香港室內好去處 | 準備踏入夏天,相信大家都會計劃定一系列戶外活動,同親朋好友盡情玩樂,但夏天亦代表雨季來臨,如果放假時撞正落雨,不妨轉場去以下小編推介嘅室內運動遊樂場,唔單止有完善嘅娛樂設備,仲可以喺室內滑浪,即睇以下介紹啦!
圖片來源:Jibbing Park、Ryze Hong Kong、Hong Kong Climbing Park、Super Sports Park、Snow & Surf、浪谷、Verm City、Rollalar | 撰文:Icy
香港室內運動遊樂場 | 1. Flowski室內旱雪運動場
位於黃竹坑嘅Flowski係全港首個室內旱雪運動場,就算喺香港都可以感受滑雪嘅樂趣。全場佔地過萬呎,總共設有四個區域,包括衝浪、滑雪、餐廳以及遊樂場,無論大人定一家大細都適合~若果初學者參加恆溫滑浪體驗,會由專業教練從旁指導,學習基本功及姿勢,訓練平衡力,咁玩起上嚟就會更加得心應手啦~
【INFO】
Flowski
地址:黃竹坑業勤街39號Landmark South 2樓
營業時間:星期一至日 08:00-22:00
價錢:滑水 $380/55分鐘、滑雪機 $1180/55分鐘、花式雪道 $380/55分鐘
官方網站:Flowski
香港室內運動遊樂場 | 2. Ryze Hong Kong彈床遊樂場
小朋友最鍾意周圍扎扎跳,而位於鰂魚涌嘅彈床樂園Ryze Hong Kong就可以提供安全又多元化嘅彈床玩樂空間。全場佔地超過18,000平方呎,空間非常廣闊,並設有多個彈床關卡,例如障礙訓練場、平衡木、攀石牆、韆鞦、海綿池等等,除咗刺激有趣,仲可以有效地減壓同消耗卡路里~
【INFO】
Ryze Hong Kong
地址:香港鰂魚涌渣華道321號柯達大廈1期3樓
營業時間:星期一至四 10:00-20:00 / 星期五至日 09:00-21:00
價錢:成人每小時$210、兩小時$315 / 6歲以下兒童每小時$135、兩小時$210
官方網站:Ryze Hong Kong
香港室內運動遊樂場 | 3. Hong Kong Climbing Park攀石遊樂場
Hong Kong Climbing Park室內攀石遊樂場佔地達25,000呎,設有10米高嘅攀石牆、8至10米嘅高牆攀爬路線,以及4米室內抱石路線。場館仲會特別為攀石初學者及兒童舉辦高牆攀石及抱石入門班,教授基本安全知識及技巧,就算新手都可以喺專人協助下體驗攀石嘅樂趣~
【INFO】 Hong Kong Climbing Park 地址:香港沙田大涌橋路52號富豪花園二期商場2樓 / 香港元朗康業街8號朗壹廣場地下G14-15號舖 營業時間:星期一至五 14:00-22:00 / 星期六日 11:00-20:00 價錢:每人$218起(2小時) 官方網站:Hong Kong Climbing Park
香港室內運動遊樂場 | 4. Super Sports Park
位於奧海城附近嘅Super Sports Park,佔地超過50,000呎,提供達20種充滿挑戰性嘅遊戲關卡,例如攀岩牆、空中飛索、滾輪溜冰場、滑板障礙場、彈床樂園等,考驗參加者嘅平衡力及專注力。另外亦設有一系列嘅運動設施,包括投籃、足球等,適合所有年齡層嘅朋友。玩到攰仲可以於場內餐廳補充能量,品嚐各式各樣嘅輕食同甜點。
【INFO】
Super Sports Park
地址:大角咀海輝道18號銀海坊 G03&05
營業時間:星期一至日 10:00-21:00
價錢:每人每個時段$120起(一個時段為3小時)
官方網站:Super Sports Park
香港室內運動遊樂場 | 5. Snow & Surf
Snow & Surf主要提供室內滑雪及室內衝浪體驗課程,場內設有香港首個滑雪賽道,以及雙滑道衝浪機,參與者可以因應自己喜好同程度,調節唔同輸出程度,無論臥式定係站立式都可以滿足到唔同人嘅要求。初學者仲可以喺教練指導下,學習基本技能,並且確保安全~
【INFO】 Snow & Surf 地址:葵涌葵秀路8-10號瑞森工業大廈2樓 營業時間:星期一至五 12:00-22:00 / 星期六日 10:00-22:00 價錢:衝浪每人$398(55分鐘)、滑雪每人$398(55分鐘) 官方網站:Snow & Surf
香港室內運動遊樂場 | 6. 浪谷
有冇諗過喺商場都可以玩衝浪?位於啟德Airside嘅浪谷係全港首個室內衝浪餐廳,佔地過萬呎,大家可以參加衝浪體驗班,由專業教練帶領,感受滑板及直立式衝浪嘅刺激同樂趣。場內設有完善嘅更衣室同休息區,玩完衝浪可於餐廳品嚐美味泰國菜,醫飽個肚~
【INFO】
浪谷
地址:香港啟德協調道2號AIRSIDE 6樓
營業時間:星期一至日 11:30-22:00
價錢:衝浪體驗每小時$500
官方網站:浪谷
香港室內運動遊樂場 | 7. Verm City室內抱石場
如果放假想帶埋小朋友出街放電,位於鰂魚涌嘅室內抱石場Verm City就適合不過啦~全場佔地約20,000呎,設有4.5米高嘅攀石牆、達19種刺激有趣嘅攀爬關卡,仲有兒童攀爬專區,有專業教練駐場,讓小朋友都可以安全地體驗攀石嘅樂趣。另外亦設有攀石主題樂園Clip N’ Climb,當中最矚目一定係高6.5米嘅垂直滑梯,滑落去時充滿離心力~
【INFO】
Verm City
地址:香港七姊妹渣華道321號 4樓
營業時間:星期一至五 11:00-23:00 / 星期六日 09:00-21:00
價錢:每人Day Pass $280以上
官方網站:Verm City
香港室內運動遊樂場 | 8. Rollalar滾軸溜冰場
有冇諗過做運動都可以打卡,影出時下流行嘅Y2K相呢?位於觀塘嘅Rollalar滾軸溜冰場,以港式復古風格設計,唔單止有銀色disco波波同七彩繽紛嘅射燈裝飾,更不時有駐場DJ打碟,令滾軸溜冰場搖身一變潮流的士高,打卡一流。初學者可以預約滾軸溜冰體驗班,有導師專門指導,仲可以租用專業滾軸溜冰鞋同護膝,咁就唔使驚玩到「一仆一碌」啦!
【INFO】
Rollalar
地址:香港牛頭角鴻圖道28號6樓
營業時間:星期一至五 13:45-22:15 / 星期六日 11:45-22:15
價錢:成人$180(2小時) / 兒童$145(2小時) / 30分鐘基本教學指導$110
官方網站:Rollalar
Follow 我哋睇更多最新情報!
Facebook – SAUCE – 為生活加一點味道
Instagram – @sauce.media.hk
YouTube – @saucemediahk