平時出街各位主人可能都會想帶埋愛犬一齊玩，但唔係每一個地方都容許狗狗進出，但依家寵物友善嘅地方都越嚟越多，無論係室外定狗狗Cafe都應有盡有，相信狗狗都一定可以玩得盡興！小編為大家搜羅5大 寵物好去處 推介，即睇詳情了解更多啦！
圖片來源：饒宗頤文化館、The Arca Hotel、元朗Hooment、狗奴城寨 Petpatclub、K11 MUSEA｜撰文：Sharon
1. 美之山丘
位於美孚饒宗頤文化館嘅「美之山丘」係全新超大型寵物共融嘅戶外活動區域，佔地逾3萬呎，區內分為八大園區，係毛孩周圍放電散步嘅好去處！「美之山丘」集戶外、大自然、文娛休閒同歷史文化於一身，有豐富歷史背景融合歷史教育，仲係少數Pet Friendly嘅活動景點！
最適合毛孩一定係寵物場地「毛小鎮」，設寵物玩樂設施如跳躍圈環、滑梯、排水管道等，相信狗狗一定可以玩到好開心～另外，各位主人都可以喺度打卡影相，呢度嘅特色打卡點遍佈八大園區，包括美之幸福樹、歐陸小箱庭、美之夢想屋、森之艇、美之許願區等。山丘上可以眺望昂船洲大橋，日落時分就飽覽到醉人景色！
【INFO】
《「美之山丘」- 饒宗頤文化館 》
地址：九龍美孚青山道800號
開放時間：星期一至五 12:00 - 18:00 | 星期六、日及公眾假期 10:00 - 18:00
如何前往：美孚站 B 出口，前行至中華電力變電站，登上行人天橋，
左轉至青山道休憩公園，於交通燈處橫過青山道即達
票價：成人票價 – $60
優惠票價（3至12歲小童、全日制學生及65歲或以上長者）- $30
3歲以下嬰幼兒、「殘疾人士登記證」持有者、寵物 – 免費
詳情：https://bit.ly/3weRXop
2. K11 MUSEA PETS GARDEN 寵物友善公園
尖沙咀梗係唔止Shopping咁簡單啦！位於K11 MUSEA 7樓嘅Bohemian Garden化身成為寵物友善公園，增設多項寵物友善設施！當中包括為毛孩而設嘅肉球腳印踏板、休憩長凳同寵物手推車停泊專區等，各位主人帶同狗狗嚟到盡情狂跑啦！
【INFO】 K11 MUSEA PETS GARDEN 寵物友善公園 地址：九龍尖沙咀梳士巴利道18號 K11 MUSEA 7 樓 Bohemian Garden 開放時間：10:00 - 22:00
3. 寵物友好酒店：The Arca Hotel
如果想同寵物過返一個至Chill嘅Weekend，唔一定去室外或者Cafe玩，同狗狗一齊Staycation一樣得！The Arca Hotel係一間寵物友好酒店，位於黃竹坑，飽覽深灣海景及南區嘅怡人景色。歡迎每房最多入住兩隻 25 kg 以下狗或貓，酒店仲提供專為狗狗而設嘅餐單、狗狗專屬禮品包，包括「Buddy Bites 乾狗糧」、「狗狗潔齒骨」同「網球玩具」等！另外，每隻寵物喺每次住宿期間，更可免費使用「Pawfect Wardrobe」（寵物服飾）兩小時添！咁無論係大人定寵物都可以享受高級嘅體驗啦！
【INFO】 The Arca Hotel 地址：黃竹坑香葉道 43 號 聯絡電話：3701 6000 詳情：https://bit.ly/3Z5cTKy
4. 元朗Hooment
元朗Hooment係大型寵物友善複合式商店，佔地約6000呎，當中有唔同嘅主題區域，當中包括寵物超市、人寵俱樂部、寵物美容、輕食共享同自助沖涼區等，唔少主人放假都會帶埋狗狗一齊嚟玩！食物方面，餐廳貼心準備健康輕食，最特別一定係狗狗都可以享用嘅韓式炸雞啤酒餐，為狗狗健康及口味而設「狗啤酒」，不含酒精同汽泡成分，仲可以同狗狗一齊嘆咖啡，專為狗狗準備嘅「狗咖啡Puppuccino」！
提供嘅寵物美容，更照顧毛孩嘅需要，設半圓透明玻璃窗設計，主人就可以隨時透過玻璃窗望到毛孩～此外，除咗美容服務，另外亦有唔同療效嘅水療畀狗狗使用！人寵俱樂部定期都會舉辦唔同嘅活動，畀主人同佢哋嘅狗狗參加，例如狗狗派對、寵物急救班、居家寵物美容工作坊等，既充實又有意義！
【INFO】 Hooment 地址：新界元朗公庵路68號溱柏地下G鋪 營業時間：9:00 - 22:00 聯絡電話：2701 1777 / 9889 7793 詳情：https://bit.ly/3Z3Y4YV
5. 狗奴城寨
想令狗狗盡情奔跑？位於元朗逢吉鄉嘅人寵派對場地「狗奴城寨」，有一大片草地同游游池畀狗狗放電！佔地9000呎嘅狗奴城寨，除咗戶外設施，場內有唔少打卡位，配上貼地搞笑嘅字句，相信一眾主人一定會好想同狗狗影相留念！提供BBQ包場服務及狗狗生日派對，為愛犬舉辦生日會都係一個唔錯嘅選擇！另外，現場都有專為狗狗而設嘅食物，而且賣相都十分吸引！各位主人快啲帶埋狗狗嚟啦！
【INFO】 狗奴城寨 地址：元朗逢吉鄉 聯絡電話：9548 9889
————————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
