一年容易又中秋，難得有假放梗係要出去玩啦！嚟緊有唔同嘅中秋主題嘅大型市集，有成150個攤位任你玩，仲有音樂表演加多個打卡位等你嚟打卡，玩完仲可以去睇埋燈飾添，具有香港文化傳承嘅霓虹燈藝術，點可以唔支持！想知道中秋有咩好去處就要睇埋落去啦！
圖片來源：Klook、黃大仙中心、 Facebook @LOCOLOCO、Facebook @centralmarkethk｜撰文：Claudia
1. 中秋好去處 – 中環海旁中秋夜市
9月9日至9月11日LOCOLOCO將會同中環夏誌合作舉行「SummerFest中環夏誌 x LOCOLOCO文創市集：城市小出走」，中秋海濱市集位於中環海濱活動空間，市集以「城市小出走」做主題，配合今年中環夏誌打造的「城中野」，市集三天將會設有三個小出走主題，分別係露營篇﹑賞月篇同埋放空篇，大家就可以喺中環海濱活動空間邊賞月邊逛市集啦！
今次活動有成150個品牌參加，現場有4大打卡位，多個攤位遊戲同4個特色工作坊等你玩，包括「夜光星球工作坊」、「風鈴彩繪工作坊」、「浮游花瓶工作坊」同埋「日式釣水球體驗班」！現場大家仲可以喺草地露營，到時候又有音樂表演等等，聽落都夠晒熱鬧，仲要係免費入場，咁多搞作點可以唔去啊！
【INFO】 《SummerFest中環夏誌 x LOCOLOCO文創市集：城市小出走》 日期及時間： 露營篇 - 9月9日 (星期五)：15:00-21:00 賞月篇 - 9月10日 (星期六)：14:00-21:00 放空篇 - 9月11日 (星期日)：14:00-21:00 地點：中環海濱活動空間 開放日期：2022年9月9日-11日
2. 中秋好去處 – 黃大仙「霓彩映月」
由8月13日至9月18日，大家可以去黃大仙中心北館「賞月」啦！中秋節日除咗要賞月又點少得睇燈飾呢！黃大仙中心今年就同本地招牌保育平台「街招」聯合推出「霓彩映月」主題活動，目的係為咗傳承本地「霓虹」工藝！佢哋利用修復嘅霓虹燈招牌，設計出一個直徑兩米、全港首個嘅3D霓虹燈月亮裝置，以保育方式將香港昔日霓虹燈招牌轉化成獨一無二嘅藝術珍品！拯救及修復而來的霓虹燈招牌，為傳統工藝注入新生命，呈現霓虹燈藝嘅文化價值同魅力！
呢個設計巧妙咁加入咗唔同嘅視覺元素，呈現出滿月、盈凸月、上弦月，以及娥眉月嘅月相美態，憑藉陰晴圓缺的自然循環，寄寓本地工藝得以代代傳承、生生不息！
全人手製作的3D霓虹燈月亮主要由拯救回來的霓虹光管組成。由香港霓虹燈師傅胡智楷聯同霓虹燈藝術家劉浩輝（Jive）攜手合作，以兩種方式修復霓虹光管。胡師傅以經驗老到嘅精湛手藝，將破損咁霓虹燈管修復同重新接駁，而Jive將粉碎咗嘅霓虹光管重新製作，為舊有嘅霓虹招牌帶來新生命，再度發出耀眼光芒，兩位師傅嘅聯手創作，別具文化傳承的象徵意義，值得大家去欣賞㗎！
「霓虹」打卡區展現本地工藝新生力
除了立體藝術裝置外，商場2樓仲設有另類打卡區，展出Jive主力設計及製作嘅新作品，以黃大仙中心嘅標誌為設計核心，結合傳統工藝及新派視覺元素，讓圖像無限延伸，展現出霓虹燈充滿現代玩味嘅一面！
【INFO】 《黃大仙中心「霓彩映月」》 活動日期：2022年8月13日至9月18日 活動時間：11:00-20:00 活動地點：黃大仙中心北館
3.中秋好去處 – 中環街市x恆香中秋燈影活動
今個中秋，中環街市同恆香老餅家合作舉辦「恆香．中環街市 燈影之城」活動，由即日起至9月30日，大家都可以同摯友去玩啦！活動設有4大必影必玩打卡位，包括200個七彩燈籠組成嘅5米高許願樹、6隻唔同造型嘅光影月兔加恆香月餅椅、本地插畫師手作插畫的「恆香元聚市集小屋」，仲有就係積木打造充滿香港情懷場景嘅「小城故事積木展」！中環街市一直致力推廣文化保育，今次呢個活動係以傳承藝術設計為主題，加上內各大商戶都推出節日限定優惠，大家梗係要去支持啦！
【INFO】 《恆香．中環街市 燈影之城 The City of Moon》 活動地點：中環皇后大道中93號及德輔道中80號中環街市 活動日期：即日起至9月30日 活動時間：10:00-22:00
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
