Disney+推薦2024 | 鍾意睇韓劇嘅大家絕對唔可以錯過Disney+即將上線嘅精彩原創韓劇，有齊懸疑劇、科幻片以及綜藝片，無論係咩類型嘅韓國原創作品都有齊！
圖片來源：官方圖片、Instagram@disneypluskr | 撰文：Hedy
Disney+推薦2024 | 1. 照明商店 (暫譯) ——《Moving 異能》編劇姜草新作
如果鍾意《Moving超異能族》嘅大家，絕對唔可以錯過其編劇姜草嘅新作《照明商店》，改編自其筆下同名熱門網絡漫畫。漫畫評價更被譽為「前半段嚇死，後半段哭死」，相信絕對會好精彩！劇集講述一班互相唔認識嘅陌生人所經歷嘅故事，每個人都努力咁接受過去所帶嚟嘅傷痛，並過著平凡嘅日子。而每個角色都會被位於破舊小巷盡頭嘅一間燈飾舖所吸引，店舖有一個神秘之處就係連接住陰間同陽間！舖頭入面嘅老闆每日如常咁擦拭燈泡，直到有一日見到一位少女常客，竟然叫佢要小心身邊奇怪嘅人？！
【INFO】 《照明商店》 上映日期：2024下半年
Disney+推薦2024 | 2. 江南B-Side (暫譯) ——賤民揭開上流階層秘密
驚悚犯罪韓劇《江南B-Side》，故事講述一位賤民警探，因為朋友女兒失蹤事件，被迫深入到失蹤人口長期高企嘅江南區，卻因此發現充滿罪惡、毒品、腐敗嘅世界，當中更有著威脅市內最富有嘅上流階層秘密！《江南B-Side》將會由《惡中之惡》型爆男神池昌旭以及《孤單又燦爛的神 – 鬼怪》趙祐鎮聯手主演。
【INFO】 《江南B-Side》 上映日期：2024下半年
Disney+推薦2024 | 3. 韓星地帶：求生大作戰3——續訂第三季綜藝節目
原創韓國綜藝節目《韓星地帶：求生大作戰3》續訂第三季，今次除咗繼續有「國民MC」劉在錫以及「綜藝女皇」權俞利之外，更有前UFC終極格鬥冠軍賽選手、亞洲名將金東炫，仲有曾參與過《單身即地獄》嘅人氣YouTuber Dex新加入。全新嘅四人組將會挑戰更高難度同複雜性嘅任務，帶畀大家源源不絕嘅歡樂！
【INFO】 《韓星地帶：求生大作戰3》 上映日期：2024下半年
Disney+推薦2024 | 4. 觸發 (暫譯)——破舊20年演員失蹤懸案
由《王后傘下》韓國影后金憓秀、《黑暗榮耀》演技派男神鄭星一聯手主演嘅全新懸疑驚慄韓劇《觸發》，將會喺今年下半年於Disney+ 獨家上線。一班新聞記者多年嚟報導國內有爭議性嘅新聞，更幾乎令自己嘅職業生涯劃上句號。為咗保住飯碗，一班記者需要偵破一項不可能嘅任務，一單長達20年涉及一名著名演員失蹤嘅懸案！
【INFO】 《觸發》 上映日期：2024下半年
Disney+推薦2024 | 5. 暴君 (暫譯) ——美韓諜戰劇
暴君以一名美國政府特工試圖搵翻喺韓國政府竊取致命新病毒嘅故事而展開。全球嘅情報機構將會同邪惡勢力展開鬥爭，以防止病毒喺世界各地傳播，劇集將會充滿動作場面以及驚險元素，究竟最後又可唔可以阻止到病毒蔓延全球？
【INFO】 《暴君》 上映日期：2024下半年
Disney+推薦2024 | 6. 支配物種——《秘密森林》編劇李秀妍暗黑推理風
科幻驚悚劇《支配物種》，由《屍戰朝鮮》男主角朱智勛同《Moving超異能族》女主角韓孝周領銜主演。故事講述一個有關「人造肉」嘅世界，「人造肉」將會取替過往人類所食用嘅肉。而一位前保鑣更被招募到呢間備受爭議嘅「人造肉」實驗室公司，更擔任起保護行政總裁嘅職責，佢更被意外捲入錯綜複雜嘅情況入面。而《支配物種》更係由《秘密森林》編劇李秀妍所打造，相信絕對會延續其暗黑推理風格，帶畀大家精彩嘅懸疑劇情。
【INFO】 《支配物種》 上映日期：4月10日
Disney+推薦2024 | 7. 逆貧大叔——宋康昊出道33年首演韓劇
《孩子轉運站》康城影帝宋康昊出道33年，首次拍劇，並與《陽光先生》演技派男神卞耀漢一同主演。故事以60年代嘅韓國為背景，講述由卞耀漢飾演雄心壯志理想主義者金產，一心都想講自己嘅國家建設成為工業重國，希望能為韓國人帶嚟美國水準嘅富裕。暗中操作嘅金產竟然引起宋康昊所飾朴斗七嘅注意，兩人更因此造成一個聯盟應對現有體制中嘅複雜性，決心要為韓國帶嚟繁榮未來！
【INFO】 《逆貧大叔》 上映日期：預計5月
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
