「呢個世界上，有衰鬼、有酒鬼、鹹濕鬼…問你究竟攪乜鬼！」農曆七月十四盂蘭節係鬼門關大開嘅日子，大量孤魂野鬼跨過陰陽交界湧至陽間。無論你相信鬼魂存在與否，都可以了解一下，避免誤踩地雷招來厄運。唔想「撞鬼」？謹記以下10大鬼節禁忌，從衣、食、住、行「全方位」保平安！
圖片來源：unsplash、pexel、《怪談》劇照｜撰文：Cynthia
農曆七月十四鬼節禁忌 | 衣
1. 避免鈴鈴噹噹的穿撘
有啲人可能討厭鈴鈴聲，但鬼魂就好鍾意。鈴鈴聲容易引起鬼魂注意，誤以為你為佢帶路，或有興趣同佢接觸。所以盡量避免佩戴掛有鈴鐺嘅手鏈、頸鏈甚至戒指，晚上安安靜靜回家吧。
2. 避免黑紅色、麻質及露肩的衣着
黑色衫雖然易襯又顯瘦，但容易勾起鬼魂注意，更隨時變黑氣磁石！以為紅色好旺？絕對唔係，因為相傳紅衣死亡嘅大多係厲鬼，著紅衫的話會被誤認做「朋友仔」，鬼差隨時跑過嚟拉你！人們辦白事時多數會披麻戴孝，著麻質衣服可能會令鬼魂誤會，都唔係一個適合嘅穿搭。仲有，我哋成日聽到「人有三把火」，夏天溫度高，好多女士都鍾意著露出香肩，此舉卻會吸引鬼魂拍熄肩上兩把火，吸走陽氣，導致生病或生活問題等可能因此接踵而來。
3. 忌拔腳毛
好多人唔鍾意自己身體上嘅毛髮，習慣經常剃毛。但踏入農曆七月，各位就要小心選擇時間，盡量避免深夜剃毛。人嘅毛髮代表精、氣、神，剃毛即代表有損能量。加上凌晨時份陰氣重，較易見到「朋友仔」。
農曆七月十四鬼節禁忌 | 食
4. 忌含冰塊
有啲人飲凍飲會鍾意咬冰、食冰，但農曆七月咁樣做係好危險㗎。相傳去除「冰塊」左邊部首，就會變成「水鬼」兩字。所以如果你住喺近水嘅地方，含著冰塊好容易招惹水鬼。
5. 避免生冷食物
鬼魂同鯊魚一樣，都特別喜歡血腥嘅食物。活生生從魚劏出嚟嘅肉，血腥味特強。唔想「朋友仔」聞到你食落肚嘅「血腥味」，就盡量避免進食刺身吧。
農曆七月十四鬼節禁忌 | 住
6. 忌深夜洗衫
滴、滴、滴⋯⋯鬼月深夜聽到呢啲水滴落地下嘅聲會唔會覺得好驚呢。靈體其中一個最鍾意依附嘅地方，就係濕淥淥嘅衣物。佢哋晚上四處遊蕩，咁啱又見到你晾衣服，自然會隱藏喺衣物之中。
7. 不宜大修家居
屋企有任何大幅度舉動，都會引起鬼魂注意，間接邀請佢哋嚟湊熱鬧。
農曆七月十四鬼節禁忌 | 行
8. 忌坐第一排
點解電影有時表示滿場，但第一排明明有位？《陰陽路》第一集有提及，原來戲院設有「陀地位」，係留畀鬼魂睇電影嘅位置，而且鬼節容易聚陰，無論你信唔信呢個傳聞，呢排睇戲要識揀位阿。
9. 忌「手多多」
鬼節靈體湧至陽間，傳統習俗都會燒衣紙，街道路祭品、紙錢紛飛，令遊魂野鬼有餐飽飯食。街上會有一枚枚硬幣，千萬唔好見到係錢就執！因為係鬼魂嘅過路費，希望畀錢鬼魂唔好打擾自己。仲有，街上會不時出現祭品，其實係畀鬼魂㗎，如果踩到或者拎走祭品，鬼魂會跟埋你返屋企。所以唔好手多多，拎走唔屬於你嘅野！
10. 避免大聲叫人全名或回應自己全名
平時大家可能都直呼親朋戚友全名，但係鬼節就細細聲叫暱稱好了。如果你大聲叫人全名，會被鬼魂記住，然後搵到對方。相對地，當你感覺身後空無一人，但又聽到自己個名，可能鬼魂己經默默記低你個名，所以呢個時候千萬千萬不要回頭或回應！你都唔想親朋戚友或自己被鬼魂「睇中」吧。
謹言慎行 尊敬鬼神最重要
其實以上禁忌，都係為咗唔好影響自己同「朋友仔」，免模糊人鬼之分界線。正所謂「平生不作虧心事， 半夜敲門也不驚」，只要小心行為與言詞，心存尊敬和尊重，相信你會安然渡過鬼節。有啲人亦會透過以下四個做法，令自己喺農曆七月過得更安心。
1. 吃五果以示尊敬
五果供奉鬼神，其中包括核桃、杏仁、豆類食物。
2. 宜早收工
如果加班，只剩你一個留喺辦公室會唔夠陽氣。放工之後搭尾班車，因為時間已晚撞上鬼門開嘅時間，都會增加見到靈體嘅機會。咁鬼門幾點開呢？新曆2023年8月16日嘅子時，即係23:00就係鬼門開嘅日除，鬼魂會湧至陽間。而鬼門會於新曆2023年9月14日關上，朋友仔就會返回陰間。
3. 「拜門口」
陰間嘅「好朋友」嚟到，家家戶戶都會供桌，祭上五味碗（魚、肉、雞、鴨及菜）、米飯水果等各式食物來招呼佢哋。豐富食物加上紙錢，為的是幫「好朋友」充飢，同時祈求佢哋唔好入嚟屋企搗亂。
4. 攜帶護符
如果真係好驚好驚，可以帶令自己感到安心嘅護身符，常見嘅有觀世音、關聖帝君等神像玉珮。
*文章內容僅供參考，切勿過於迷信
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
