九龍城寨 | 全新「九龍城寨光影之旅」電影場景展終於都正式開幕啦，規模變得更加大，新增咗人文景觀以及商店街等場景，等大家都可以喺度體驗80年代城寨嘅獨特風貌～即刻入內文睇詳情啦！
圖片來源：康樂及文化事務署、官方圖片、Facebook@Philip Ng、@Discover Hong Kong | 撰文：Hedy
今次「九龍城寨光影之旅」電影場景展規模變得更大，而展覽更係免費入場，為期三年！電影場景展由香港電影金像獎最佳電影《九龍城寨之圍城》嘅幕後團隊精心製作，並特別於九龍城寨原址，依家嘅九龍寨城公園重構場景。今次展覽加入更多電影中嘅經典場景，並融合本土傳統工藝元素及結合大型投影，務求活現城寨日常！
九龍城寨光影之旅 | 8個展覽館
「九龍城寨光影之旅」重現電影《九龍城寨之圍城》中多個場景，共設8個展覽館，包括士多、跌打館、魚蛋工場、牙醫診所、城寨光影天台、窄巷內街、龍城髮廊以及七記冰室，重現城寨嘅日常點滴～當中大家絕對唔可以錯過城寨光影天台，可以親身企喺寨城天台上面，透過大型投映屏幕，展示九龍城寨嘅日與夜，仲可以聽到飛機掠過頭頂嘅轟鳴聲，超特別～
九龍城寨光影之旅 | 超精湛工藝
除咗可以睇到電影入面嘅經典場景之外，大家更要欣賞精湛工藝！大家一入門口就會見到以人手書寫嘅大型傳統花牌，入口上方「九龍城寨鐵牌坊」嘅設計更係參考咗80年代大廈鐵閘。此外，展覽內嘅部分地磚更係由舊建築物回收再用，好懷舊啊～
九龍城寨光影之旅 | 免費入場
想免費入場參觀嘅朋友，足足有成3年嘅時間畀大家睇，毋需預約。根據現場情況，入場人士有機會要先領取籌號，方可於指定時間進場。籌號會以先到先得形式派發，派完即止！
【INFO】 《「九龍城寨光影之旅」電影場景展》 日期：即日起至2028年年5月24日（為期3年） 開放時間： 2025年5月至8月，每日上午9:00至晚上7:00 2025年9月後，每日上午9:00至下午6:00 地點：九龍寨城公園衙門 費用：免費入場
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
