國慶好去處2024 | 為慶祝國慶75周年，全港將會舉辦超過400項慶祝活動，當中小編已經幫大家整合咗國慶7大好去處，除咗可以欣賞到煙花匯演之外，亦分別有2大無人機表演，仲有15個地方免費入場，即刻睇睇國慶活動有咩好去！
圖片來源：官方圖片 | 撰文：Hedy
國慶好去處 | 1. 維港「香港馬騰盛世」無人機表演
今個星期六維港夜空將會率先上演無人機表演，共1,500架無人機將會點亮灣仔夜空。「香港馬騰盛世」無人機表演，演繹出國畫大師徐悲鴻4幅藝術作品，將香港本地特色場景加入75周年國慶元素交織而成，展現其筆下嘅曠世駿馬、飛躍雄獅及紫荊綻放等傑作！
【INFO】
《「香港馬騰盛世」無人機表演》
日期：2024年9月28日
時間：20:00
地點：灣仔海濱 (灣仔渡輪碼頭畔主題區及HarbourChill海濱休閒站一帶)
國慶好去處 | 2. 西九文化區 無人機表演
喺國慶前一個晚上，西九文化區將會有無人機表演，以2099架無人機拼出75周年元素嘅圖案。除咗無人機數目破紀錄之外，圖案更融合咗2024年同國慶75周年兩項元素，絕對會令大家睇到相當驚喜！
【INFO】 《西九文化區 無人機表演》 日期：2024年9月30日 時間：20:30 地點：西九文化區
國慶好去處 | 3. 熊貓綵艇
多艘傳統舢舨將化身為閃亮繽紛嘅熊貓綵艇，喺香港仔避風塘來回穿梭。大家可以體驗坐上綵艇之外，仲可以欣賞賣避風塘迷人嘅夜景，享受歡樂嘅氣氛。香港仔避風塘亦都會有一艘帶國旗、區旗同熊貓嘅大型中式帆船巡遊。而海濱公園兩旁更布滿慶祝75周年嘅燈飾、花卉燈籠、閃爍天幕同75隻可愛熊貓。
【INFO】 《熊貓綵艇》 日期：2024年9月30日至10月1日 時間：18:30至21:00 地點：香港仔海濱公園
國慶好去處 | 4. 國慶煙花匯演
為慶祝中華人民共和國成立75周年，維多利亞港上空將會舉行華麗璀璨嘅煙花匯演，亦係首次加入無人機表演！煙花匯演將會喺維多利亞港上空上演，將分為8幕歷時23分鐘，由九艘船合共發放 31,888 枚煙花，大家將會睇到心心相印、笑臉圖案以及竹葉等圖案。
【INFO】 《國慶煙花匯演》 日期：2024年10月1日 時間：21:00 地點：中環與尖沙咀之間嘅維多利亞海港海面
國慶好去處 | 5. 幻彩詠香江 國慶特別版
有唔少遊客嚟香港嘅時候都會觀賞「幻彩詠香江」，而今個10月「幻彩詠香江」將升級為慶祝中華人民共和國成立75周年國慶特別版。除咗有更多射燈同燈光效果加強之外，仲會喺維港兩岸嘅大廈屏幕加入多款動態圖案同國慶祝賀語句，絕對會令大家目不暇給！未睇過嘅大家就一定要去體驗吓，足足有成一個月嘅時間！
【INFO】 《幻彩詠香江 國慶特別版》 日期：2024年10月1日至31日 時間：晚上8時 地點：維多利亞港兩岸
國慶好去處 | 6. 14間博物館免費開放
所有康文署轄下嘅博物館及藝術空間均免費入場（香港太空館天象廳節目除外），當中包括香港藝術館、香港科學館、香港太空館、香港文化博物館、香港歷史博物館、香港電影資料館、香港鐵路博物館、羅屋民俗館、上窰民俗文物館、茶具文物館、香港抗戰及海防博物館、葛量洪號滅火輪展覽館、李鄭屋漢墓博物館以及三棟屋博物館。各間博物館當日會向首75名入場參觀人士派發紀念品。
國慶好去處 | 7. 濕地公園
為慶祝中華人民共和國成立75周年，香港濕地公園將於2024年10月1日免費開放，大家只需要直接經訪客中心進入公園，無須預約或購票！
【INFO】
《濕地公園》
日期：2024年10月1日
時間：10:00至17:00
地點：新界元朗天水圍濕地公園路
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
