網速小貼士 | 有冇人同小編一樣，平時喺屋企上網，時快時慢，有時甚至會斷線？如果面對呢個情況，大家會想轉上網Plan定買一個新嘅Router？但其實有冇諗過可能係大家放Router嘅位置唔啱，先會出現斷線或上網過慢嘅問題！小編今次同大家介紹5大網速小貼士，只要用啱方法就可以加強Wi-Fi訊號！立即碌落內文了解啦～
圖片來源：網絡圖片｜撰文：Sharon
網速小貼士1：Wi-Fi Router 位置問題
唔少人會將Router放喺方便嘅位置如角落位，但Wi-Fi接收嘅範圍有限， 要想全屋每一個角落都接收到良好嘅訊號，建議將Router放喺全屋嘅中間位置，就可以加強Wi-Fi！記住千萬唔好放喺客廳嘅角落或者櫃桶，呢啲地方過於隱蔽，因為一牆之隔會令Wi-Fi訊號好容易變弱！
網速小貼士2：唔好將Router放喺地下！
建議大家唔好將Router放喺地下，由於Router嘅電波係被設計成向下傳，如果把佢放在地上，電波只會一直向下傳。而且地板中含有嘅物料會阻擋Wi-Fi訊號，例如金屬、水泥等，當上網時Wi-Fi訊號就會接收較差！
網速小貼士3：Router要遠離其他電子產品
原來所有電子產品都會干擾到Router發出嘅電波，所以放置Router時記得要遠離其他電子產品，例如電視機、電腦、音響等，咁就可以避免影響上網嘅速度！
網速小貼士4：將Router嘅天線放唔同方向
Router通常有2條天線，好多人兩條都會直放，但原來最好嘅方法係將天線一條直放、一條橫放。天線直放有利於電腦上網嘅速度，而大家經常使用嘅手機、、平板電腦等，打橫放更有利於接收！所以將兩條天線放唔同嘅方向，可以加強Wi-Fi嘅訊號，從唔同嘅角度都可以接收Wi-Fi。
網速小貼士5：利用測量App計算訊號距離
利用測量Wi-Fi訊號距離嘅App！當上網緩慢時，可以利用App知道邊個位置嘅Wi-Fi較強或較弱，再將Router放喺一個更合適嘅地方。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
