踏入9月份，天氣漸漸轉涼，大家係咪開始聞到秋天嘅味道呢？每到秋天一定唔可以錯過秋天限定滿山遍野嘅金黃芒草，其實遠足新手想睇芒草嘅話，未必要去大東山，小編就為大家推介香港6條新手輕鬆賞芒郊遊熱門郊遊路線，路線平坦，全程亦只需3小時。路程咁輕鬆，冇理由唔去啦！
圖片來源：Instagram @lazy.janejane、@oliviamak、@shanna_ma、@ac.yan_0422、@my_uncle_dog、@icy.tso｜撰文：Icy
香港芒草新手郊遊路線｜1 – 昂坪彌勒山
位於昂坪嘅彌勒山郊遊徑全長只有5公里，路線並唔崎嶇，而且最快3小時就完成整段路程，因此適合新手上路。大家可以於東涌港鐵站B出口出發，乘坐纜車到昂坪，然後往昂坪戴維斯青年旅舍方向走，就會到達郊遊徑入口。
郊遊徑沿路有好多樹蔭，四周嘅樹木生長得好茂密，對怕曬嘅朋友好友善。離開樹群之後，視野就會變得廣闊，仲能夠遠眺大東山同鳳凰山。每當11月尾進入芒草季節時，山頭就會染成白茫茫一片，打卡一流！離開時大家可以選擇經昂坪360救援徑去到昂坪市集，或者返回青年旅舍。
前往方法：於東涌港鐵站B出口出發，乘坐纜車到昂坪，然後往昂坪戴維斯青年旅舍方向走，就會到達郊遊徑入口
香港芒草新手郊遊路線｜2 – 鯉魚門三家村石礦場
有逾150年歷史嘅鯉魚門三家村除咗充滿漁村風情，有避風塘同各式各樣嘅海鮮飯店外，每到秋天仲可以欣賞盛開嘅盧葦草。盧葦草同芒草外觀非常接近，只係盧葦草多生長於水邊和濕地。大家所以行入滂湃嘅蘆葦草田，同樣可以影到超靚嘅打卡相！
要到鯉魚門三家村，大家需要於油塘港鐵站A2出口出發，步行去到鯉魚門牌坊。之後再沿住海鮮街直入，經過一排村屋及天后廟就到了。村內保留咗舊有嘅平屋建築，沿路有壁畫、許願樹等特色景點，令人腳步都慢咗落嚟。盧葦草田位於天后廟後面嘅石礦場，路勢並唔陡峭，只有少量石級。石礦場旁邊係蔚藍嘅大海，坐係度聽住海浪好寫意，仲可以眺望對岸嘅景色㗎！
前往方法：於油塘港鐵站A2出口出發，步行約20至30分鐘
香港芒草新手郊遊路線｜3 – 粉嶺坪洋村
位於粉嶺嘅坪洋村，接近大自然，風景唯美，交通亦好便利，所以一向都係香港人欣賞芒草嘅熱點。大家可以由粉嶺港鐵站轉乘52K小巴，於「九記士多站」落車，步行大約3分鐘就會見到坪輋壁畫村入口。壁畫村當中色彩繽紛嘅壁畫同裝飾品，都係由村民一手一腳建設出嚟，沿路亦有好多可愛嘅手繪路牌，所以大家要好好愛護呢啲藝術品呢！
要到達芒草田，需要喺卓榮記士多附近，沿公廁右邊上坡。沿途會有踏步徑同安全嘅石梯，所以遠足新手唔使擔心。涼亭後面就係一大片芒草田，生長得好茂盛同大株，黃昏時分仲可以欣賞夕陽同金黃芒草互相輝映嘅美景！
前往方法：由粉嶺港鐵站轉乘52K小巴，於「九記士多站」落車，步行大約3分鐘到達坪輋壁畫村入口。
香港芒草新手郊遊路線｜4 – 河背水塘
位於元朗嘅河背水塘，除咗有大小皆宜嘅家樂徑同香港面積最細嘅灌溉水塘，秋天時分仲會盛開芒草。環塘嘅路段平坦易走，甚少斜路，所以好適合新手上路。
大家需要由元朗泰衡街乘搭71號小巴，於「河背村總站」落車，然後由河背村入口出發，步行大約30分鐘，就會見到一大片芒草。附近群山環繞，每當日落時分，夕陽嘅光輝就會映照係水面上，加上芒草美景，悠閒嘅大自然氣息好有寫意嘅感覺！
前往方法：由元朗泰衡街乘搭71號小巴，於河背村總站落車，然後由河背村入口出發，步行大約30分鐘。
香港芒草新手郊遊路線｜5 – 深涌大草原
位於西貢嘅深涌有一片廣闊嘅大草原，大家可以由沙田市中心乘搭299X巴士，於水浪窩站落車，然後往「榕樹澳」方向一直向前行。由於路程起伏較少，大部份都係石屎路，沿途又有可供遠足人士歇息嘅休息點，所以新手唔需要擔心太難行。
大家係一路上都可以欣賞海景，經過來記士多同深涌碼頭之後就會到達大草原。呢度群山環繞，配上平靜嘅湖水，好似置身係童話世界入面。大家仲有機會可以睇到芒草海，景觀開揚優美，好適合係度野餐，度過悠閒下午！
前往方法：由沙田市中心乘搭299X巴士，係水浪窩站落車，然後往「榕樹澳」方向一直向前行。
香港芒草新手郊遊路線｜6 – 欣澳楓香林
每逢秋天，欣澳楓香林除咗可以睇紅葉，其實仲可以睇到芒草，一次過滿足兩個願望！前往方法非常簡單，只需要由欣澳港鐵站出發，沿住右邊海旁步行大約30分鐘就會到達，全程大部份都係平路，啱晒一家大小去郊遊！
海堤沿路會有一條長長嘅鐵路，配上一望無際嘅海景，有種身處日本嘅感覺！芒草就係位於海堤一旁，係燦爛嘅陽光照射下特別迷人，大家可以一路行一路隨時隨地影相。而行入少少就能夠欣賞楓香樹，雖然數目唔算多，但勝在人流比較少，任何角落都可以影到靚相！
前往方法：由欣澳港鐵站A出口出發，步行大約30分鐘就會到達。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
