自從近年可以令香港人有共同回憶嘅地方變得越黎越少，唔少人都開始鍾意搵D懷舊風嘅cafe同打卡位，最近尖沙咀就有個超懷舊嘅新商場「廣東捌拾」開幕啦～整個商場都以舊香港作為賣點，場內佔地逾2萬呎，樓高3層，充滿濃厚復古感覺！「廣東捌拾」入面除左有大量懷舊佈置，仲有超級市場、恐怖推理遊戲互動館同人氣小食店，又有得玩又有得食，毛孩都一樣入得去，大家有時間不妨去行下～
圖片來源：IG@cantonyama、hotdoglink 、cheungchaucorner、chashou.hk、mr.simbab｜撰文：Candice
1/F懷舊竹棚街購物區 以後唔洗山長水遠都可以飲到「長洲角酪」！
一入到商場，懷舊嘅感覺已經強烈襲來，懷舊嘅竹棚街購物區超有特色，配上港式用語霓虹燈牌，大家可以係度瘋狂打卡～ 另外通常亦設有戲棚巨型花牌同懷舊香港場景打卡牆比大家宛如時光倒流，回到當年今日，一齊懷緬舊香港嘅美好！
就連毛孩都笑得咁開心，大家都千祈唔好錯過呢個咁靚嘅打卡位啦！
1樓除左有大量舖頭比你shopping，仲有幾間人氣小食店等緊你～ 當中包括有何文田人氣熱狗店「Hot Dog Link」、長洲乳酪飲品店「長洲角酪」 同主打黑糖珍珠奶茶嘅茶匠。
德國熱狗hotdoglink係香港首間傳統德式熱狗專門店，佢其他分店嘅裝修一向行懷舊路線，今次進駐cantonyama商場更加係錦上添花～熱狗方面完全係大件夾抵食，淨係望相都見到d cheese多到漏啦！熱狗有多種口味，鍾意食辣可以選擇墨西哥辣腸、柏林辣椒腸等；怕辣的話就可以揀香葱豬柳腸、脆皮煙肉火腿，就連醬料都有5款配搭，食落相當惹味！
「長洲角酪」一向出名，有去長州幫襯過嘅朋友都會知道有幾正，其中甘露角酪為店內招牌之一，加入芒果、紅西柚及鮮柚製成，層次豐富有口感，記得飲前要攪拌均勻。而家店舖係尖沙咀開左分店，以後大家唔洗山長水遠入長州先飲到，行過記得快d入黎買翻杯嘆下啦～
講到野飲，另外又點少得本地手搖茶飲店呢，「茶匠」雖然主打黑糖珍珠奶茶，但亦有提供好多唔同款式嘅果茶、沙冰、奶蓋同蘇打等等，夏天行過入黎買翻杯消消暑簡直一流！
2/F 繼續買買買！超級市場mini MART設有10大主題區 提供過百款零食/酒類產品
係一樓行完本地創作品牌，二樓仲有個6,000呎大嘅超級市場mini MART！市場設有10大主題區，包括日本零食區、美妝區、兒童玩具區、酒區等；其中酒區供應超過200款清酒及梅酒，就連日本拉麵款式同零食都有好多，就算係尖沙咀都唔一定要逼Donki先可以買到日本嘢～
3/F設恐怖推理館 大熱「劇本殺」桌遊遊戲實體化變成真實場景
除左食同買，玩方面仲有而家時下年輕人最鍾意玩嘅劇本殺！劇本殺其實係源自於韓國嘅一種桌遊，玩家們通過分飾劇本中嘅角色，圍繞劇本中案件展開推理、還原人物關係、挖掘證據，最後搵出兇手。過程有趣又燒腦，而家去cantonyama三樓嘅恐怖推理館「第二人生體驗館」，就可以同一班朋友一齊按此挑戰～
【INFO】
CANTONYAMA 廣東捌拾
地址：尖沙咀廣東道68-80號
相關文章：
【北角皇都戲院重溫歷年電影歷史！50年代舞台/懷舊海報/老戲院場景帶你回到過去】
【香港都有！】頭文字D藤原豆腐店 神還原漫畫場景 秒變車迷打卡新熱點
