講起香港歷史上最耐人尋味、爭議性最高嘅奇案，1974年發生嘅「跑馬地紙盒藏屍案」肯定榜上有名。呢宗案件唔單止轟動全港，仲係香港開埠以來首宗零人證、零表面動機，純粹依靠「環境証供」同科學鑒證就將被告定罪嘅謀殺案。呢個懸案最近再次被搬上大銀幕，改編成懸疑犯罪電影《紙盒藏謎》（前名：《法迷藏》），引來極高關注！
圖片來源：《紙盒藏謎》劇照｜撰文：Sharon
電影由擅長拍犯罪題材嘅翁子光監製、譚廣源執導，更加成功打入第28屆上海國際電影節「金爵獎」主競賽單元，成為首部入圍該獎項嘅香港製作電影！未正式上映就先聲奪人，絕對值得各位影迷期待！
轟動全港嘅歷史懸案：到底係定罪定冤獄？
電影故事原型為1974年12月17日早上，跑馬地街頭發現一具赤裸女屍，被藏喺一個日立S-67B電視機嘅包裝紙盒入面。死者證實為年僅16歲嘅少女卞玉瑛。當時警方鎖定喺跑馬地安美飲品公司兼職嘅店員歐陽炳強為嫌疑犯。雖然警方搜查過程中，完全搵唔到行兇動機，亦冇任何目擊證人，但最終法庭憑藉環境証供判處佢謀殺罪成。由被捕到判刑，甚至入獄後嘅幾十年，歐陽炳強都一直喊冤，堅持自己係無辜嘅。呢宗案件一直被民間視為香港史上最大嘅未解疑案之一。
張頌文首度全粵語演出！卡司陣容超有睇頭！
今次《紙盒藏謎》嘅演員陣容相當有驚喜，新舊實力派同偶像派同場飆戲！張頌文飾演疑犯司徒偉平（原型為歐陽炳強），來自廣東嘅佢，今次仲係第一次全粵語對白演出，演技令人期待！呂爵安（Edan）飾演黃品榮；梁洛施飾演司徒偉平嘅妻子，喺丈夫入獄後默默承受壓力同為佢奔波；譚耀文飾演重案組警長陳獎；吳冰飾演案中死者石善瑩（原型為卞玉瑛）。仲有谷祖琳、柯煒林等一眾好戲之人加盟！
一個紙盒，一具女屍，一座城市嘅集體焦慮。1974年嘅跑馬地紙盒藏屍案，係香港首宗冇人證，單靠科學鑑證定罪嘅謀殺案，數十年來，兇手喊冤上訴到認罪減刑，至今仍眾說紛紜。究竟呢宗橫跨幾十年嘅懸案，喺大銀幕上面會點樣重新呈現？司徒偉平到底係冷血兇手定係冤獄受害者？大家記得密切留意《紙盒藏謎》嘅上映消息啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
