羽絨清洗法 | 最近天氣一轉涼就會特別凍，唔少人都會出盡法寶去保暖，羽絨輕便又和暖係好多人嘅選擇！但著得耐會容易污糟，自己洗又怕洗壞點算好？日本家居達人同大家分享清洗羽絨嘅方法，只需要呢兩樣嘢就可以！想知道立即睇內文啦！
圖片來源：YouTube@編集部アールニジュウゴ、網絡圖片｜撰文：Sharon
日本人除咗整便當非常厲害，連收納以及研究生活小貼士都好勁！日本一位專欄作家經常會分享做家務嘅小貼士，今次呢位「生活達人」就同大家分享洗羽絨嘅小技巧！一齊睇下有咩注意嘅地方啦！
好多人為咗怕唔會洗壞羽絨，都會拎去洗衣店清洗，但每次清洗嘅價錢都唔便宜，其實自己洗一樣無問題，不過要記得留意以下嘅注意事項啦！
洗羽絨注意事項1：檢查洗滌標籤，羽絨會否甩色
首先檢查羽絨上嘅洗滌標籤，查清楚會否甩色！因為皮質質料嘅羽絨遇水會掉色同變形，唔適宜手洗！
2. 避免刮傷羽絨
為免刮傷布料，記得洗羽絨前要將拉鍊拉上！
3. 中性洗滌劑
建議使用中性洗滌劑去清洗，因為羽絨成分含蛋白質，用中性洗滌劑可以避免洗爛羽絨，仲要記得用溫水洗啊！
4. 用溫水
洗滌劑在30度左右特別易溶於水中，所以用溫水清洗羽絨會更乾淨！
5. 測試會否甩色
清洗前，倒上少少洗滌劑落白色嘅毛巾上，再輕輕壓上羽絨。如果毛巾上沾上羽絨嘅顏色，代表有機會甩色，建議拎去洗衣店清洗。
羽絨清洗方法1︰手洗
1. 如果羽絨上有污積，大家可以用海綿沾上洗滌劑，再慢慢印上污積嘅地方，再用水沖洗。
2. 喺洗手盆上倒入洗滌劑，再加入大量溫水稀釋，將摺疊羽絨放入洗衣槽中，以輕壓嘅方式去洗。要注意！因為羽絨大多具防水質料，一次過壓落去會令水飛濺出嚟，所以要慢慢壓洗！
3. 倒走洗清羽絨嘅水後，加入溫水，再重新清洗多次就可以！
4. 用手或毛巾將羽絨壓乾即可。
羽絨清洗方法2︰機洗
1. 將羽絨拉好拉鏈並放入洗衣網，如果羽絨太大可以摺疊羽絨再放入去。
2. 將把洗衣機設定為弱速同弱水流，再倒上洗滌劑。
3. 如果用洗衣機脫水，記得唔好長過多於一分鐘！
當洗完羽絨後，要先用衣架將羽絨掛起，放喺陰涼通風處，並拍打羽絨，避免羽絨濕水後會出現變形嘅情況。當羽絨乾透後，記得將成件羽絨揈一揈，令空氣進入，保持羽絨嘅形態。
詳細教學影片如下：
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
