香港溜冰場 | 近排天氣開始熱，想帶小朋友去放電自然要揀返啲有冷氣嘅地方，相信溜冰絕對係一個唔錯嘅選擇。小編已經幫大家整合咗全港嘅溜冰場，即刻睇睇收費同開放時間啦！
圖片來源：官方網站 | 撰文：Hedy
香港溜冰場2024 | 1. 圓方The Rink溜冰場
The Rink溜冰場位於園方，同時亦都係寵物友善溜冰場。除咗小朋友同大人都可以玩之外，The Rink溜冰場不時都會舉辦「冰上寵物樂 Pet On Ice」活動，等大家可以帶埋坐喺寵物車嘅毛孩一齊享受冰上樂趣～場地不設售票處，只需要喺入場嘅時候用八達通通過閘口，就會按大家使用冰面嘅時間每分鐘去計算，每分鐘低至$1.1，以半個鐘嚟講都只係$33！咁就唔使限死一定要玩成個鐘咁攰，隨時都可以出入溜冰場。收費彈性之餘又夠晒方便，一邊溜冰一邊觀賞開揚嘅維港景緻，不過去之前記得要上官方網站睇下開放時間，有機會會因冰球活動而唔開放～
【INFO】 《圓方The Rink溜冰場》 收費：入場收費$20（包括溜冰鞋）、每分鐘港幣$1.1/1.6 營業時間：星期一至日 10:00至22:00 地址：尖沙咀柯士甸道1號G001號鋪位 電話：2196 8016 官方網站：https://bit.ly/3VuT8wd
香港溜冰場2024 | 2. LOHAS Rink
全港首個採用最新節能科技嘅環保溜冰場地，位於將軍澳日出康城LOHAS Rink，亦係根據國際標準而設計嘅溜冰場。除咗可以喺度溜冰之外，亦設有唔同嘅專業課程例如花式溜冰以及冰球等課程畀大家報名。收費以平日以及假日劃分，人均港幣$75至$100不等，可以暢玩約三小時～
【INFO】 《LOHAS Rink》 收費：人均$75起 營業時間：星期一至日 10:00至22:00 地址：新界將軍澳康城路1號THE LOHAS康城2樓206-210 電話：2622 8400 官方網站：https://bit.ly/3Vux4C1
香港溜冰場2024 | 3. 愉景灣DB Ice Rink
愉景灣溜冰場係全港面積最大嘅溜冰場，佔地1,593平方米，同時亦係國際標準溜冰場，適合舉行唔同嘅賽事以及表演賽。擁有高水平嘅冰上設施以及世界級專業教練團隊，直接幫你將溜冰體驗昇華。平日公眾溜冰時段更可低至每人$65，而假日就為$85。
【INFO】 《愉景灣DB Ice Rink》 收費：人均$65起 營業時間：星期一至日 10:00至22:00 地址：香港大嶼山愉景灣愉景廣場地下 電話：2234 0187 官方網站：https://bit.ly/4bd4Bqa
香港溜冰場2024 | 4. 太古城中心冰上皇宮
太古城中心冰上皇宮喺2020年完成全面升級工程，為大家提供多元化嘅冰上活動。場內更設有溜冰鞋自助服務櫃以及電子儲物櫃，只要帶住手帶就可以輕鬆租借溜冰鞋以及存取物品，超方便。就算玩到肚餓都可以唔洗除溜冰鞋就可以輕鬆進出緊接冰面嘅餐廳享用美食！
【INFO】 《太古城中心冰上皇宮》 收費：人均$90起 營業時間：星期一至五 09:30至21:00；星期六 08:00至21:00；星期日08:00至20:00 地址：香港太古城太古城道18號太古城中心一樓 電話：2844 8688 官方網站：https://bit.ly/3XtINnc
香港溜冰場2024 | 5. 飛龍冰上樂園
位於西九龍中心嘅飛龍冰上樂園，設有17,000平方呎嘅真雪溜冰場，場地每節都係$80，無論平日定係假日都係一樣價錢，相當抵玩！再加上玩完之後附近都有唔少美食，隨時都可以掃街。除咗可以體驗溜冰之外，亦有冰球體驗課程畀大家報名參加，試試唔同運動！
【INFO】 《飛龍冰上樂園》 收費：人均$80 營業時間：星期一至五 10:30至21:00 地址：九龍深水埗欽州街37K號西九龍中心8樓 電話：2307 9264 官方網站：https://bit.ly/3VwulIn
香港溜冰場2024 | 6. 又一城歡天雪地
又一城歡天雪地相當適合小朋友第一次嘗試溜冰，除咗有得租借頭盔、保護用具以及溜冰鞋之外，亦可以選擇租用冰上小企鵝，咁就唔怕第一次玩嘅時候跌親啦，自然可以令小朋友增添自信同勇氣。不妨趁暑假嘅時候帶埋小朋友嚟消暑。
【INFO】 《又一城歡天雪地》 收費：人均$80起 營業時間：星期一至日10:30至20:00 地址：香港九龍塘達之路80號又一城UG-21號舖 電話：2844 3588 官方網站：https://bit.ly/3zeIxhu
香港溜冰場2024 | 7. 九龍灣Mega Ice
九龍灣Mega Ice擁有全香港最大海景，亦都係符合國際標準嘅溜冰場，近期更喺度舉辦亞洲最大冰球賽事「2024 Mega Ice五人冰球賽」，致力推廣本地冰上運動！Mega Ice更同時提供花式溜冰、冰球以及隊列滑等課程畀大家選擇，絕對要為小朋友嘅暑假提早制定計畫。
【INFO】 《九龍灣Mega Ice》 收費：人均$70起 營業時間：星期一至日 10:00至22:00 地址：九龍九龍灣宏照道 38 號MegaBox L10 電話：2709 4023 官方網站：https://bit.ly/4bnJnpT
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
