疫情關係，近呢一兩年大家都避免去人多嘅地方，唔少人就改咗去行山，或者發掘香港未知嘅新景點同朋友、另一半打卡影相！今日小編要同大家分享香港5個打卡推薦，唔知道以下呢啲地方你哋又去過未呢？一齊Click入內文睇下有咩好景點，放假約埋朋友一齊去啦！
圖片來源：IG@paperhillhill、mawanpark、IG@thehkcouple、IG@jmjamjj、IG@eatwithwings、IG@kongpigation、IG@heyman_lam、IG@yue0227、SAUCE編輯部｜撰文：Sharon
1. 天后廟道3號花園
有冇人每年去旅行都一定會去日本？雖然疫情期間大家唔可以搭飛機去旅行，但各位可以嚟到位於炮台山嘅天后廟道3號花園，一解思鄉之情！呢度日本小屋之外，周圍都充滿日系元素，小屋配上仿紙門，隔嚟仲有石橋，超有日本和風庭園嘅感覺，唔講唔知仲以為去咗日本添！
前往方法：炮台山港鐵站A出口，向天后方向沿康福臺步行至天后廟道，再向山頂方向步行即可到達。
2. 馬灣公園
如果想遠離市區，去遠少少可以去馬灣公園，入面有多個影相位，包括花花墜道、古堡鐵閘同鳥望台，被色彩繽紛嘅鮮花同綠色植物包圍住，影相一定勁有feel～ 不過而家因疫情關係，公園暫時停止開放，希望可以放啲重開去打卡啦！
地址：香港新界馬灣田寮村45號
前往方法：青衣站C出口之青衣巴士總站乘搭來往青衣及珀麗灣之巴士到馬灣公園
開放時間：上午10:00至下午6:00 (最後入場時間：下午5時)
3. 流水響
秋冬最多人會去行山嘅地方一定有流水響，新手都超適合行嘅行山路徑，想做文青山系Yama Girl不妨嚟呢度，就連同男朋友一齊去行都無問題！
前往方法：粉嶺站C出口外乘搭52B綠色專線小巴，於流水響道與鶴藪道嘅交匯處下車，沿流水響道步行至流水響水塘郊野公園入口。
4. 荔枝角愛麗絲花園
荔枝角除咗嶺南之風，原來仲有一個隱世打卡位，因為好似愛麗絲夢遊仙境嘅場景而被稱為「愛麗絲花園」！ 藍白色小屋、白色鞦韆，再加上心形花草拱門，充滿歐陸色彩，好似置身喺童話世界一樣。
前往方法：美孚站D出口（近西鐵站），向左轉內極限運動場一直行，愛麗斯花園於運動場旁。
5. 海下遊客中心
位於西貢嘅海下遊客中心係香港首個以海岸公園為主題嘅遊客中心，設計以簡約木色風為主，有多個打卡位添，包括日式小庭院、草坪木櫈，仲有一個樓梯斜坡都好啱影相，想做文青girl嘅你哋一定唔可以唔嚟呢個地方啊！
地址：西貢海下路333號
開放時間：
1. 展覽廳：星期一、三至日及公眾假期上午九時半至下午四時
2. 接待處：星期一、三至日及公眾假期上午九時半至下午四時半
（草地、公共廁所：24小時開放）
相關文章：【信芯園農莊重開！變日本鳥居花海 紫藤花隧道/玫瑰牆打卡/油紙傘】
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
