垃圾車 | 職業無分貴賤，無論任何職業都值得大家互相尊重！而最近就有網民喺Threads上面分享一個暖心故事，一位揸垃圾車嘅叔叔，喺車上面擺滿咗唔同被遺棄嘅公仔，背後原來仲有一個感人原因！
圖片授權：Threads@5tinyan | 撰文：Hedy
每當行喺街上面，相信有唔少人見到垃圾車都會默默行遠避開，以免聞到垃圾嘅臭味。而有網民就喺Threads上面分享一個暖心故事，佢喺香港見到一架掛滿公仔嘅垃圾車，所以就用手機影低，希望將最美好嘅一面紀錄低～當時呢位網民影完相後，司機突然追落車叫住佢，本來仲擔心緊係咪因為未經司機同意影佢架車而冒犯到佢，但原來司機只係問佢啲公仔望落污唔污糟，仲叫網民畀佢睇吓張相影成點。
垃圾車 | 為遺棄公仔賦予第二次生命
司機仲解釋呢啲公仔嘅由來：「垃圾車，啲人見到都調頭走啦！掛啲公仔上去，大家見到咪冇咁驚囉。我都唔係隻隻公仔都要㗎，嗰啲爛晒，勁污糟嘅我都係會揼。如果掛住嘅公仔太污糟，我都會換佢哋落嚟。」大家見到車上面呢啲公仔都係被遺棄嘅，但幸好有呢位叔叔賦予咗第二次生命畀呢啲可愛嘅公仔，就好似現實版《Toy Story》一樣，令垃圾車都變得更可愛同有意義，每當行人以及駕駛者路過見到，心情都會變好！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
