魔鏡歌詞網 | 相信大家搵完整歌詞嘅時候絕對會用到「魔鏡歌詞網」，不過近日有網民就發現台灣最大歌詞網站「魔鏡歌詞網」竟然徹底消失？仲有啲咩方法可以搵歌詞？小編幫大家整合咗3種方法～
圖片來源：網上圖片、kkbox、Shazam、Apple | 撰文：Hedy
「魔鏡歌詞網」喺2005年8月成立，涵蓋亞洲、歐洲、美洲、日本、韓國歌手等歷年嘅專輯歌詞，一直都係大家搵歌詞或者練歌嘅重要網站之一。就連專輯介紹以及廣告歌都有份收錄，資料可以話係相當齊全，大家更可以喺度認識唔同嘅歌手。不過近日有網民搵歌詞嘅時候，就發現「魔鏡歌詞網」徹底消失？小編嘗試瀏覽Mojim.com，而畫面就顯示「無法連上這個網站」，暫時都未知點解會突然消失，有網民就推測可能係冇續約嘅關係。
魔鏡歌詞網由2008年開始，就係台北市音樂著作權代理人協會（MPA）授權嘅網路合法業者，換言之代表「魔鏡歌詞網」係合法提供歌詞畀大家。相信大家絕對會記得每次複製歌詞嘅時候，都會出現「更多更詳盡歌詞在※ Mojim.com 魔鏡歌詞網」，但依家竟然已經成為回憶？如果之後要搵完整歌詞又可以點做？
1. kkbox歌詞搜尋
相信好多人搜尋完整歌詞都會依靠Google，不過好多都係顯示簡體字。如果想有繁體字嘅歌詞，小編就推薦大家可以利用kkbox網頁版尋找歌詞，完全唔需要畀錢，又可以完整咁將歌詞複製。只需要喺右上角搜尋嘅位置，輸入相關歌曲或歌手等名稱，就完成！就連專輯曲目有啲咩其他歌曲都可以睇晒，超方便！
2. Shazam歌詞搜尋
當大家喺街到聽到一首好聽嘅歌，就可以用Shazam識別歌曲。除咗識別歌曲之外，其實Shazam都可以畀大家搜尋歌詞，仲會一次過有埋MV、熱門歌曲、類似嘅歌曲等資料，畀大家都可以喺度認識唔同嘅歌手。唔使Download App都可以用Shazam網頁版睇到。
3. 各大音樂平台
相信大家聽歌都有用開Apple Music、Spotify以及KKBOX等音樂平台，只要有畀錢訂閱就可以睇到唔同歌曲嘅歌詞，歌詞相對上會較為準確。不過如果想完整複製歌詞，小編就建議用以上頭兩種方法就會比較好！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
