話咁快又到年尾,想喺香港感受最濃郁嘅聖誕氣氛?香港迪士尼樂園已經正式啟動冬季模式!今次仲玩到出年,由聖誕一路直落跨年再去到雪人節,真係入場幾次都唔夠喉!即刻同大家拆解今個冬天入園必玩、必食、必買攻略!
圖片來源:官方圖片|撰文:Sharon
聖誕氣氛越嚟越濃厚,香港迪士尼樂園已經正式啟動冬季模式,今年更特別邀得K-pop女團IVE成員張員瑛擔任亮燈嘉賓,聯同聖誕高飛喺漫天初雪下為冬日盛會揭開序幕!想喺香港感受最正宗嘅白色聖誕?今年樂園由傳統聖誕慶典一路無縫接軌玩到出年 3 月,配合香港人專享嘅「雙重暢玩」門票優惠,入園兩次就可以一次過體驗晒兩個截然不同嘅冬日主題節慶!
1. 「A Disney Christmas」聖誕慶典(即日起至2027年1月3日)
魔雪奇緣世界首辦冬日市集:成個阿德爾王國變晒雪白聖誕小鎮,大家可以去市集掃北歐風聖誕掛飾同針織精品,仲可以抽「阿德爾雪球彩蛋」換驚喜禮物。小白仲會戴住全新聖誕帽現身講聖誕故事,愛莎同安娜亦會隨時出沒大施冰雪魔法,現場飄雪氣氛滿分!
日夜城堡重頭戲:日間有全新「米奇與好友聖誕驚喜」城堡舞台騷,史迪仔更係第一次同大家過聖誕!入夜後美國小鎮大街有「夢想成真聖誕樹亮燈禮」,除咗漫天飄雪,仲有全新無人機圖案照亮夜空,打卡一流!
限定音樂會:指定週末(11月21-22日、12月5-6日)會有「迪士尼聖誕音樂 Live!」,除咗有香港鋼琴家張貝芝、涂毓麟聯同過百位香港兒童合唱團演出,《熊抱青春記》嘅紅熊貓美美同《奇幻魔法屋》嘅伊莎貝拉仲係首度登場!
2. 全新「小白暖心冬雪節」(2027年1月5日至3月24日)
過完聖誕唔使失落,出年1月魔雪奇緣世界會無縫接軌推出全新小白主題節慶!到時會有全新互動「小白笑說奇緣劇場」,一眾《魔雪奇緣》好友會親自現身同大家重溫回憶,仲有一系列冬雪節限定美食同精品等緊大家。
必試節日限定美食
掃街打卡:小鎮雪糕店嘅「聖誕樹造型抹茶軟雪糕泡芙」、人氣《反斗奇兵》薑餅屋爆谷桶,仲有小白系列嘅叉燒包、冬日窩夫、小雪人熱朱古力同聖誕小雪人包,造型超可愛!
Chill 住嘆:阿德爾港畔餐廳有愛莎同安娜靈感嘅「雙人三層下午茶」;大冒險家餐廳嘅聖誕自助晚餐仲包埋「星夢光影之旅」指定觀賞專區門票,唔使逼就可以睇到煙花匯演!
聖誕掃貨推介
今期必搶全新拼布風Duffy與好友系列、聖誕版史迪仔同小金公仔,仲有香港迪士尼獨家商品。想試手氣可以去玩「迪士尼奇妙彩蛋樂」或者鋼牙奇奇與大鼻帝帝幸運淘金桶抽限定公仔;想做善事亦可以買聖誕心願慈善明信片,收益會全數撥捐「愛心聖誕大行動」及「願望成真基金」。
香港人專屬優惠&小貼士
「雙重暢玩」門票優惠:香港居民憑港幣$879(成人價),可以喺2027年3月31日或之前入園兩次,仲送埋餐飲優惠券!計返條數除開每次四百幾蚊,聖誕入一次、出年1月再入去玩小白冬雪節就啱啱好!
Visa卡友優先:Visa持卡人喺2026年12月14日至2027年1月4日期間,仲可以優先預訂「迪士尼尊享卡 – 小白笑說奇緣劇場及森林小天地」同埋系列套票優惠。
快啲約埋你想一齊去過白色聖誕嘅朋友或者另一半,入去迪士尼感受冬日魔法啦!
——————————————————
Follow 我哋睇更多最新情報!
Facebook – SAUCE – 為生活加一點味道
Instagram – @sauce.media.hk
YouTube – @saucemediahk





