今年農曆新年大家諗好去邊度玩呢未？各大商場有唔少新春打卡裝置，當中包括迪士尼招福開運慶典、Miffy「春意花開」活動同ONE PIECE新春金運遊樂園，約埋朋友或者屋企人嚟打卡就最啱啦！小編為大家整合 新年好去處2023 ，大家都快啲Mark實感受一個喜慶洋洋嘅新年啦！
圖片來源：官方圖片｜撰文：Sharon
1. Miffy「春意花開」
經典人氣可愛嘅Miffy即將登陸太古城中心，同大家一齊迎接兔年！由1月6日起至2月5日，太古城中心聯同Miffy舉辦「春意花開」活動，現場有5大必影打卡位，包括6.5米「Miffy幸福熱氣球」、擁有2,5000朵鬱金香嘅花園、Miffy風車屋、艷紅桃花林、盪鞦韆嘅Miffy同兔子造型嘅桃花隧道等！另外，當然唔少得Miffy新春期間限定店，超過三百件精品等緊大家帶佢哋返屋企！
【INFO】 《Miffy「春意花開」活動》 地址：香港太古城太古城道18號 日期：1月6日起至2月5日
2. Mickey Mouse & Donald Duck「招福開運慶典」
由1月10日起至2月5日，「Disney招福開運慶典」登陸銅鑼灣啦！迪士尼兩大角色米奇同唐老鴨化身成為寓意開運招福嘅招財貓同達摩，同大家一齊迎接新年嘅來臨！當然唔少得多個必影打卡位，包括兩米高巨型招財貓造型米奇與唐老鴨同木製許願神社等。另外，2樓中庭更設期間限定店，售賣50款限定迪士尼精品，當中「URDU 福部屋－迪士尼系列」更加係首次亮相，必買招財貓及達摩系列 Figure、盲盒公仔及幸運御守！顧客凡於期間限定店消費，仲可獲贈新春利是封和揮春！身為迪士尼fans嘅你記得唔好錯過啦，快啲將福氣帶走啦！
【INFO】 《Mickey Mouse & Donald Duck「招福開運慶典」》 地址：銅鑼灣時代廣場地面露天廣場 日期：1月10日至2月5日 時間：10:00 - 22:00
3. Sanrio x 東華三院 – 上環文武廟
為咗慶祝文武廟175周年，東華三院特別同Sanrio合作，推出期間限定打卡位及聯乘精品！Hello Kitty同Dear Daniel會化身成文武二帝，兩位手持毛筆同關刀喺文武廟門外恭候大家，而Little Twin Stars亦會穿上旗袍，變成東華三院秋祭總理！場內有多個打卡位，包括木製涼亭、桃花陣同巨型佈景版，大家可以一邊參拜、一邊打卡影相！另外，仲有期間限定聯乘公仔，Hello Kitty同Dear Daniel文武二帝造限量版公仔、Little Twin Stars東華總理系列限定公仔，每一款都超可愛！
【INFO】 《Sanrio x 東華三院 - 上環文武廟打卡位》 地址：上環荷里活道東華三院文武廟 日期：即日起至2月28日 時間：08:00 - 18:00
4. 屯門黃金海岸「新春光映迎金兔」
今個新春，位於屯門黃金海岸有多個打卡位等緊你！商場打造近20米長嘅「萬彩花燈巷子」，中庭更將設5米長「金光玉兔花燈隧道」，隧道兩旁掛滿超多七彩傳統燈籠，滿滿嘅新年氣氛啊！穿過金兔福耳造型嘅花燈大道，行返一個大運，新一年一定會稱心如意！另外，1月29日仲有「金龍瑞獅迎新春」醒獅賀歲節目，到時除咗金龍醒獅巡遊，仲有梅花椿表演等緊大家～呢個新年不如同屋企人一齊入嚟黃金海岸感受與別不同嘅新年啦！
【INFO】 《屯門黃金海岸「新春光映迎金兔」》 地址：黃金海岸商場中庭 日期：即日起至2月5日
5. 「地膚之森」園藝裝置
仲未行得開去旅行？依家去北角就夠哂氣氛喇！今個新年，北角海濱花園將會化身成新春火紅波波草園《地膚之森》園藝裝置，以茨城縣人氣波波草花海為藍本～草園裝置仲獲得日本國營常陸海濱公園官方認證，畀大家喺香港都可以置身於日本嘅氛圍！花海以日式小教堂為靈感，設有玻璃教堂等打卡裝置，無論係日頭定夜晚影相都非常浪漫。嫩紅色嘅波波草花海夠喜慶之餘仲好吸睛～快啲帶埋另一半同屋企人新年過嚟打吓卡啦！
【INFO】 《「地膚之森」園藝裝置》 地址：北角海濱花園（北角對出碼頭旁綠化地段） 日期：由即日起至3月15日
6.朗豪坊 x mofusand 春日貓遊遊
朗豪坊就趁農曆新年，特別喺日本邀請到萌貓mofusand同大家過年！最近小編去日本嘅時候都有留意mofusand，當中鯊魚貓同炸蝦貓就令我最印象深刻！返到嚟香港竟然有個咁大型嘅打卡裝置，仲有首間mofusand官方授權香港限定店～你又點可以錯過呀？全埸會有大約20隻唔同造型嘅Cute爆貓咪喺5大東瀛神社祈願熱點等住同大家打卡！仲可以睇晒mofusand首次喺香港公開嘅插畫添！場內會有300款官方授權獨家產品一次過登場，除了極罕日本直送精品之外，當中仲有一系列於期間限定店首次開賣嘅新春開運萌物～快啲去朗豪坊掃精品啦！
【INFO】 《朗豪坊 x mofusand 春日貓遊遊》 地址：朗豪坊4樓通天廣場 日期：由即日起至2月5日 時間：星期一至日 11:00 - 22:00
7. ONE PIECE新春金運遊樂園
海賊王就同佢嘅朋友一齊同大家喺YOHO MALL過新年～仲係首度以兔年中式造型同各位團拜，咁特別嘅打卡位真係唔可以唔去！一班主要角色路飛、喬巴、娜美、魯賓及烏索普等會以中式新春造型穿梭場內多個打卡裝置，仲有3.8米高嘅「幸運黃金夢」大樹預祝大家財源廣進～當然唔少得海賊王嘅限定商店啦！超過270款嚟自日本、台灣及韓國等地超人氣精品、授權商品以及活動期間限定單品，當中包括多款全新兔年賀歲Q版限量利是封、揮春、掛飾、家居產品等。
【INFO】 《ONE PIECE新春金運遊樂園》 地址：YOHO MALL II中庭 日期：由即日起至31日 時間：星期一至日 10:00 - 22:00
8. PLASTIC THING 為食天神祭
新年梗係要去神社參拜祈福，咁新嘅一年先會順風順水！今個新春，由即日起至2月5日，The ONE及皇室堡聯同「Whateversmiles x PLASTIC THING」設新年打卡位！為食妹同一眾好友將會同大家一同慶祝呢個佳節！「皇室堡X PLASTIC THING 為食妹天神祭」，為食妹將化身為2.5米高粉紅兔仔，大家記得嚟4米高嘅「為食神殿」參拜兼影相！場內特設天神販賣機，有4款PLASTIC THING x Whateversmiles獨家商品！
【INFO】 《皇室堡 x PLASTIC THING「為食妹」天神祭》 地址：皇室堡地下中庭 日期：即日起至2月5日 時間：10:00 - 22:00
「The ONE x PLASTIC THING 為食神社」有2.5米高嘅為食妹黃金蘿蔔神像，打完卡包你萬事如意及財「食」兼收！The ONE x PLASTIC THING「兔滿長肥」期間限定店 by Whateversmiles由3隻兔仔造型嘅為食妹看守，發售多款獨家限量兔年周邊，必買「特別版為食妹造型匙扣八達通卡」同「PLASTIC THING金運麻將套裝」！
【INFO】 《The ONE x PLASTIC THING為食神社》 地址：The ONE UG2中庭 日期：即日起至2月5日 時間：10:00 - 22:00
9. 荃新天地 x LEGO®「奇歷兔莊園」
荃新天地同LEGO®攜手打造「奇歷兔莊園」新春主題活動，福兔著上喜慶服裝並手持七彩風車，降臨荃新天地！場內有多個打卡位，包括「祈福許願樹」 、「豐收蘿蔔園」及「七彩瀑布」自由拼砌許願池等，仲有必玩四大開運挑戰遊戲，考驗大家嘅創意、體能、勇氣同運氣！完成挑戰後可以換取過關印章，只要集齊其中3個，即可晉身成為奇歷兔小隊員！另外，當然唔少得LEGO® 新春期間限定店，售賣新春限定別注版LEGO®套裝、新春賀年立體擺設同新春花車巡遊等！
【INFO】 《荃新天地 x LEGO®「奇歷兔莊園」》 地址：荃新天地1期中庭 日期：即日起至2月5日 時間：10:00 - 22:00
10. 太古廣場「大白兔限定快閃店」
太古廣場同經典品牌「大白兔」聯乘，由即日起至2月5日開設全港首個獨家大白兔限定主題店！場內以花卉主題設計，有一隻巨型胭紅嘅兔仔畀大家打卡影相，仲有超多隻兔仔喺花海之間，同大家一齊迎接新年～另外，場內仲有一系列限定主題商品，當中包括首次推出嘅芒果口味大白兔奶糖，另有多款大白兔奶糖味道禮盒，如紅豆、咖啡、芥末等，新年送禮必買啊！
【INFO】 《太古廣場「大白兔限定快閃店」》 地址：太古廣場L1層 日期：即日起至2月5日
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
