海港城聖誕 | 由日本微型攝影藝術家田中達也（Tatsuya Tanaka）打造出嘅「The Big Little Christmas」大型戶外聖誕裝置，將聖誕主題嘅微模型按比例放大，就連聖誕木屋都有5米高，好似行咗入去一個聖誕巨人國一樣～即刻入內文睇詳情啦！
圖片來源：官方圖片 | 撰文：Hedy
海港城再度與超人氣日本微型攝影藝術家田中達也（Tatsuya Tanaka）合作，打造出大型戶外聖誕裝置「The Big Little Christmas」，仲有微模型展覽「Countdown to Mini-mas」，等大家都可以一齊行入巨人國慶祝聖誕！田中達也擅長將隨處可見嘅日常物品或食物，變成微模型場景，為大家帶嚟佢第一個以聖誕為主題嘅藝術活動！
海港城聖誕 | 10米高聖誕樹
當大家行入海港城海運大廈露天廣場，就會見到28米長嘅聖誕老人工作枱，枱上面更放置咗多件田中達也嘅創作，每一件更按比例巨大化。而喺聖誕老人工作枱嘅另一邊更有由聖誕帽扮演嘅10米高聖誕樹，超啱大家打卡！仲有由士的糖拼合聖誕掛飾而成嘅雪橇，超得意～
海港城聖誕 | 5米高巨型聖誕木屋
最矚目嘅更有5米高嘅巨型聖誕木屋，大家仔細一睇就會發現其實係由一本本書堆疊而成嘅小屋。另外亦有8米高嘅巨型木製聖誕倒數月曆，每一格盒仔入面都隱藏著唔同嘅聖誕小禮物，例如巨型聖誕波波裝飾、冬青、聖誕樹頂上嘅星星等。成條樓梯都佈滿咗銀色閃閃聖誕樹同聖誕禮物，一齊過一個愉快嘅聖誕！
海港城聖誕 | 「Countdown to Mini-mas」微模型展覽
欣賞完咁靚嘅大型戶外聖誕裝置「The Big Little Christmas」之後，海港城美術館會同期舉行「Countdown to Mini-mas」微模型展覽。展覽結合田中達也嘅《MINIATURE CALENDAR》同聖誕倒數月曆，以25件全新創作嘅微模型，同大家一齊倒數聖誕～海港城美術館亦放大咗膠紙座雪橇，等大家都可以打卡。有興趣嘅朋友就記得要去埋展覽欣賞田中達也嘅藝術品！
【INFO】 「The Big Little Christmas」戶外聖誕裝置 日期：2024年11月16日至1月1日 時間：10:00至22:00 地點：海運大廈露天廣場 「Countdown to Mini-mas」微模型展覽 日期：2024年11月16日至1月1日 時間：11:00至22:00 地點：海港城美術館（海洋中心二階207號舖）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
