南韓最近多個城市爆發蝨患，首爾、仁川及大邱等港人熱門旅遊地點都紛紛失守！之前仲有人喺香港機場快綫疑似發現「蝨蹤」，搞到人心惶惶，唔少人開始擔心床蝨已經殺到香港！究竟床蝨係咩？有咩預防及殺滅床蝨嘅方法？消委會亦曾經出版文章教大家殺滅床蝨，以下就等編輯喺下文為你一一拆解疑難。
滅蝨方法 ｜床蝨係咩嚟？
床蝨，亦有人叫「木蝨」或「臭蟲」，係一種以吸食溫血動物（例如人類）血液為生嘅細小寄生蟲，一般可以接近存活一年，生命力極強！而且床蝨有好高嘅繁殖能力，一般喺普通室溫（攝氏約18至25度）下已經可以孵化出稚蟲，而雌性床蝨一生只須交配一次就可以不停產卵，每天可產出5至6枚卵、一生可產出75至200枚卵，威力都幾得人驚！
床蝨嘅蟲卵係白色的，體積十分細小；而剛剛孵化嘅幼蟲會係乳白色或淡黃色、呈半透明，身長約2至3毫米，唔容易被發現；而成蟲後就會係棕紅色或深黃色、呈橢圓扁平狀，身長約4至6毫米，習慣喺黑夜行動、等人瞓著先吸血！如果屋企出現床蝨問題，會嚴重影響睡眠質素及生活環境，床蝨傷口仲會令皮膚發癢、發炎。
床蝨普遍藏身於衣櫃、牆角、床邊、床頭板、床上用品、地毯、梳化接縫處、坐墊、抽屜縫隙等地方。而床蝨有機會係從公共交通工具座位嘅坐墊、去旅行時使用嘅行李箱、甚至從鄰居屋企入侵你窩居！
滅蝨方法 ｜被床蝨咬有咩特徵？
床蝨叮咬時會釋放麻醉毒素，所以咬緊嗰陣係完全唔會有感覺，喺被叮咬後先會發現咬痕（小紅疹），多數出現喺手臂、手掌、腳掌、面部或頸部等地方。咬痕會出現紅腫、痕癢嘅情況，仲有機會越嚟越嚴重。而床單、床墊上亦有可能出現被床蝨叮咬或床蝨被壓扁而留下嘅血跡。
一般而言，床蝨係唔會傳播病菌嘅，所以唔需要特別處理因被床蝨叮咬而引起嘅紅疹。不過，因為被床蝨叮咬通常都會非常痕癢，甚至會出現抓傷、甚至發炎、過敏等嘅情況，呢啲情況下就可能需要睇醫生，接受藥物治療喇。
滅蝨方法｜預防床蝨方法
唔想屋企爆發床蝨風暴，就要防患於未然。去旅行都好容易將床蝨帶返屋企，所以外遊時、回港後都要加倍留神！以下就教大家幾招，從家居及旅行角度預防床蝨！
- 盡量減少家中雜物，等床蝨無藏身之所、避免使用二手家具及床品。
- 定期清潔及檢查家具，特別係床上用品、床具、床縫、地毯、窗簾及有軟墊嘅家具，以便及早發現床蝨！
- 可以喺牆壁、牆腳線、床架、衣櫃、地板、門框、梳化等常見嘅床蝨藏身處，噴灑具殘留性嘅殺蟲液劑。或者將天然矽藻土製成嘅粉劑，放喺床蝨容易出沒及匿藏嘅地方。
- 使用硬殼行李箱，減低床蝨可以依附喺布行李箱上嘅機會。
- 旅行期間搭公共交通工具或住酒店時，盡量將行李箱及隨身行李放喺行李架、枱櫈上，避免放喺床、地毯、軟墊坐墊嘅座位上。
- 回港後，唔好直接將行李箱帶入家中，可以先檢查車轆等行李箱嘅暗角位置，甚至噴灑相關殺蟲噴劑，之後先拎入屋。而旅行期間所帶備及穿著嘅衣物，應以密封塑膠袋裝起，回家後盡快以高溫清洗、用乾衣機烘乾。
滅蝨方法｜殺滅床蝨方法
萬一真係喺屋企發現「蝨蹤」可以點處理？
- 用密封厚膠袋或膠箱裝起被床蝨污染嘅紡織品，然後用不低於80°C嘅熱水浸泡或徹底清洗，再喺高溫環境下（如乾衣機）烘乾至少30分鐘。
- 使用會噴出高溫蒸氣嘅機器，以不低於80°C嘅蒸氣噴射可能出現床蝨嘅地方，以殺滅喺家具表面，以及藏於細縫中嘅床蝨，再噴灑具殘留性嘅殺蟲劑。
- 先喺吸塵機嘅收集袋中加入殺蟲劑，然後用吸塵機於可能出現床蝨嘅地方抽吸，以捕捉床蝨，令吸入收集袋中嘅床蝨中毒死亡。
如果以上呢幾個方法都幫唔到你完全殺滅床蝨，就要搵專業嘅滅蟲公司幫手喇。
滅蝨方法｜選擇滅蟲公司小貼士
其實香港都有滅蟲可以提供滅床蝨服務，分為單次收費及合約期內多次服務嘅收費。消委會曾經都出版過文章教大家慎選滅蟲公司，有需要嘅話可以留意以下小貼士。
- 選擇信譽良好、專門提供滅蟲服務，特別係床蝨嘅滅蟲公司。
- 向多間滅蟲公司查詢服務方案及詳細報價，例如：將會使用嘅滅蟲技術及器具、施工程序、收費、會否提供免費跟進等細節，然後作出決定。
- 價錢並唔係選擇滅蟲公司嘅唯一考慮，滅蟲公司應該基於檢查結果提供適當資訊，例如防治方案、殺蟲劑的資料及註冊編號、使用劑量、有可能殘留嘅傷害、安全預防措施等。特別可以留意嘅係，殺蟲劑應該選用已經喺香港登記註冊、附有法例規定嘅中英文明確標籤、較低毒性但對目標蟲害有效嘅殺蟲劑。
———————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
