如果有一日你手拎住一張「黃金金券」，可以入場玩盡威利旺卡嘅神奇朱古力工廠，你覺得係夢想成真定係地獄開局？為咗慶祝 1971 年經典電影《朱古力獎門人》上映55週年，Netflix正式宣布推出全新實境競賽節目《Wonka’s The Golden Ticket》（旺卡的金彩券爭奪戰），仲落實咗喺9月23日正式上線！
圖片來源：Netflix、網絡｜撰文：Sharon
今次節目絕對唔係溫馨小品，而係被官方定性為一場「高風險社會實驗」！ 12組玩家（每位參賽者可以帶多一位Partner）拎住金券闖入「復古未來感」十足嘅實景工廠。大家要喺體能、智力，甚至道德底線之間反覆拉扯同勾心鬥角！背叛、誘惑、陷阱樣樣齊，話之你係多年好友定情侶，為咗贏到最後，分分鐘撕破臉！而官方對終極大獎仲要守口如瓶，淨係話係「足以改變人生嘅獎勵」，簡直係《魷魚遊戲》朱古力版！
除了遊戲刺激，節目組嘅致敬細節簡直係童年回憶殺！首先，會以AI重現初代Willy Wonka聲音，並獲得Gene Wilder遺孀Karen B. Wilder親自授權，利用AI技術俾1971年初代旺卡嘅經典聲音再度登場！另外，仲有當年飾演Oompa Loompa嘅演員Rusty Goffe亦會重返工廠，親自再演呢個靈魂角色！
想知道邊個可以笑到最後、成功抱走神秘大獎走出工廠？記住Mark實9月23日開播，準備睇呢場甜到爆又驚到絕嘅真人騷！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
