海洋公園哈囉喂 | 今個10月，香港海洋公園哈囉喂全園祭，以九龍城寨最心寒嘅靈異故事「鬼媽媽煮飯」情景為創作靈感，帶大家闖入厲鬼圍城，當中更有6大驚嚇體驗，務求令你體驗港式恐怖，相信尖叫聲將會源源不絕！
圖片來源：官方圖片 | 撰文：Hedy
香港海洋公園哈囉喂全園祭帶大家體驗港式恐怖，除咗80年代最心寒嘅都市傳說「鬼媽媽煮飯」再現之外，更以當年嘅情景為創作靈感，打造出6大驚嚇體驗！以全新互動元素帶你探索靈異區域，隨時令你心寒指數直線上升，即刻睇睇有咩咁驚！
哈囉喂全園祭 | 1. 城寨詭域（驚嚇指數：5/5)
當你行入陰森神秘嘅城寨詭域，發現已拆卸嘅舊城寨突然重現人間，三不管地帶已被厲鬼圍城。見到巨型戲棚花牌忽明忽暗，就知道此行諸事不祥。昔日嘅居民將會化作惡鬼，將會喺横街窄巷嘅角落等緊大家。就連陰魂不散嘅住客都會喺樓上注視你嘅一舉一動，無牌診所更傳出尖叫聲同刺耳嘅機器聲。小心隨時被捉去做活人臨床實驗，甚至被陰靈纏身！
哈囉喂全園祭 | 2. 亡幽酒店（驚嚇指數：5/5)
荒廢多年嘅懷舊酒店即將重新開幕，更會舉行一場盛大嘅化妝舞會，當中只有獲邀請嘅貴賓先可以參加。但原來背後竟然係一場由殺手組織嘅殺戮計劃？一班以小丑打扮嘅神秘人將會現身，大家記得要攞好酒店嘅房卡，因為呢個係大家唯一嘅保命符，否則隨時被困喺恐怖嘅酒店入面走唔到……
哈囉喂全園祭 | 3. 冥府婚宴（驚嚇指數：5/5)
慶祝人哋結婚，隨時變成自己婚禮？城中大地主嘅仔女同時舉行婚禮，邀請咗親戚朋友赴宴，不過好多人登門拜訪之後都銷聲匿跡？更有傳聞指地主一家早喺一年前已經被仇家滅門，舉辦婚禮只係為咗為仔女尋找玩伴，你又會唔會成為下一位被消失嘅人選？
哈囉喂全園祭 | 4. 囚．逃（驚嚇指數：5/5)
城寨之外驚爆大規模「囚．逃」，班囚犯正密謀逃獄。不過由於呢座監獄入面都係極級重犯，所以守衛森嚴，再加上獄卒個個都心狠手辣，所有人有入冇出！而每個人入獄時都要拍低入獄照記錄在案，幾乎全面監控大家。而為咗逃出監獄，大家都決定趁入黑交更突破防線，機會只得一次！一旦失敗被捉就要接受殘酷極刑。
哈囉喂全園祭 | 5. 凶靈宅院（驚嚇指數：4/5)
踏入凶宅你又驚唔驚呢？今年嘅試膽大會將會喺一間荒廢已久嘅日式小屋舉行，據聞呢度曾經發生過多宗命案，歷年眾多嘅試膽者更係有入無出，你又敢唔敢踏入去呢？手中嘅白蠟燭將會引領你一步步行入去，你將會親眼見到血淋淋嘅兇案，隨時嚇到你失聲尖叫！
哈囉喂全園祭 | 6. 724禁地（驚嚇指數：4/5)
廢棄嘅「724 禁地」不時都有轟隆隆嘅機器聲傳出，甚至更會聽到女人嘅尖叫聲，所以時不時都會吸引探靈愛好者前去探索，不過經常性一去不返？相傳呢個廢棄工廠係因為當年一場工業意外令工廠老闆痛失妻兒，從此無心打理廠房，其後就變咗一個熱門嘅探險之地。為咗搜救探險者，大家都要記得戴好頭燈，究竟真係有鬼作怪，定係另有內情？
哈囉喂全園祭 | 十大嘩鬼匯演
除咗有得玩呢6大驚嚇體驗之外，仲有全城矚目嘅十大嘩鬼匯演，大展火熱勁舞之外，晚安女王亦會現身震懾全場，仲有首次登場嘅Oppa猛男將會帶嚟狂野演出，等大家都可以渡過一個又驚又喜嘅晚上～當然唔少得一眾嘩鬼出巡同大家見面打卡同嚇各位～
哈囉喂全園祭 | 門票價錢
如果大家都想體驗海洋公園哈囉喂，就首先需要持有海洋公園入場門票或全年會籍，當中成人入場門票價錢為$428，小童$239。然後就要再額外畀錢購買「圍城三館：城寨 · 酒店 · 凶宅」及「厲鬼三煞：冥婚 · 監獄 · 禁地」門票，當中非高峰日子 （適用於2024年10月11-13日；11月1-3日）$238，高峰日子(適用於2024年10月18-20日；25-27日；31日）$280。海洋公園全年會員可享哈囉喂景點組合門票9折優惠 ！
【INFO】
《海洋公園哈囉喂》
日連夜驚嚇體驗：2024年10月11至13、18至20、25至27、31日及11月1至3日
開放時間：10:00至23:00
購買門票：https://bit.ly/4759VLG
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
