麥當勞叔叔 | 相信講起麥當勞，大家可能都會記得以前有唔少店鋪都有麥當勞叔叔裝飾，絕對係唔少人嘅童年回憶！麥當勞叔叔呢個名大家絕對唔陌生，但大家又知唔知佢究竟係邊個呢？
圖片來源：網上圖片、Facebook@McDonald’s | 撰文：Hedy
一講起唔同快餐店嘅代表人物，大家一定會第一時間諗到「肯德基爺爺」以及「麥當勞叔叔」。唔知大家又知唔知肯德基爺爺其實係真有其人？背後呢位老爺爺其實就係其創辦人Colonel Harland Sanders，一副慈祥嘅樣子深入民心，令大家都記得KFC嘅LOGO！而大家耳熟能詳嘅「麥當勞叔叔」究竟又係邊個呢，現實係咪真係有呢個人？
麥當勞叔叔 | 麥當勞叔叔原型係小丑？
細細個成日見到著住鮮黃色嘅連身衫再加上紅色爆炸頭嘅麥當勞叔叔，超容易令人記得。大家又有冇諗過佢嘅由來呢？其實麥當勞叔叔正式嘅全名為Ronald McDonald，其原型為Michael Polakovs所扮演嘅馬戲團小丑。麥當勞更喺1966年邀請佢擔任麥當勞叔叔，其後就成為咗麥當勞主要嘅吉祥物。當係特別場合嘅時候，麥當勞叔叔更會換上紅色西裝，相當有型！
麥當勞叔叔 | 麥當勞叔叔為首席快樂官！
麥當勞叔叔識講31種語言，除咗係小朋友嘅好朋友之外，亦係麥當勞嘅首席快樂官，將開心歡樂嘅感覺帶畀每一位。而麥當勞叔叔嘅出現亦令唔少小朋友走去食麥當勞，策略果然成功！隨後亦有一班朋友出現，包括滑嘟嘟、漢堡神偷、小飛飛，一齊將快樂帶畀小朋友。如果大家想喺香港同麥當勞叔叔打卡，就得返荃灣石圍角邨商場先有相關嘅裝飾，加埋蘋果樹，童年回憶簡直係返晒嚟！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
