光陰似箭，話咁快就要告別2023年，準備迎接2024年新嘅開始。係除夕當日，香港各區都將會舉辦多項除夕倒數活動，讓廣大市民一齊感受倒數嘅熱烈氣氛。想知有咩2024年除夕倒數活動，就即睇以下活動介紹同舉辦地點啦！
圖片來源：香港旅遊發展局、香港迪士尼樂園、PAN//TONE+、太古城、灣仔利東街、網上圖片 | 撰文：Icy
除夕倒數活動｜1 – 維港煙花匯演
講到香港最具代表性嘅除夕倒數活動，一定莫過於維港煙花匯演。係12月31日除夕夜當日，維港將會上演長達12分鐘嘅煙花音樂匯演，由中環延伸至銅鑼灣，寬達1,300米，可謂係有史以來最大規模嘅香港倒數活動。煙花匯演將以「新年新傳奇」為主題，以四季元素表達季節循環同萬物周而復始嘅畫面，伴隨著音樂同幻彩燈光效果，綻放多個色彩斑斕嘅花火。由晚上11時開始，每隔15分鐘都會發放許願流星煙火，點亮維港夜空，等大家一同許下願望！
【INFO】 維港煙花匯演 地點：維多利亞港兩岸 日期：2023年12月31日 時間：許願流星將會於23:00、23:15、23:30、23:45發放 / 煙花音樂匯演將會於午夜00:00至00:12發放
除夕倒數活動｜2 – 迪士尼除夕倒數派對
香港迪士尼樂園將會於12月31日除夕夜舉行「跨年倒數時刻」活動，由晚上9時開始，美國小鎮大街火車站、探險世界及明日世界都會有多位迪士尼朋友驚喜現身，增添派對氣氛。步入子夜時分，奇妙夢想城堡前更會上演「迪士尼星夢光影之旅」多媒體夜間匯演，由一班迪士尼朋友帶領大家載歌載舞。隨住澎湃嘅煙花同光影，大家將會一齊倒數，迎接美好嘅2024年！
【INFO】 迪士尼除夕倒數派對 地點：香港迪士尼樂園 日期：2023年12月31日 時間：21:00開始至午夜時分 購票詳情：香港迪士尼樂園
除夕倒數活動｜3 – 海洋公園除夕倒數音樂會
海洋公園高峰樂園將會於12月31日除夕當晚，舉辦時尚LGBT倒數派對「PAN//TONE+ Countdown 2023」，邀請一眾潮流歌手，例如陳凱詠、J.Arie、馬天佑、林一峰、小肥等，帶來精彩嘅音樂演出。現場更可欣賞Queen Kong以及Coco Pop等迷人變裝表演，為派對氣氛升溫！
【INFO】 海洋公園除夕倒數音樂會 地點：香港海洋公園高峰樂園 日期：2023年12月31日 時間：19:30開始至午夜時分 票價：一般門票 HK$788、大專學生票 HK$588、VIP桌 HK$13,888（包括8張VIP門票及4支Moet & Chandon NIR 香檳） 購票詳情：Klook
除夕倒數活動 | 4 – 新城市廣場「跨年倒數派對」
如果想近近地感受跨年倒數氣氛，同時又可以見下明星，就一定要參與由沙田新城市廣場舉辦嘅「跨年倒數派對」，當晚會邀請多位人氣偶像，包括「混血男神」Jeffrey魏浚笙、Gigi炎明熹、《全民造星5》參賽者Kakit鄧家杰、Snoopy詹仕偉以及Carson李嘉俊等等，以歌聲迎接2024年！
【INFO】 新城市廣場「跨年倒數派對」 地點：新城市廣場1期1樓羅馬圓型獻技場 日期：2023年12月31日 時間：22:30-00:05
除夕倒數活動 | 5 – 太古城冰上皇宮除夕倒數派對
另一個要推介嘅商場除夕倒數活動，就係由太古城舉辦嘅冰上皇宮除夕倒數派對，除咗溜冰之外，現場特設派對小食及飲品專區，並邀請歌手包括mansonvibes張進翹、Zeno顧定軒及本地樂隊Kowloon K，放送多項精彩特別節目。踏入午夜時分，活動將會配合DJ精選音樂、冰上大螢幕以及燈光效果，同大家一齊倒數迎接2024年！
【INFO】 太古城冰上皇宮除夕倒數派對 地點：太古城中心冰上皇宮 日期：2023年12月31日 時間：溜冰時段 21:00-00:10 / 除夕倒數派對演唱時間 22:00-00:00 票價：HK$150/位（費用包括免費租用溜冰鞋一對） 購票詳情：Klook
除夕倒數活動 | 6 – 灣仔利東街「The Wishing Stars」
如果想著得靚靚咁去倒數兼且打卡，咁就唔可以錯過灣仔利東街嘅燈飾藝術裝置「The Wishing Stars」。展覽與香港跨媒體藝術家黃宏達攜手合作，以超過一百萬顆寶石，打造長達200米嘅星鑽許願長廊，中庭更加懸掛咗一顆高達5米嘅巨型許願星，讓大家許下新一年嘅願望。另外由即日起至2024年1月1日，灣仔利東街每晚都會上映「Let It Snow!」飄雪匯演，配上璀璨嘅燈飾，充滿浪漫氣氛！
【INFO】 灣仔利東街「The Wishing Stars」 地點：香港灣仔區皇后大道東200號 日期：即日起至2024年1月14日（飄雪匯演將會舉辦至2024年1月1日） 時間：10:00-23:00（2023年12月30日至2024年1月1日，亮燈時間將會延長至00:00）
除夕倒數活動 | 7 – D2 Place「再見凱婷」除夕倒數市集及音樂會
講到最受文青歡迎嘅活動之一，莫過於行手作市集。荔枝角D2 Place將會舉辦「再見凱婷」除夕倒數市集及音樂會，透過一系列打卡位同插畫專區，等大家向以前壞過凱婷嘅自己講拜拜。活動除咗有多個特色手作品牌參展，仲邀請咗Sica、Kamie、MadMad、子然、結他手APE等人氣表演嘉賓，加熱現場氣氛！
【INFO】 D2 Place「再見凱婷」市集 地點：D2 Place一期2樓The Space及新昌工業大廈地下The Aisle 日期：2023年12月30日至2024年1月1日 時間：13:00-20:00 D2 Place除夕倒數音樂會 地點：D2 Place二期地下The Garage 日期：2023年12月31日 時間：21:00-00:45
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
