日本研究指宵夜四大好處 宵夜會致肥呢個講法居然錯？

大家有冇食宵夜嘅習慣？唔少想Keep Fit嘅人瞓覺前都避免食宵夜，因為擔心食完就瞓覺會好易肥～但日本有大學研究指出，原來瞓覺前兩小時食宵夜唔單止唔會肥，仲可以幫助減肥添！一齊入內文睇下究竟食宵夜有咩好處啦！等小編今晚都準備宵夜先！

圖片來源：網絡圖片｜撰文：Sharon

日本岡山大學醫療科學部進行咗3年嘅研究，指出體重增加嘅原因係因為血糖水平高，相反瞓覺前兩小時進食係唔會影響血糖水平同體重！呢項研究觀察咗1,573名嚟自西部日本嘅中、老年人，搵出咩因素會影響人嘅血糖水平。研究結果發現，就算睡前兩小時進食，對血糖高低唔會有太大嘅影響，食宵夜而致肥呢個講法唔係完全正確！相反，其他飲食或生活習慣如身高體重指數、吸煙同飲酒習慣反而對血糖水平有更大嘅影響。

瞓覺前食宵夜四大好處

1. 改善失眠

減肥嘅朋友一定會避免食宵夜，就算肚餓都情願捱餓，但空腹嘅低血糖狀態會大大影響睡眠，瞓唔好反而無助減肥！反而瞓覺前食嘢可以令血糖穩定，改善睡眠質素，研究更建議大家可以食核桃及杏仁呢類食物，更有助入睡。

2. 減肥

以為夜晚唔食宵夜就可以減肥？呢個諗法原來唔係百分百正確㗎！身體處於休息嘅狀態都會燃燒能量，當喺肚餓嘅情況入睡時，會消耗體內嘅蛋白質。不過過量蛋白質嘅消耗會令身體嘅肌肉比例下降，脂肪比例上升，雖然睇落好似有瘦咗嘅感覺，但更易令體重反彈！但大家要記得就算食宵夜都要適可宜止，唔好過量進食！

3. 提升工作效率

捱餓嘅感覺特別辛苦，唔單止難以入睡，半夜仲有機會餓醒，影響睡眠質素，第二日都變得冇精神，繼而影響工作效率，所以適當地進食可以有助於提升工作效率！

4. 幫助新陳代謝

即使我哋瞓咗覺，但身體仍然在運作，需要「燃料」進行新陳代謝，當中宵夜嘅食物可以作為我哋嘅「燃料」，除咗可以幫助身體有熱量嚟燃燒脂肪，同時有抑制飢餓酵素嘅效果，改善身體狀態，促進新陳代謝！