每逢踏入中秋月份，唔少人都會一家大小去賞月，歡度團圓時光。而今年總共會出現4次「超級月亮」，其中一日更加會出現全年最大滿月「超級藍月」！以下為大家介紹2023年中秋時分「超級月亮」嘅最佳觀賞日期，仲附有中秋賞月好去處以及前往方法，無論係睇超級月亮同中秋賞月都有好去處啦！
圖片來源：土木工程拓展署、Wiki@建圖春秋、康樂及文化事務署、海濱事務委員會、西九文化區、數碼港、Facebook @香港風景攝影會 Kevin Leung｜撰文：Icy
| （廣告時間） |
「超級月亮」意指新月或滿月時，月球處於軌道上距離地球最接近嘅位置，雖然月球體積並唔會實際變大，但滿月表觀就會比起平均滿月較大同光亮。所以每次出現「超級月亮」掛雲霄嘅絕美畫面，都吸引唔少人朝聖同拍攝。
2023年總共會出現4次「超級月亮」，頭兩次已經率先係7月3日同8月2日出現，之後將會係8月31日同9月29日，即係中秋當日再次出現。而8月31日更加係全年最大嘅滿月，俗稱「超級藍月」，屆時月球同地球之間距離只有大約35.7萬公里！香港太空館預計「超級藍月」會於8月31日19:07喺東邊升起。錯過今次時機嘅話，就要再等6年，即係2029年先有得再睇！知道大家賞月一定要搵個靚位，小編集合咗6個開揚嘅賞月好去處，各位天文發燒友要把握今次機會去睇啦！
賞月好去處1 – 將軍澳跨灣大橋
將軍澳跨灣大橋於上年尾正式開放，係全港首條三合一嘅海上高架橋，設有行車道、單車徑同沿海行人路，景觀開揚，市民可以踏足大橋賞月。由於附近空曠，避開高樓大廈嘅遮擋，所以月亮會顯得特別清晰同明亮！
要前往將軍澳跨灣大橋，大家可由調景嶺地鐵站A2出口，或將軍澳地鐵站B2出口步行前往。
-
（圖片來源：Wiki @建園春秋）
【INFO】
地址：香港將軍澳灣
時間：24小時
賞月好去處2 – 紅磡海濱花園
紅磡海濱花園全長約250米，24小時開放，可通往尖東及黃埔。長廊除咗設置避雨亭、草坪等等嘅娛樂休憩設施外，仲可以觀賞到維多利亞港海景。日前喺Facebook群組「香港風景攝影會」上，已有唔少網民分享多張之前影到「超級月亮」嘅相片，其中就係紅磡海旁拍攝到又大又圓嘅超級月亮，金黃色一片好耀眼！
大家可以由黃埔或尖東地鐵站步行前往紅磡海濱花園，不過需時會耐少少，大概20分鐘，建議需要攜老扶幼嘅朋友可以乘搭的士前往。
（圖片來源：Facebook @香港風景攝影會 Kevin Leung）
【INFO】
地址：香港紅磡灣
時間：24小時
賞月好去處3 – 佐敦谷公園
佐敦谷公園佔地面積約6.3公頃，係觀塘區內最大嘅公園，並擁有特大草坪。由於公園附近比較少高樓大廈，視野廣闊，所以呢度除咗係野餐聖地，亦係賞月好去處之一。
前往佐敦谷公園需要由彩虹出發乘搭27或29M號巴士，或者從觀塘出發乘搭23或23M號巴士。但要注意，九龍灣淘大商場對面有一個「佐敦谷遊樂場」，亦係一個消閒休憩公園，但係同佐敦谷公園唔一樣㗎，大家小心去錯！
（圖片來源：康樂及文化事務署）
【INFO】
地址：香港茶寮坳新清水灣道71號
時間：星期一至日 05:00-23:00
賞月好去處4 – 堅尼地城卑路乍灣海濱
位於堅尼地城嘅卑路乍灣海濱長廊，全長172 米，設有多項兒童遊樂設施、綠化園景同休憩空間，地方夠寬闊之餘，仲可以一邊吹住海風，一邊飽覽維港西面同夕陽海景。海濱長廊為寵物友善空間，所以大家可以帶埋心愛嘅毛孩，一齊團圓賞月！
要前往卑路乍灣海濱長廊，大家可從堅尼地城地鐵站C出口出發，向海濱方向步行大概6分鐘就會到達，非常方便。
（圖片來源：海濱事務委員會）
【INFO】
地址：堅尼地城城西道
時間：24小時
賞月好去處5 – 西九文化區
相信去開野餐嘅朋友對於西九文化區一定唔陌生，呢度集藝術、教育及公共空間於一身，其中藝術公園擁有特大嘅人寵共融草坪，提供舒適嘅休憩玩樂空間。綠意盎然嘅草坪面對住一望無際嘅維港景色，除咗好適合拍攝落日景緻，仲係觀賞月亮嘅好地方。
要前往西九文化區，大家可以係九龍站落車，由C1或D1出口出發，跟從路標指示步行前往ELEMENTS圓方金區2樓嘅藝術廣場天橋出口，需時大概10分鐘。
（圖片來源：西九文化區）
【INFO】
地址：香港尖沙咀區
時間：星期一至日 06:00-23:00
賞月好去處6 – 數碼港海濱公園
講起野餐聖地，數碼港海濱公園亦係其中一個熱門地點。公園佔地面積約60萬平方呎，擁有無敵大草地，環境舒適，吸引唔少家庭去放風箏、散步同野餐團聚。由於呢度面向香港西南方嘅西博寮海峽，海景十分開揚，而且抬頭就可以望見無遮擋嘅天空，所以大家不妨考慮去數碼港海濱公園賞月！
至於前往交通方法，大家可以係堅離地城地鐵站A出口，轉乘58號小巴至數碼港落車。
-
圖片來源：Wiki@Wpcpey
【INFO】
地址：香港鋼綫灣貝沙灣道
時間：星期一至日 07:00-23:00
