中環夏誌 | 放假去邊好？一年一度嘅《SummerFest@Central 中環夏誌》已經喺中環海濱活動空間舉行，免費入場可以同五大巨型世界奇觀打卡。仲有中環夏日運動祭等大家嚟參加！即刻睇睇有咩玩啦！
圖片來源：Facebook@SummerFest.hk 夏誌 | 撰文：Hedy
中環海濱年度盛事一連38日，將會喺約3萬平方米嘅戶外空間，以「 充氣奇蹟」為主題舉辦一連串戶外活動，圍繞運動、文化以及音樂3方面。相信當中最矚目嘅絕對係受國際知名AI 藝術家、「充氣奇蹟」設計者@joooo.ann嘅作品靈感啟發，所設計出嘅五大世界奇蹟打卡位，當中包括「英國巨石陣」、「智利復活島摩艾石像」、「埃及吉薩金字塔」、「意大利比薩斜塔」及「法國凱旋門」，純白設計代表簡潔、高貴以及清雅，瞬間帶你遊歷世界。除咗可以畀大家打卡之外，「英國巨石陣」更係充氣彈床，啱晒小朋友放電！就連夜晚都會亮起幻彩燈光超夢幻。
中環夏誌 | 美人魚夏水禮
相信炎熱嘅天氣大家都想要降溫，中環夏誌亦會舉辦美人魚夏水禮，等小朋友可以一試美人魚造型體驗。「Mermazing 美人魚夏水禮 – Make a Splash 」將會帶嚟連場水戰及不少噴水裝置，令大小朋友都盡情投入，濕身而回。而星期日更有「Bubble Troubles」，將中環海濱變成泡沫世界，等大家一齊Enjoy多個歌舞活動！
中環夏誌 | 中環夏日運動祭
中環夏日運動祭會由即日起至8月11日舉行！大會逢星期五、六舉行多場5KM歡樂跑，逢星期日則有多場2KM米親子跑，穿梭中環及灣仔海濱長廊，沿途欣賞維港美景。活動仲會舉辦多種新興運動體驗班及模擬比賽，分別有源自瑞士、有「君子球」之稱嘅巧固球、混合網球、羽毛球、桌球嘅匹克球、躲避盤、欖球等，咁大家就可以即場體驗呢啲新興運動。
日期：巧固球體驗 (7月5日-7月12日) 、欖球體驗 (7月13日-7月21日) 、匹克球體驗 (7月22日-7月31日) 、躲避盤體驗 (8月1日-8月11日)
中環夏誌 | 毛孩寵寵清涼跑
帶小朋友過嚟放電絕對一流！一家人玩嘅同時都可以帶埋毛孩一齊，除咗有毛孩用品市集可以畀大家買嘢之外，亦有寵物跑比賽、放電水戰區、毛孩水池以及育犬心得講座等。毛孩都可以一次過係度玩得盡興，現場仲會有夏威夷小結他演奏、木箱鼓免費試玩及音樂表演，等「主子」同大家都可以盡情享受藝術氣息同戶外氛圍。
中環夏誌 | 25大免費活動
除咗以上3大活動之外，亦都有22大免費活動痛節目等大家入場玩，當中包括「2024 夏日藝術體操節」、「香港兒童平衡車嘉年華2024」、「中西區閃避球比賽暨閃避球」、「GrooveFest夏日舞蹈大匯演派對」、「頌夏棒球節 – 五人制棒球運動會」等等，一連38日都有咁多精彩活動，仲要係免費入場超正呀！
【INFO】 《SummerFest@Central 中環夏誌》 日期：即日起至2024年8月11日 時間：星期一至五15:00至21:00 ; 星期六至日13:00至21:00 地點：中環海濱活動空間 (龍和道9號) 入口：近添馬公園 / 中環10號公眾碼頭
延伸閱讀：【暑假20大好去處、4萬8千呎沙灘玩水+巨型充氣樂園！（持續更新 】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
