長沙灣美食 | 長沙灣近年嚟開咗唔少隱世小店、高質Cafe，同埋充滿特色嘅過江龍，令長沙灣成為咗一眾為食鬼嘅新目標。例如有高CP值壽喜燒套餐嘅洋食商店、高水準西班牙海鮮飯同Tapas嘅La Barra Tapas Spanish Restaurant同埋極致濃郁廣島牡蠣湯底拉麵聞名嘅極之拉麵等，呢篇文都實幫到你！準備好你嘅胃口，一齊嚟發掘長沙灣區嘅美食驚喜啦！
圖片來源：Openrice @yukiwyy、@kaki007、@cargo001、@zoeeesooo、@stayfitwith.jessie、@pigfoodiexhk、@Hungry_fatdoi | 撰文：Ginger
長沙灣美食推介 | 1. 洋食商店
洋食商店裝修別具心思，掛滿靚燈籠同織旗，營造出濃濃嘅日本街頭氣氛。最驚喜嘅係，佢哋嘅壽喜燒套餐性價比超高！招牌嘅特惠關西壽喜燒，人均二百蚊就可以食到五道菜壽喜燒套餐，仲有專人幫你燒同煮埋個黑松露燉飯，真係超值！牛肉方面，最基本已經有美國頂級牛頸脊同日本國產牛頸脊，你可以升級食澳洲M9和牛西冷，大大塊而且油脂豐富，入口質感夠軟嫩。壽喜燒食完之後，仲可以加入蔬菜變成涮涮鍋，最後嘅MVP絕對係黑松露燉飯，充滿黑松露香，吸晒所有牛肉同蔬菜嘅精華，為成餐飯畫上完美句號。
【INFO】 《洋食商店》 地址: 長沙灣福榮街538號喜遇地下2號舖 營業時間: 星期一至日 12:00 - 16:00, 18:00 - 22:00
長沙灣美食推介 | 2. 會長之家烤肉
長沙灣呢間會長之家烤肉復古裝修似足韓劇場景，一坐低就會附送一排韓國特色小菜，味道做得好正宗！會長之家烤肉嘅肉質超高質，紋路非常靚，最推薦嘅招牌係會長一字骨，排骨用秘製甜醬汁醃過，嫩滑之餘層次感十足！另外，牛油熟成豬五花厚切啖啖肉，亦值得一試。佢哋嘅燒肉套餐仲會送招牌半隻雞湯，性價比高！食完燒肉，記得要試埋醬油蟹膏蟹子拌飯，滿滿嘅蟹膏同蟹子撈埋一齊食，真係好似去咗韓國咁！
【INFO】
《會長之家烤肉》
地址: 長沙灣福榮街506-510號榮發閣地下A1號舖
營業時間: 星期一至日 12:00 - 22:00
長沙灣美食推介 | 3. La Barra Tapas Spanish Restaurant
位於長沙灣嘅呢間西班牙菜小酒館，人氣非常高，就算平日夜晚都見坐無虛席。La Barra Tapas 嘅菜式味道上依然非常對胃口，特別係佢哋嘅西班牙紅蝦飯（Seafood Paella），飯粒濕度適中而且入味，海鮮味亦都好足。另一款必試嘅係傳統煎蛋餅配鱈魚，厚厚嘅西班牙蛋餅內層保持濕潤，配埋軟綿綿嘅薯仔同鬼佬鹹魚，更有風味。如果你鍾意創新，可以試吓松露蘑菇可樂餅，外皮酥脆，內餡混合咗黑松露醬同鵝肝醬，味道幾濃郁。食完主菜，記得要預留30分鐘等即焗嘅巴斯克芝士蛋糕，濃郁嘅芝士香令人難以抗拒。
【INFO】
《La Barra Tapas Spanish Restaurant》
地址: 長沙灣福榮街512-518號地下A號舖
營業時間: 星期一 18:00 - 22:00；星期二至日 12:00 - 15:30, 18:00 - 22:00
長沙灣美食推介 | 4. Contrast
Contrast 係長沙灣一間走黑白型格風嘅人氣Cafe，環境舒服簡約，好適合朋友聚會！呢度嘅食物份量足，價錢合理，職員又友善，係一個完美嘅週末Brunch之選。Cafe 嘅菜式唔少都加入咗黑白元素，好似佢哋嘅甜品開心果糯米窩夫（有竹炭窩夫）配自家製牛奶雪條，充滿玩味。呢個窩夫真係好好味，外脆內有麻糬，煙煙韌韌，淋上開心果奶蓋同濃郁嘅意大利開心果醬，好nutty！鹹食方面，推介黑松露蟹肉炒蛋竹炭多士，炒蛋超滑，黑松露同蟹肉鹹香好夾。
【INFO】
《Contrast》
地址: 長沙灣福榮街512-518號依時大廈地舖
營業時間: 星期一至日 09:00 – 18:30
長沙灣美食推介 | 5. 極之拉麵
極之拉麵呢間日式小店裝潢超有特色，滿牆模型公仔勁吸睛，一入門就感受到濃濃嘅日本風情。必試佢哋嘅A4 終極之廣島牡蠣濃湯拉麵，湯底以大量廣島蠔同自家製牡蠣醬熬足9小時，味道極濃郁但唔會死鹹，入口滿滿海味香氣，飲得出蠔嘅精華同層次感！一碗麵仲有三隻大牡蠣、磯煮鮑魚、軟淋叉燒，同流心溏心蛋，非常足料！
【INFO】
《極之拉麵》
地址: 長沙灣元州街399號喜漾地下2號舖
營業時間: 星期一休息，星期二至日 12:00 - 15:00, 17:30 - 21:30
長沙灣美食推介 | 6. 海老名沾麵
長沙灣呢間於2015年開業嘅海老名沾麵，絕對係你唔可以錯過嘅一站！佢哋主打當時喺香港絕無僅有嘅蝦汁拉麵，憑藉濃郁嘅蝦汁喺區內打響名堂。海老名沾麵嘅精髓在於佢哋嘅湯汁，使用嚟自日本靜岡嘅櫻花蝦入饌，蝦汁濃厚，蝦汁嘅香味非常澎湃，鹹鮮醬油同蒜香嘅調和感平均。加上櫻花蝦薄脆、紫菜等配料，令到沾麵汁整體更為豐富。初期只賣三款招牌拉麵：蝦汁醬油、蝦汁味噌、蝦汁蕃茄，近期更加推每日只賣10碗嘅廣島蠔拉麵，大受歡迎。
【INFO】
《海老名沾麵》
地址: 九龍長沙灣元州街213號美居中心20號舖
營業時間: 星期一至日 12:00 - 15:00, 17:15 - 21:00
長沙灣美食推介 | 7. Boholic
Boholic 係長沙灣一間充滿波希米亞風格嘅少女打卡Cafe店！店內柔和嘅色調配搭乾花、藤椅同木製餐桌，營造出既清新嘅氛圍，係個聚會同影相嘅好地方。Boholic 主打創新西日fusion料理同精緻甜品飲品。店內有多個打卡熱點，好似懸掛嘅藤製吊椅、仙人掌小樹林等等，非常吸睛。甜品方面，必食芒果糯米飯牛角窩夫，脆身嘅牛角窩夫富牛油香，搭配香甜芒果同煙韌糯米飯，口感層次豐富。另一款法式焦糖卡士達梳乎厘班戟，質地鬆軟，空氣感輕盈，散發淡淡嘅焦糖奶油香氣。
【INFO】
《Boholic》
地址: 長沙灣福華街561號君凱豪庭地舖及1樓
營業時間: 星期一至日 11:30 - 21:30
長沙灣美食推介 | 8. Soi Eat Thai Cuisine
長沙灣青山道呢間Soi Eat Thai Cuisine獲得泰國領事推薦，味道正宗地道，環境採用文青風格，以水泥牆設計配寫實主義畫作作裝飾，非常特別。Soi Eat Thai Cuisine 嘅菜式選擇繁多，香口惹味。招牌菜泰式船麵，以秘製豬骨湯底製作，湯底濃郁卻清爽宜人，金邊粉面底口感滑順細膩，魚皮煙韌彈牙。另一道推薦係辣肉碎香葉煎蛋飯，辣味爽快，肉碎炒得恰到好處，香氣濃郁，飯香與辣味完美融合，令人忍不住要多添一碗飯！如果你喺平日午市嚟食，仲有優惠套餐，而且不用加一服務費，性價比超高。
【INFO】
《Soi Eat Thai Cuisine》
地址: 長沙灣青山道454號地舖
營業時間: 星期一至日 11:30 - 22:30
長沙灣美食推介 | 9. 甜一刻
甜一刻係長沙灣好受歡迎嘅港甜品店，店內招牌包括芒果吐司磚塊、榴槤脆磚杯同芒果芋圓冰等，每款甜品都精心製作，口感豐富多層。榴槤愛好者以新鮮榴槤肉製作，香濃醇厚。吐司系列如曲奇吐司磚塊，外脆內軟，充滿牛油香氣。價格親民，人均消費$50以下。
【INFO】
《甜一刻》
地址: 長沙灣福榮街218號美居中心地下62號舖
營業時間: 星期一休息、星期二至日 16:00 – 23:30
長沙灣美食推介 | 10. 麻辣川米線
長沙灣呢間川菜米線專門店主打麻椒米線，濃郁嘅麻辣湯底配上彈牙嘅米線，帶嚟刺激味蕾嘅美食體驗。除咗招牌嘅麻椒米線，仲有多款創新口味如麻酸辣雞絲魚腐米線同麻酸辣豬大腸麵根等供選擇。店內嘅麻酸辣糖心蛋係唔少食客嘅最愛，酸辣嘅湯汁與半熟蛋黃嘅完美結。如果你鍾意重口味，麻辣川米線嘅麻辣程度絕對唔會令人失望，而且價格親民。
【INFO】
《麻辣川米線》
地址: 長沙灣元州街213號美居中心2座地下22號舖
營業時間: 星期一至日 11:30 – 23:00
長沙灣美食推介 | 11. Yuyu Sushi
Yuyu Sushi以簡潔舒適嘅木系裝潢為特色，提供多樣化嘅日式料理。雖然餐廳名叫壽司，但佢哋嘅菜單就好似居酒屋咁，種類包羅萬有，選擇非常之多，而且定價親民。Yuyu Sushi 嘅午市套餐特別受歡迎，除咗刺身、壽司、卷物，仲有串燒、天婦羅、鍋物等一應俱全。銀鱈魚西京燒定食等定食都做得非常出色。
【INFO】
《Yuyu Sushi》
地址: 長沙灣青山道399號喜薈商場1樓2號舖
營業時間: 星期一至日 12:00 - 15:30, 18:00 - 22:00
長沙灣美食推介 | 12. 魚你相聚
魚你相聚係長沙灣一間提供平民抵食嘅川式同粵式餸菜餐廳，最吸引人嘅係佢哋嘅酸菜魚一人套餐，非常適合單人用餐或者想簡單快脆食餐飯嘅朋友。呢度嘅「一人套餐」可以自己揀「主要食材 + 湯底 + 2個配菜 + 主食」，非常個人化。你可以揀鯛魚片，無幼骨，口感爽脆，配上酸菜金湯，帶點微辣，加上軟滑米線，味道完美配合。如果你鍾意重口味，仲可以追加鴨血，非常好食！除咗酸菜魚，佢哋嘅小食都好出色，好似鹽焗手撕雞，有鹹香撈埋好多芫荽同花生一齊食，非常惹味。
【INFO】
《魚你相聚》
地址: 長沙灣長沙灣道391號地下1號舖
營業時間: 星期一至日 11:00 - 23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
