假期唔知做咩好最啱就係去離島一日遊，遠離都市塵囂，畀大自然包圍住，心情都自然放鬆唔少！唔好因為香港「石屎森林」嘅外號而睇少本地嘅自然景貌，原來喺香港都可以享受到好似歐洲小島咁chill到爆嘅陽光與海灘生活，今次小編就為大家準備咗全港最大嘅島嶼—— 大嶼山一日遊 嘅偽渡假行程，由食嘢、打卡、戶外活動體驗到行街路線都幫大家整理好晒，即刻去下面睇大嶼山一日遊嘅懶人包啦！
圖片來源：網絡圖片、Openrice@foodierabbit、Openrice@Jason.chan.7587370、Openrice@Limz9、Bathers、香港旅遊發展局、Instagram@kola.liu、Instagram@jiupeen.shashin、DCFever@Stephencntse、東薈城｜撰文：Aster
大嶼山一日遊景點（一）：希臘小島風情臨海餐廳 —— Bathers
一日嘅心情係由嗰日第一餐決定嘅！Bathers餐廳湖水藍色調嘅裝修就好似幫夏天加左一調羹嘅冰塊咁，見到都覺得透心涼，好清爽～餐廳位於海灘之上，有開闊嘅視野可以將成個沙灘一覽無遺，就連用餐嘅時候都有清涼海風相伴，真係好似身處希臘小島咁歎！
食物方面，Bathers主打酒吧美食同海鮮，牛排、龍蝦同牡蠣都係佢哋必試嘅熱門菜式，亦有其他地道西餐同素食畀大家選擇，唔怕揀唔啱心水！特別要為大家介紹嘅係餐廳提供嘅啤酒同雞尾酒，一杯喺手，夏日嘅暑氣已經走夾唔唞！想感受到濃厚嘅異國風情，霸到沙灘邊打卡靚位就記得要預先訂位啦～
【INFO】
Bathers
地址：大嶼山長沙下村32號地舖
營業時間：
星期一至五：11:00 – 21:30
星期六至日：09:00 – 21:30
電話：2504 4788
大嶼山一日遊景點（二）：水上運動天地 —— 下長沙海灘
食飽飽係時候要郁下！喺餐廳望出去就係長沙泳灘，佢係全香港最長嘅沙灘，亦係水上運動愛好者首選嘅活動場所～下長沙海灘係水上活動集中地，因為佢比較大浪，所以好適合去衝浪！
喺度可以體驗到滑浪風帆、獨木舟、直立滑浪板、淺水衝浪板等等嘅運動，附近仲設有水上活動設備租借店，兩手空空咁去就得，超級方便！更衣室、淋浴設備同洗手間都係一應俱全！
【INFO】
下長沙海灘
地址：離島大嶼山嶼南道
大嶼山一日遊景點（三）：天空之鏡 —— 貝澳泳灘
號稱香港最美泳灘之一嘅貝澳泳灘當然係唔可以錯過嘅打卡位！平湖喺潮退同日落嘅時候湖面會映射出天空嘅倒影，喺海岸線上面影相就可以收穫一張上下完全對稱嘅「天空之鏡」構圖，係大自然嘅奇觀～黃昏時分，夕陽餘暉下個天會渲染成橙紅色，呢個時段嘅泳灘別有一番氛圍感，好似電影入面嘅場景咁，好適合沿住岸邊漫步，靜靜望下個天都已經好放鬆！無論喺咩角度影個景都係咁靚！
【INFO】
貝澳泳灘
地址：離島大嶼山嶼南道
大嶼山一日遊景點（四）：媲美海外outlet —— 東薈城
喺翻翻現實世界之前，大家仲可以喺東薈城體驗出國行outlet嘅感覺，延續今日嘅vibe～全日都主要係戶外活動，揮灑汗水，到夜晚就可以翻室內歎住冷氣揾食！東薈城係香港最大嘅outlet，匯聚上百間國際知名時尚品牌，仲有低至1折嘅購物優惠，真係睇到都好心動～
入面仲有超過40間食肆，有齊中西美食，可以滿足到唔同口味嘅人！而且裏面設有戲院，完美嘅一日行程緊係要用Movie Night收尾！
【INFO】
東薈城
地址：香港大嶼山東涌達東路18-20號 (港鐵東涌站C出口)
營業時間：10:00 – 22:00
電話：2109 2933
相關文章：【離島好去處】梅窩-銀礦灣輕鬆一日遊 行瀑布走礦洞/漫步沙灘/手工PIZZA/打卡CAFE
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
