編輯搜羅咗7間充滿度假風情嘅香港海景Cafe推介畀大家，等大家可以一邊欣賞靚景，一邊享受美食，包括Parabolica Caffe、Relax BM Cafe、長洲滑浪風帆中心茶座、Baku八古、喵公館、太陽系委員會、Cafe Roma，每間都好適合打卡，即睇以下地址同詳情啦！
圖片來源：Instagram @parabolica_caffe、@by.themood、@baku_hk、@solcommittee、長洲滑浪風帆中心、喵公館、Cafe Roma｜撰文：Icy
7大度假風海景Cafe｜1. Parabolica Caffe
淺水灣一向都係香港人假日遊玩嘅勝地，而歐陸風烘焙店Parabolica Caffe正正位於淺水灣海旁，分為bake shop同cafe兩部份，設計以淺色木系為主，空間十分寬敞，感覺和煦舒適。客人可以一邊吹住海風，一邊品嚐新鮮出爐嘅烘焙品。
（圖片來源：Instagram @parabolica_caffe）
店內玻璃櫃展示住琳琅滿目嘅麵包，亦有供應各款水果撻、曲奇、咖啡等等。麵包以特濃牛奶製作，無添加過多嘅水份，散發濃郁嘅牛油香。海綿蛋糕配上輕盈嘅忌廉，入口綿滑，亦唔會過份甜膩。
（圖片來源：Instagram @parabolica_caffe）
【INFO】 地址：淺水灣淺水灣道109號影灣園102-103/106A-107A號舖 時間：星期三至日 08:00-17:00 預約網址：按此閱讀更多
7大度假風海景Cafe｜2. Relax BM Cafe
今年初於大美督新開嘅Relax BM Cafe共有四層，分別為地下嘅用餐位置、泰式按摩店、貓貓空間以及天台打卡位。天台對正廣闊嘅藍天同海景，日落時分仲可以欣賞夕陽，非常愜意。
（圖片來源：Instagram @by.themood）
Cafe主要提供西式輕食以及甜品，例如比較特別嘅軟殼蟹墨汁意粉，麵條煙靭有嚼勁，軟殼蟹香脆入味。甜品方面推介牛角包窩夫配上唔同嘅水果及雪糕，又香甜又消暑。
（圖片來源：Instagram @by.themood）
客人食飽之後，可以上2樓嘅泰式按摩店輕鬆一番，由泰國技師主理，提供專業頭肩頸及足部按摩等服務。最後大家仲可以去到貓貓空間，同店主養嘅幾隻得意貓店長一齊玩！
Cafe特設貓貓空間，各位貓奴有福喇！（圖片來源：Instagram @by.themood）
【INFO】 地址：大埔大尾篤汀角路龍尾村165A號地舖 時間：星期一至日 12:00-21:00
7大度假風海景Cafe｜3. 長洲滑浪風帆中心茶座
長洲海邊位置有一間比較隱世嘅茶座，大家需要沿住海灘右邊直行5分鐘先會到達。雖然冇特別設置打卡位，但用餐位置正正對住無敵大海景，好似去咗韓國嘅濟州島咁！
用餐位置正正對住無敵大海景，充滿海邊渡假感覺！（圖片來源：Instagram @by.themood）
茶座提供pasta、fish n chips、三文治等等嘅西式輕食，亦有少量素食選擇。最有趣嘅就係「珊珊炒飯」，聽聞係香港首位滑浪風帆冠軍選手李麗珊童年時嘅拿手炒飯。坐係呢度望住風和日麗嘅海景，嘆番枝手工啤酒，夠晒寫意啦！
（圖片來源：長洲滑浪風帆中心）
【INFO】 地址：長洲黑排路1號 時間：星期一至二、星期四至日 10:00-19:00
7大度假風海景Cafe｜4. Baku八古
位於西貢白沙灣嘅Baku八古佔地足足有7,000呎，樓高四層，集按摩、水療及cafe於一身。鮮橙色嘅外型非常亮眼，而且正對住無敵海景，增添熱帶風情，令客人充滿渡假嘅感覺！
（圖片來源：Instagram @baku_hk）
Baku八古提供全港獨有嘅沖繩琉球及泰式按摩，除咗有獨立房間，仲可以打通成大房間，一家大細或者一大班朋友可以齊齊享受舒適嘅按摩體驗。店內使用嘅香油都係來自法國同英國，客人可以自選香味，放鬆身心。
（圖片來源：Instagram @baku_hk）
至於店內嘅Cafe主要提供輕食，例如香甜嘅牛角酥同麻糬包，仲有別具特色嘅水果味鮮奶咖啡，大家按完摩就可以望住海景嘆番個下午茶喇！
山葵泡沫咖啡使用特選咖啡豆，味道新奇（圖片來源：Instagram @baku_hk）
【INFO】 地址：西貢白沙灣白沙灣中心G1-2號舖 時間：星期一至日 12:00-22:00
7大度假風海景Cafe｜5. 喵公館
各位鍾意貓貓嘅朋友，一定唔可以錯過位於荃灣嘅喵公館！呢間貓貓Cafe佔地達1,500呎，裝潢以大地色木系為主，室內空間闊落，感覺和諧。大玻璃窗可以透入自然光，更可以望到出面嘅海景！
（圖片來源：喵公館）
Cafe主要提供蛋糕同手沖咖啡，店員仲會係咖啡上拉出可愛嘅貓貓圖案，打卡一流！坐係度畀咁多隻貓貓主子寵幸，享受住精美嘅甜品，實在係一個悠閑嘅午後時光！
貓貓圖案嘅立體拉花好得意啊！（圖片來源：喵公館）
【INFO】 地址：荃灣柴灣角街38-40號銓通工業大廈18樓A室 時間：星期一至日 11:00-21:00 電話預約：5690 0686
7大度假風海景Cafe｜6. 太陽系委員會
位於馬灣嘅太陽系委員會旨在成為區內連繫鄰里關係嘅聚腳點，所以會定期邀請附近居民舉辦唔同嘅興趣班，例如咖啡拉花、繪畫、瑜珈等等。
（圖片來源：Instagram @solcommittee）
店內環境寬敞，擺放各款懷舊傢俬，落地玻璃正對住馬灣沙灘，因此客人可以一邊欣賞青馬大橋嘅美景，一邊享受店內自家製嘅食物，例如特色fusion花雕蟹意粉或者以馬灣可樂醃製嘅大白菜，味道意外配合，令人有驚喜！
（圖片來源：Instagram @solcommittee）
【INFO】 地址：馬灣珀麗路8號珀麗灣臨海廣場2樓1A號舖 時間：星期一至日 11:00-18:00
7大度假風海景Cafe｜7. Cafe Roma
同樣位於馬灣海灘附近嘅意大利親子餐廳Cafe Roma，裝潢充滿歐陸氣息，客人仲可以飽覽青馬大橋景色。餐廳設計以暖色調同鄉村為主，戶外沙灘更設有遊樂區，提供沙灘玩具，加上寵物友善嘅環境，最適合一家人帶小朋友同毛孩去放電！
（圖片來源：Cafe Roma）
Cafe Roma選用意大利進口嘅新鮮食材，製作出地道意大利料理。餐廳更會推出特色下午茶，擺盤好吸睛，供應多款經典意式鹹甜點，例如煙燻風乾巴馬火腿、卡津大蝦串、羅勒布拉塔芝士、Tiramisu等等，又睇得又食得！
（圖片來源：Cafe Roma）
【INFO】 地址：馬灣珀麗灣臨海廣場1樓7-8號舖 時間：星期二至五 11:30-22:30/星期六 11:00-22:30/星期日及公眾假期 11:00-22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
