海洋公園熊貓 | 大熊貓盈盈誕下一對可愛嘅雙胞胎，相信大家近期都喺香港唔同角落，都會發現到可愛熊貓嘅蹤影！而呢對可愛嘅孖寶亦即將出生滿100日，海洋公園邀請大家一齊參與大熊貓雙胞胎百日慶，即刻睇吓當日有咩玩！
圖片來源：官方圖片 | 撰文：Hedy
家姐細佬將會喺11月23日出生滿100日，相信大家都好想同佢哋慶祝，海洋公園就舉辦大熊貓雙胞胎百日慶，等大家都可以見證住重要里程碑！喺百日慶入面，除咗有超萌家姐細佬直播、免費紅雞蛋同豬腳薑醋之外，仲有大熊貓主題工作坊、限定表演和打卡位等，活動超精彩！就連大熊貓爸爸樂樂都會同大家見面～
熊貓百日慶 | 1. 家姐細佬實時直播
如果大家想睇到家姐細佬嘅一舉一動，就一定要嚟到威威劇場入面，透過大型LED屏幕，就可以觀察到佢哋嘅實時直播。無論係訓覺、食嘢定係玩，都好似親眼見證住佢哋嘅成長一樣～由11月23日每日播放，大家都可以欣賞都每日2節，每節約30分鐘嘅片段，就算錯過咗都有機會重溫返～同場更有威威村民分享有趣嘅大熊貓知識，絕對係難得嘅機會！
【INFO】 《家姐細佬實時直播》 日期：2024年11月23日起 時間：直播中午12:00及下午2:00；重溫16:00及18:00 地點：威威劇場（海濱樂園）
熊貓百日慶 | 2. 大熊貓爸爸樂樂見面
大家都終於有機會可以睇到大熊貓啦～雖然依家家姐細佬未可以同大家見面住，但大家都可以由11月23日起同「初為人父」嘅大熊貓樂樂打招呼！「大熊貓之旅」將於每日上午10時至下午3時開放，直至另行通知。
熊貓百日慶 | 3. 免費攞紅雞蛋及豬腳薑醋
喺中國傳統入面，紅雞蛋喺滿月和百日宴上象徵好意頭，大家如果喺11月23日以及24日去海洋公園嘅話～都有機會收到紅雞蛋以及豬腳薑醋，一齊迎接呢份喜悅。想攞嘅朋友記得要提早入去，數量有限，送完即止！
【INFO】 《免費贈送紅雞蛋及豬腳薑醋》 日期：2024年11月23至24日 時間：10:00 地點：豬腳薑醋-自然生態徑附近（海濱樂園）；紅雞蛋-海洋公園入口（海濱樂園）
熊貓百日慶 | 4. 威威與好友特別版歌舞盛會
唔單止大家可以同大熊貓樂樂見面，喺呢個咁喜慶嘅日期，威威與好友特別帶嚟100日慶特別版嘅歌舞表演，一齊跟住音樂盡情舞動，慶祝家姐細佬誕生滿100日！
【INFO】
《威威與好友特別版歌舞盛會》
日期：2024年11月23至24日
時間：10:30；中午12:00；14:00；15:30；17:00
地點：竹林天地（海濱樂園）
熊貓百日慶 | 5. 大熊貓DIY工作坊
想同小朋友一齊製作熊貓嘅小手工，就可以參與DIY工作坊。用輕黏土製造可愛嘅大熊貓雕像，或者係喺木畫布上繪畫同做手工，都相當適合大人同小朋友參與，親手製作出獨一無二嘅大熊貓紀念品！由於活動名額有限，大家都要預留時間去排隊參加～
【INFO】 《大熊貓DIY工作坊》 日期：即日起至2024年11月24日 時間：10:30、11:00、11:30、12:00、12:30、13:00、13:30、14:00、14:30、15:00、15:30及16:00 地點： 輕黏土工作坊：亞洲動物天地 - 近鱷魚潭（海濱樂園） 木藝工作坊：近香港賽馬會四川奇珍館樓梯（海濱樂園）
熊貓百日慶 | 6. 大熊貓主題光影匯演
隨著夜幕降臨，夢幻水都人工湖都變得相當靚～璀璨嘅雙胞胎寶寶投影，配合埋舞動嘅噴泉及大型水幕特效，點亮整個夜空，超唯美嘅限定光影匯演～
【INFO】 《大熊貓主題光影匯演》 日期：2024年11月23至24日 時間：下午7:00 地點：夢幻水都人工湖（海濱樂園）
熊貓百日慶 | 7. 大熊貓氣球+打卡位
夢幻水都平台亦搖身一變成為大熊貓打卡位，等大家都可以紀錄低呢個重要嘅時刻。帶埋小朋友去海洋公園都一定要攞返個扭扭熊貓氣球，繽紛趣緻得嚟又可愛，絕對深受小朋友歡迎！
【INFO】
日期：2024年11月23至24日
時間：11:00、11:30、12:00、13:00、13:30、14:30、15:00、15:45、16:15、16:45、17:30、18:00
地點：海濱樂園廣場（海濱樂園）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
