2024韓國楓葉 | 夏雨漸去，秋風入懷，同時係去韓國賞楓嘅季節，當然要做好準備。 唔單只喺山上先可以賞楓，市區都有些唔需要攀山涉水嘅賞楓地。小編為你整理10大韓國賞楓地，即睇邊個地方最適合你嘅旅程。
圖片來源：韓國觀光公社、官方圖片、Seoul Pass 、YONHAP NEWS、unsplash | 撰文：Cynthia
2024年楓葉預測期將楓葉初轉紅界定為山上約20%左右嘅楓葉變紅，高峰期就指約80%嘅楓葉染紅。想第一時間快人一步賞楓?可考慮雪嶽山，9月29日由打頭陣率先轉紅，預計10月尾係紅葉高峰期。旅程較後先出發? 可到訪緊貼其後嘅五臺山、雉岳山、月嶽山及北漢山等，高峰期都係大約10月尾至11月頭。
2024 韓國賞楓地點 | 1. 和談林
和談林距離首爾只係約40分鐘車程。你可以喺一片紅葉樹嘅林蔭下，細聽鳥語，翠綠嘅草地上散步，或登上觀光車，感覺超愜意。呢種人類同大自然和諧地交流、相處嘅感覺，你幾耐冇感受過呢?不如把握秋天嘅來臨，好好俾自己放鬆一下，靜靜地享受同大自然嘅時間啦!
【INFO】
《和談林》
地址：京畿道廣州市都尺面都尺上路278-1
2024 韓國賞楓地點 | 2. 釜山梵魚寺
梵魚寺係號稱釜山第一古寺，建築風散發濃厚歷史感，古色古香間灑落一片紅葉海，詩意十分。微風吹拂，紅葉搖曳生姿，處處都係精彩打卡位。秋色魅力真係冇法擋!立即準備好你嘅相機，攝低難忘嘅畫面。
【INFO】
《釜山梵魚寺》
地址：釜山廣域市金井區梵魚寺路250
2024 韓國賞楓地點 | 3. 南怡島
近郊嘅南怡島除咗有韓劇《來自星星的你》取景嘅小法國村、高空滑索同各種水上活動，更加係賞楓嘅好地方。列喺路邊兩旁嘅大樹，披上片片紅葉，形成一片夢幻火紅葉海，景色令人驚嘆。置身於秋意濃厚嘅南怡島，令人忘卻日常壓力，將所有煩惱都拋諸腦後。
【INFO】
《南怡島》
地址：江原道春川市南怡島街1 南怡島
2024 韓國賞楓地點 | 4. 德壽宮
「德壽宮石牆路」係著名韓劇「鬼怪」取境地之一，鬼怪(孔劉飾)同人類新娘(金高恩飾)就係喺度刷身而過。小巷隱敝於韓國五大宮殿之一嘅德壽宮，每年秋天變得紅葉紛紛，配合「鬼怪」加持，仲唔係最「紅」打卡位! 典雅嘅宮殿猶如披上紅色嘅薄紗，片片楓葉偶爾飄落，充滿秋日氣氛之餘，仲好適合影一輯靚相。
【INFO】
《德壽宮》
地址：首爾特別市中區貞洞5-1
2024 韓國賞楓地點 | 5. 江原道：雪嶽山國立公園
雪嶽山國立公園係最早可以睇到紅葉嘅地方，每年大約9月尾已經睇到微微紅彩。楓葉染到群山紅彤彤，景色壯麗，視覺極具震撼感。因為呢度一年四季遊客都絡繹不絕，所以旅遊配套好成熟。遊客唔需要爬山，只要登上權金城纜車就可以輕鬆到達山頂，大人小孩都可以飽覽遼闊紅葉海，盡情沉醉喺迷人嘅秋天景色。
【INFO】
《江原道：雪嶽山國立公園》
地址：江原道束草市雪岳洞山41
2024 韓國賞楓地點 | 6. 無等山楓葉隧道＆潭陽水杉道
聽講潭陽水杉道排係「韓國最美麗道路」，林蔭小道嘅環境超有療癒力，散步一小時都唔覺辛苦!相比雪嶽山同內藏山，無等山可能少啲人知，但係楓葉林驚豔嘅程度真係冇得輸。所以如果唔想同人逼嘅話，可以選擇到訪無等山，欣賞醉人璀璨秋景。
【INFO】
《無等山國立公園》
地址：光州廣域市東區Dongsan街29 、全羅南道潭陽郡、和順郡
《潭陽水杉道》
地址：全羅南道潭陽郡潭陽邑水杉路12
2024 韓國賞楓地點 | 7. 洪川銀杏林
洪川銀杏林可以話係秋天嘅冠軍。因為佢係私有土地，在每年10月免費開放一個月。這裡的銀杏樹皆為個人悉心栽植而成，至今已有30年。每隔5公尺就植有一棵銀杏樹，形成共2,000多棵樹的茂密銀杏林。一到秋天，便能看到滿目金黃的壯觀景色。附近還有洪川九景之一的三峰泉、九龍嶺、國立三峰自然休養林等，可順道遊覽。
【INFO】
《洪川銀杏林》
地址：江原特別自治道洪川郡內面廣院里686-4
2024 韓國賞楓地點 | 8. 內藏山國立公園
即使內藏山國立公園同首爾有一段距離，仍然係賞楓勝地。每年秋天，內藏山滿山遍野都係紅葉，畫面非常有詩意。鏡頭下內藏山如油畫，但親身到訪更會被大自然的鬼斧神工感動。韓國人流存一句說話，「不到內藏山，就不能算賞過楓」，真是令人想立即出發。
【INFO】
《內藏山國立公園》
地址：全羅北道 井邑市 內藏洞59-10
2024 韓國賞楓地點 | 9. 南山公園
講到要感受紅葉繽紛，不得不提南山呢個浪漫地方。 南山公園係好多韓劇嘅取景地，情侶嚟到都會扣上愛情鎖，喻意情定對方。秋天嘅到來更加提升南山嘅甜蜜氣氛。火紅落葉鋪滿地面，同另一半登上南山首爾塔，層層疊疊嘅紅海盡收眼底，凝住屬於與愛人嘅楓葉回憶。
【INFO】
《南山公園》
地址：首爾特別市龍山區南山公園街105 (龍山洞2街)
2024 韓國賞楓地點 | 10. 景福宮
去韓國一定會租韓服去景福宮影靚相，你又試過秋天去未呢?景福宮原來都係賞楓嘅好地方之一。宮殿種咗好多楓樹同銀杏樹，秋天時紅金相間，紅如烈火，金如暖陽。秋樹襯托住古典風建築，清風漸起，比平時感覺多咗一份綿綿浪漫，中意影相嘅你點可以錯過呢個超靚嘅地方。
【INFO】
《景福宮》
地址：首爾特別市鐘路區社稷路161
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
