 8 Deluxe（1至4人遊玩）
激烈嘅賽車對戰絕對適合一眾親朋好友決戰一番，當中更有多達42個角色選擇，每個角色都有唔同嘅數值，48種賽道等緊你去挑戰，絕對唔怕悶。喺對戰途中更可以善用道具例如蘑菇、星星、閃電同香蕉皮等等，隨時為你扭轉局勢！即使係小朋友或者未玩過嘅人，都可以開啟輔助駕駛系統，咁就唔怕脫離賽道啦！
Switch遊戲推薦 4. Nintendo Switch 運動（1至4人遊玩）
新年嘅時候總係會食好多賀年食品，唔小心食得太多嘅時候點算好？呢個時候就可以拉埋親戚朋友一齊做運動，Nintendo Switch 運動可以畀你選擇如羽毛球、排球、足球、網球、高爾夫球及保齡球運動，多款運動種類都玩到。只需要揮動手上嘅Joy-Con，模擬出運動嘅手勢，就可以感應到，一款簡單又輕鬆上手嘅遊戲！
Switch遊戲推薦 5. 角落小夥伴一起來玩節奏派對（1至4人遊玩）
無論係大人定小朋友都鍾意嘅角落小夥伴，推出節奏遊戲。只要配合遊戲入面播放嘅音樂節奏，喺適當嘅時機揮舞Joy-Con，再配搭上唔同嘅背景場地例如網球場、溫泉、船上、音樂節等等，令你可以跟著角落小夥伴們享受遊戲。4名玩家需要分為2隊，合作取得更高分數，操作方式簡單，相當適合大人陪伴小朋友一齊遊玩，訓練音樂節奏感。
Switch遊戲推薦 6. Just Dance 舞力全開 2024（1至6人遊玩）
Just Dance自推出以嚟深受大家嘅喜愛，而《Just Dance 舞力全開 2024》收錄咗涵蓋各種類型與時代嘅40首新歌，當中包括BLACKPINK嘅「How You Like That 」以及Miley Cyrus 「Flowers」等大熱歌曲。新增嘅歌曲由拉丁、搖滾樂、嘻哈樂到韓國流行樂都有，令你係新年入面都可以郁動身體，透過跳舞嚟消耗卡路里！
Switch遊戲推薦 7. 路易吉洋樓3（1至8人遊玩）
路易吉同一班朋友被邀請到一間豪華飯店，但原來呢個竟然喺由「害羞幽靈王」嘅超級粉絲老闆所設嘅一個陷阱！一班朋友瑪利歐、碧姬公主、奇諾比奧們被抓走，更被困喺畫入面，得翻路易吉一個人。為咗拯救一班同伴，細膽嘅路易吉就踏上咗呢條冒險之旅，希望可以救翻一眾嘅同伴。大家可以喺遊戲入面控制角色，並要使用鬼怪吸塵器捕捉鬼魂，只要喺故事入面推進部分劇情，就可以遊玩「恐怖高塔」嘅內容！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
