踏入兔年,香港人除咗周圍出去拜年同逗利是,最鍾意就係同屋企人一齊睇返套賀歲片喇!隨著港產嘅小品越嚟越多,今年上映嘅賀歲片有唔少都係香港電影嚟㗎!而且演員當中仲有歌手同Youtuber擔正做主角添!小編為大家整合5大必睇 2023賀歲片 ,今次賀歲片嘅題材亦都包羅萬有,想知呢幾套戲講咩就碌埋落去睇啦!

圖片來源:官方圖片|撰文:Debbie

【2023賀歲片】新年必睇賀歲片(1)毒舌大狀

早前因《飯氣攻心》電影衝上千萬票房,2023依然有子華神型住同大家見面呀!同上次溫情小品有啲唔同,今年以黑色律政喜劇為主打,幫一宗自己一手造成嘅冤案洗脫罪名!


劇情描述:

行事作風卑鄙大律師林涼水因為一次為客戶曾潔兒處理虐兒案時,因一次失誤令曾潔兒判誤殺罪入獄17年。林涼水為此非常內疚,將事務所從律師鎮地遷移至旺角,名譽掃地。

兩年後,一次意外令林涼水發現當年曾潔兒案件新證據,為彌補當年錯失及贖罪,找回其師爺太子(何啟華飾)及當年合作的大律師方家軍(楊偲泳飾)去重新翻案。到底子華神邊樣見招拆招,為曾潔兒洗脫罪名呢?想知就記得入埸睇喇!

《毒舌大狀》

主演:黃子華、謝君豪、王丹妮、廖子妤、王敏德、何啟華、楊偲泳、栢天男主演|林保怡、谷德昭友情演出

上映日期:2023年1月21日


【2023賀歲片】新年必睇賀歲片(2)超神經械劫案下

由軒公、王菀之主演嘅《超神經械劫案下》,係改編之韓國電影《我們全村都不是人》,以戲名睇可能大家都未必知套戲講乜,不過演員陣容就非常新鮮喇。除咗有樂壇新人型男魏浚笙同鬼馬嘅呀正,仲有院長洪嘉豪,微辣嘅豪dee~準備入埸笑爆肚啦!

劇情描述:

電影講述三位解款員遇到鑽石劫匪,點知熱血新丁竟然唔肯就範,混亂之際,當中劫匪解款員內鬼竟挾鑽潛逃!另一個劫匪就扣留其他解款員作威脅,一同踏上追捕內鬼嘅旅途,唔知又會製造啲咩笑話呢?

《超神經械劫案下》

主演:張敬軒、王菀之,白只、黃正宜、洪嘉豪、魏浚笙、歐陽仲豪、張明偉、邱頌偉、楊天宇、郭思、黎峻主

上映日期:2023年1月20日


【2023賀歲片】新年必睇賀歲片(3)1人婚禮

由《幻愛》班底,周冠威導演執導嘅浪漫愛情喜劇,今次仲係小薯茄嘅阿冰初登大銀幕擔正做女主角添,不論係阿冰定係觀眾相信都好有新鮮感!小編最期待嘅都係呢一套賀歲片呀!無論戲外定內都係Youtuber嘅阿冰,今次本色出演應該無難度啦!

劇情描述:

《1人婚禮》講述小丑藝人阿冰搞笑精叻仲好鍾意引人笑,加上性格狂野作風踩界嘅男友Dickson,佢哋決志成為熱爆Youtuber!為求提升Hit Rate,佢哋順應網民要求玩求婚,實際就假結婚,不過慘遭悔婚後嘅阿冰就決定要同自己結婚…

主演:吳冰、陳健朗、盧巧音、陳逸寧、王宗堯、林欣

上映日期:1月26日


【2023賀歲片】新年必睇賀歲片(4)天龍八部之喬峰

有小品亦都有經典武俠電影,由甄子丹自導自演嘅《天龍八部之喬峰》係根據金庸作品《天龍八部》所改編,眾星雲集,連惠英紅都有份演出。如果本身係金庸迷嘅觀眾應該都會好期待呀!

劇情描述:

故事環繞《天龍八部》喬峯聚賢莊大戰,游氏兄弟廣發英雄帖邀中原羣雄前往聚賢莊,準備群力圍攻喬峯。喬峯為身受重傷阿朱治病,不顧一切決意前往聚賢莊求醫「閻王敵」薛慕華,並赴死一戰…

主演:甄子丹、陳鈺琪、劉雅瑟、王君馨、惠英紅、吳樾

上映日期:1月19日


【2023賀歲片】新年必睇賀歲片(5)非常貓狗反轉武林

最後就係由Mirror成員配音嘅卡通片《非常貓狗反轉武林》,啱哂大人帶小朋友去睇嘅合家歡電影,而且仲有Edan同大表哥開心聲演同大家一齊過新年,記得一定要睇粵語配音版呀!

劇情描述:

自古貓狗兩界誓不兩立,而貓界中嘅「武士貓」更加係名震江湖,只傳貓不傳狗。阿憨作為狗界中嘅最底層,平時做乜都會畀其他狗欺負,今次竟然夢想要去貓界學做一個武士!漂洋過海誤打誤進入小鎮貓里屯,而小鎮當下最需要就係一個武士英雄保護村民!阿憨遇上本領高強但名聲掃地嘅武士猫寅,仲有同阿憨一樣夢想做武士嘅辣貓小棉花,九五搭八嘅阿憨喺兩貓幫助下正式向武士之路進發!

上映日期:1月19日

——————————————————
Follow 我地睇更多最新情報!
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/