新春花車巡遊2025 | 年初一如果未諗好去邊玩，就可以到尖沙咀參與全港最大型賀年盛事「國泰新春國際匯演之夜」！活動將會有9架璀璨花車、46隊本地、內地及國際表演隊伍表演，即刻入內文睇更多介紹啦！
圖片來源：官方圖片 | 撰文：Hedy
全港最大型賀年盛事「國泰新春國際匯演之夜」將會喺大年初一舉行，活動今年以「如意新春 喜樂連連」為主題 ，匯聚更多環球力量，打造出盛大嘅表演！除咗有花車之外，亦有本地、中國內地及國際表演隊伍，由尖沙咀香港文化中心廣場出發，沿廣東道、海防道及彌敦道前行，最後以香港喜來登酒店外為終點。大家都可以喺巡遊路線兩旁免費觀賞㗎！
新春國際匯演之夜 | 9大花車登場！
今年匯演將會有9架花車登場，花車嘅設計上都融入咗香港嘅地道元素，包括大熊貓、香港特色美食奶茶以及香港特色賀年文化等。仲可以見到可愛嘅LINE FRIENDS、米奇米妮及Duffy等，祝福大家蛇年花開運來，奇妙年年！
新春國際匯演之夜 | 中國內地及國際表演隊伍
今年加入咗法國、阿根廷、奧地利、印度、印尼及泰國，齊集16支隊伍嘅多元國際表演陣容。當中更有泰國人氣男團LYKN及K-Pop 女團Kep1er，絕對可以將氣氛炒熱！另外亦有勇奪2020年《全美一叮》 冠軍賽第一嘅印度舞團 V.UNBEATABLE DANCE GROUP；2018 年《全美一叮》亞軍來自奧地利嘅雜技表演團體 Zurcaroh等！而內地隊伍則有第十四屆全運會開幕及閉幕式表演隊伍陝西表演藝術團。
新春國際匯演之夜 | 12隊本地隊伍
除咗中國內地及國際表演隊伍外，當然唔少得12對本地隊伍，涵蓋流行舞蹈、啦啦隊、藝術體操同花式跳繩！當中包括於國際賽奪獎無數嘅中國香港跳繩總會、曾於2019年同2023年World of Dance Hong Kong 中奪冠嘅Chestroll Dance Crew以及喺國際賽事中屢獲佳績嘅SDM爵士芭蕾舞學院！
新春國際匯演之夜 | 年初一預熱表演
有興趣嘅朋友就記得要喺巡遊路線（廣東道、海防道及彌敦道）沿途嘅有利位置免費欣賞！喺匯演開始之前，約下午6點就會有18個本地表演團體沿巡遊路線帶嚟雜耍、魔術、舞蹈及街頭音樂等富有嘉年華特色嘅表演，率先炒熱現場氣氛！而去到8點匯演就會正式開始，一齊感受熱鬧嘅新年氣氛～而匯演結束後，特色主題花車將會喺大年初二至2月13日，再次現身大埔林村許願廣場公開展出。而年初二及年初三，更有多隊中國內地及國際表演隊伍移師到林村獻技，大家都可以到林村許願樹祈福之餘，仲可以欣賞表演同花車！
【INFO】 《新春國際匯演之夜》 日期：2025年1月29日 時間：20:00至21:45 （18:00有預熱表演） 地點：尖沙咀香港文化中心廣場出發為起點；沿廣東道、海防道及彌敦道前行；以香港喜來登酒店外為終點
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
