年齡嘅秘密，以為唔講就冇人知？少年，你太天真了。其實日常溝通中用嘅潮語，已經悄悄地出賣你嘅年齡。因為唔同年代都有專屬潮語，反映當時嘅社會文化。小編搜集了12個香港過氣潮語，同大家一齊重溫曾經流行一時嘅用詞。唔知有冇勾起你共鳴，開始回想當年嘅青春時光呢？
圖片來源： Instagram、劇照、網上圖片｜撰文：Cynthia
香港過氣潮語 | 1. Kai子
Kai正字為「凱」，國語係「Kai（第三聲）」。喺台灣，當一個人做野唔經大腦、傻下傻下、欠缺思考時，人們就形容佢為「凱子」。傳入香港後，我哋參考其國語讀音，慢慢就演變成掛喺口邊嘅「Kai子」喇！
例句：你都Kai Kai哋！
香港過氣潮語 | 2. 屈機
當一個人展現強大實力而壟斷局面，人們可稱佢為「屈機」。「屈」字指人在特定情境下無法抵抗，只能屈從於外在情勢。「屈」字出自《孫子·謀攻第三》︰「不戰而屈人之兵，善之善者也。」「屈機」則源於80年代機舖，指玩家利用bug，達到遊戲內其中一啲目的例如增加血量。2008年中學會考《綜合能力》卷出現過「見鬼勿Ｏ嘴 ，潛水怕屈機」一題，除咗令一眾學生百思不解，更令好多大朋友小朋友認識「屈機」一字。
例句：小明年年考第一，運動又掂，真係勁屈機！
香港過氣潮語 | 3. 十卜
十卜係英文字Support嘅諧音，表示支持和同意。仲記得當年上論壇吹水時，為咗想樓主繼續分享相關內容，大家都會回覆「十卜十卜」。特別係各大論壇，大家都好踴躍「十卜」樓主。如果唔係，當年邊有咁多種子 (seed)。
例句：聽日你比賽，我哋一定十卜你！
香港過氣潮語 | 4. 爆seed
《機動戰士GUNDAM SEED》嘅男女主角，喺戰鬥嘅緊要關頭時，會爆發潛藏力量。當呢個力量爆發嘅時候，一粒同佢哋眼瞳一樣顏色嘅「種子」會爆炸。「種子」爆破後，佢哋眼瞳會收縮，觀察力、敏捷度等等會激增，「秒殺」眾多敵人。因此，爆seed係形容「瞬間發揮潛力」嘅意思。而TVB劇集《使徒行者》都拎咗呢句潮語作為角色名添。
例句：呢鋪game我志在必得，各位我要出絕招爆seed啦！
香港過氣潮語 | 5. O嘴
O嘴意思係指驚訝到嘴張大，形狀好似英文字母O字。當人們聽到意料之外嘅消息，通常反應都會係擘大個口得個窿，唔識俾反應，用嚟表示驚訝、訝異等。
例句：其貌不揚嘅阿俊參加香港先生，仲要入咗十強，現場觀眾個個都O嘴。
香港過氣潮語 | 6. 囧
囧字多數用嚟表示尷尬、無奈以及真係頂唔順等意思。約2004至2005年，囧字喺台灣的網路世界流行起來，相信係受到當時日本網路上流行嘅”orz”或繪文字影響。而喺香港，囧字全靠TVB女演員胡杏兒發揚光大。有網友將胡杏兒喺電視劇《亂世佳人》中經常做嘅委屈八字眉表情同”囧”字相提並論，討論佢嘅演技並惡搞佢叫胡囧囧」，令”囧”字增添一層趣味。
例句：我買隻3號仔又唔中，真是太囧了！
香添港過氣潮語 | 7. 好𤓓
「𤓓」原指燒燶嘢嘅臭味，後來引申至用嚟形容一個人出現尷尬或不順利嘅狀況。「好𤓓」可以用嚟形容一個人做嘢做得唔好、做錯事、或而出醜。
例句：去高級餐廳食野唔識英文點餐，搞到我好𤓓呀！。
香港過氣潮語 | 8. 嘔電
當你覺得某件事物或某位仁兄好煩厭，令到你情緒暴躁，覺得好「攞命」，就係「嘔電」嘅狀態。嘔電多數同潮語嘔血互通。
例句：佢講極都唔明，激到佢阿媽當堂嘔電。
香港過氣潮語 | 9. 淆底
當一個人聲大大，計劃好要做嘅事情，但因為覺得驚而臨時縮沙，就可以形容佢「淆底」。多數形容臨陣退縮、驚驚青青同咩都唔敢做嘅膽小鬼。
例句：你連約女神出嚟食餐飯都唔敢？正一淆底怪。
香港過氣潮語 | 10. 好in
如果有人話你「好in」，佢意思係讚你夠入流，走係潮流嘅尖端。普遍嚟講，「in」嘅人都識打扮下，有時尚感、受歡迎或符合大眾喜好。不過聽到「好in」呢個字，都知道講嗰個人唔係「好in」。
例句：佢著衫「好in」，入型入格。
香港過氣潮語 | 11. 去邊到wet
「去wet」有去吃喝玩樂嘅意思，常見於以前嘅通俗電影及電視劇，近年已經再不見個蹤影。有啲歷練嘅小編就用緊「去蒲」代替，唔知而家新一代又點樣形容呢？
例句：阿女，今晚又去邊到wet呀？
香港過氣潮語 | 12. 拜拜你條尾
想用一個較幽默嘅講法同人講拜拜？「拜拜你條尾」聽落嘅語氣輕鬆搞笑，可以友好地表示你要離開或收線。不過有時都有鄙視意味！例如成班朋友出嚟玩，有個男仔勁掃慶要早走，就可以同佢講「拜拜你條尾」喇。
例句：睇到呢度，係咪學咗好多潮語呢？講住咁多先，拜拜你條尾喇！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
