香港夜景好去處 | 當朋友過嚟香港玩嘅時候，除咗可以帶佢哋體驗街頭小食之外，香港嘅夜景都相當吸引～如果諗唔到帶佢哋去邊嘅話，不妨參考小編為大家整合嘅15個香港夜景好去處，有啲地方可能連大家都未去過，即刻睇睇啦～
圖片來源：SAUCE編輯部、香港旅遊發展局、創意香港、HarbourCity、klook、Facebook@Hong Kong Observation Wheel & AIA Vitality Park 、Sky100 – Hong Kong’s Observation Deck、West Kowloon Cultural District 西九文化區、香港星光大道 Avenue of Stars Hong Kong、鴨靈號 Dukling | 撰文：Hedy
香港夜景推薦 | 1. 太平山
太平山無論係日頭定係夜晚去，都可以令大家體驗到唔同嘅景色，朝早去嘅時間除咗可以乘搭山頂纜車之外，亦可以到訪山頂凌霄閣！如果想喺夜晚欣賞壯麗嘅維港景色，就一定要沿盧吉道行20分鐘，步行到盧吉道觀景台就係最佳觀賞地方，無論喺度欣賞日落定係夜景都相當推薦！大家除咗可以睇到港島嘅摩天建築外，更可以遠眺對岸九龍半島以及獅子山嘅景色。
【INFO】
《太平山》
地址：香港島山頂盧吉道31號
香港夜景推薦 | 2. 大帽山
如果想登上香港最高峰，就絕對要去海拔957公尺高嘅大帽山。不過上去嘅時候記得要帶保暖裝備，同埋要特別小心，因為隨時都會被大霧圍繞，就好似置身於仙境入面！喺能見度高嘅夜晚，你可以清晰咁睇到香港嘅獅子山、飛鵝山、太平山、大東山以及鳳凰山等山峰，喺度睇埋日出都相當寫意～
【INFO】
《大帽山》
地址：香港新界中部大帽山
香港夜景推薦 | 3. 飛鵝山
想睇夜景，飛鵝山都絕對係一個好選擇，可以喺飛鵝山觀景台俯瞰九龍全景，包括九龍半島、香港島以及西貢一帶嘅景色，同朋友欣賞絕美嘅夜景再坐喺上面吹吹風，享受一個寧靜嘅晚上。無論係行山上去定係搭車都冇問題，如果想挑戰體力，自己行山上去嘅大家就記得要注意安全！
【INFO】
《飛鵝山》
地址：香港清水灣飛鵝山道
香港夜景推薦 | 4. 嘉頓山
喺鬧市入面原來有條小山徑可以帶大家上嘉頓山，同時亦係熱門打卡熱點！無論係觀賞日落定係夜景都相當適合，只需要行大約15分鐘嘅樓梯就可以登上山頂，適合啲想打卡又唔想行咁耐嘅朋友仔。大家都可以喺度俯瞰典型嘅香港生活寫照，包括石硤尾同深水埗林立嘅舊式唐樓和公共屋邨，別具特色！如果大家入夜之後先去，由於附近環境漆黑，記得要小心安全。
【INFO】 《嘉頓山》 地址：九龍深水埗嘉頓山
香港夜景推薦 | 5. 畢架山
畢架山算係比較少人認識欣賞夜景嘅地方，只要坐巴士到「豐力樓」落車，咁就可以沿住斜路一直往上行，只要大概30分鐘就可以到達，輕鬆得嚟又可以欣賞到萬家燈火嘅璀璨夜色！
【INFO】
《畢架山》
地址：九龍九龍城筆架山
香港夜景推薦 | 6. 海運觀點
位於海港城海運大廈頂層嘅觀景台「海運觀點」免費開放畀公眾，坐擁270度維港景色，無論係欣賞日落定係夜景都美不勝收！每日開放時間更為早上7:00至夜晚24:00，所以夜晚食完飯都可以過嚟吹吹海風，欣賞美景！就連海港城入面都有唔少嘅海景餐廳食肆，一但有煙花嘅時候就可以順便睇埋維港煙花匯演～
【INFO】
《海運觀點》
地址：九龍尖沙咀海港城「海運觀點」
香港夜景推薦 | 7. 馬灣東灣泳灘
想搵一個浪漫又可以睇到景色嘅地方，小編就相當推薦大家去馬灣東灣泳灘，更可以喺附近嘅沙灘飽覽青馬大橋以及汀九橋嘅景色，再加埋海天一色嘅泳灘，分外寫意，適合大家打卡以及休息！
【INFO】
《馬灣東灣泳灘》
地址：馬灣珀麗路
香港夜景推薦 | 8. 昂船洲大橋
昂船洲大橋連接昂船洲及青衣島，由於位置較為偏僻，算係比較少人認識嘅地方，較為適合駕車人士或單車友前往，如果食飽飯冇嘢做都可以慢慢散步行入去～著咗燈嘅大橋超有Feel，喺度靜靜地吹住海風，好舒服！
【INFO】 《昂船洲大橋》 地址：青衣昂船洲大橋
香港夜景推薦 | 9. 中環摩天輪
喺浪漫嘅摩天輪下，197呎高空觀賞住摩天大廈以及維港嘅海景，摩天輪繞行一圈大概15至20分鐘嘅時間，短短嘅時間就已經可以令你嘅煩惱一掃而空。車廂入面更有恆溫設備，無論係夏天定係冬天坐都相當舒服，成人門票都只係$20！
【INFO】
《中環摩天輪》
地址：香港中環民光街33號
香港夜景推薦 | 10. 天際100
天際100絕對係遊客必到嘅地方，建議大家可以係傍晚日落時分過嚟，咁就可以一次過睇到日落同埋夜景，欣賞360度壯麗天際線～除咗欣賞靚景之餘又可以透過有趣嘅互動多媒體設施，多啲了解香港嘅文化同歷史！
【INFO】
《天際100》
地址：香港九龍柯士甸道西1號環球貿易廣場100樓
香港夜景推薦 | 11. 廟街
想體驗夜繽紛就絕對要去廟街，除咗可以體驗到市區人來人往熱鬧嘅感覺，更有數之不盡嘅港式小食包括煎釀三寶、魚肉碗仔翅，仲有唔同嘅亞洲美食例如麻辣串等等！就連兒時回憶糖蔥餅、叮叮糖、龍鬚糖，更有近乎失傳嘅飛機欖都可以喺度試齊！
【INFO】
《廟街》
地址：九龍油麻地廟街
香港夜景推薦 | 12. 西九文化區
西九文化區除咗匯聚表演同展覽場地，亦都可以帶埋小朋友同寵物嚟海濱長廊散步，更可以喺草地野餐同盡情玩樂。就算玩到肚餓附近都有唔少餐廳同埋Coffee Shop，亦設有美食車等等。
【INFO】
《西九文化區》
地址：九龍西九文化區
香港夜景推薦 | 13. 星光大道
星光大道除咗有超過100個名人巨星掌印，包括影帝梁朝偉、劉德華、影后張曼玉等之外，又可以欣賞到香港島同維多利亞港嘅迷人景色。大家都可以喺度觀賞埋幻彩詠香江，感受香港星光大道嘅璀璨魅力！
【INFO】 《星光大道》 地址：九龍尖沙咀海濱花園
香港夜景推薦 | 14. 敞篷巴士
想輕鬆寫意咁穿梭香港島同九龍多個著名景點及地標，欣賞香港迷人嘅夜色，咁就可以帶埋朋友仔一齊享受觀光巴士睇夜景，每趟旅程大概60至75分鐘，體驗香港各處美麗夜景～價錢大概每位港幣$100起，絕對係一個新奇有趣嘅體驗。
【INFO】
《敞篷巴士》
資料詳情：https://bit.ly/4as2LRQ
香港夜景推薦 | 15. 鴨靈號
就算喺香港出世都未必一定坐過鴨靈號，香港最古老嘅中式帆船，以前用作漁民居住同埋出海捕魚嘅漁船。依家嘅鴨靈號已經成為穿梭維多利亞港嘅觀光遊覽船，等大家可以乘坐帆船欣賞維多利亞港迷人嘅日落同埋晚上，航程每節大概為45分鐘左右！
【INFO】
《鴨靈號》
資料詳情：https://bit.ly/3WQ3UPU
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
