慳電方法 | 一到夏天天氣咁熱，相信好多人都會長期開冷氣，喺不經不覺嘅情況下，隨時倍增，甚至電費仲要畀成千蚊！但其實長開冷氣，電費都未必係你想像中咁貴，前天文台台長林超英雖然被譽為環保達人，但其實佢都有開冷氣嘅時候，林超英更大方分享網民所實測嘅慳電7招，8月用電量更畀上年減咗大概六成，究竟當中又用咩方法？
圖片來源：Freepik、機電工程署 | 撰文：Hedy
每逢夏天都係電費大增嘅時間，簡直就係冇冷氣就生存唔到，所以好多香港人屋企長期都會開住冷氣。嘆冷氣嘅時候當然舒服，但每次收到電費單嘅時候，就會覺得銀包好痛！但原來夏天都有方法慳電？前天文台台長林超英就同大家分享網民實測嘅結果，只要做到以下7招，就可以慳大概六成左右，屋企長期電費好貴嘅朋友仔一定要試試！
慳電7式 | 1. 冷氣27度+循環扇
呢位網友將冷氣較成27度，更實測咗3個月時間，結果發現連續3個月嘅用電量都畀舊年大減，由用電約600到減到300度，當中8月嘅用電量更下降近398度，與去年同月相比，大概減咗6成以上！想慳電嘅大家就要學吓喇～再用埋循環線就可以全方位咁享受到冷氣嘅涼感～
慳電7式 | 2. 窗加隔熱膜+窗簾
當夏天太陽太大嘅時候，容易令房間被太陽直射，容易令屋企嘅溫度提升～呢個時候就可以利用隔熱膜以及窗簾，能有效阻擋紫外線，咁就可以降低溫度，隨時開風扇都夠晒涼！
慳電7式 | 3. 購買一級能源標籤電器
想買電器嘅時候就建議大家可以優先考慮一級能源標籤電器，能源效益標籤分為5級，綠色第1級能源效益最高，紅色第5級則為最低。以1級能源標籤雪櫃對比5級為例，當中1級比5級慳電達97%，所以揀選電器嘅時候都要睇清楚！
慳電7式 | 4. 購買電器前參考消委會報告
市面上有咁多家電又應該點揀好呢？毫無頭緒嘅大家就可以喺購買前先參考消委會報告，除咗可以搵到CP值嘅產品之外，仲可以根據自己唔同嘅要求例如價錢及效益等，比較各款選擇，尋找最適合自己又最慳電嘅家電。
慳電7式 | 5. 離家將冷氣較高一度
相信大家出街嘅時候都會直接熄冷氣，不過如果只係短暫出街再返屋企，其實只需要將冷氣提高一度，就可以避免一開一關更為耗電嘅情況。由於冷氣機開動嘅時候，需要用較高電流驅動壓縮機運作，所以短時間內反覆開關會消耗更多電力！不過如果大家離開屋企超過2個鐘，就建議大家可以熄冷氣～
慳電7式 | 6. 善用天花扇
天花風扇可以帶動大面積氣流循環，咁就可以喺短時間入面配合埋冷氣，令空間溫度降低。再加上使用天花風扇，就可以提高冷氣機溫度，冷氣機每調高一度可以慳大概6%至10%左右！
慳電7式 | 7. 將插頭拔走
電器唔用或者準備出街嘅時候，亦都可以將插頭拔走，由於有唔少電器就算本身熄咗，但處於待機嘅時候都會用到電力例如電視等，所以拔除插頭都可以幫手慳電！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
